大阪仕業檢查車輛所

大阪仕業檢查車輛所（日文：大阪仕業検査車両所おおさかしぎょうけんさしゃりょうしょ）係日本大阪府一間鐵路車廠，喺攝津市安威川河邊，屬於東海旅客鐵道（JR東海）關西支社。

鳥飼車輛基地

呢間車廠位於東海道新幹線嘅京都站同新大阪站之間，同旁邊嘅大阪交番檢查車輛所、大阪修繕車輛所、大阪台車檢查車輛所合稱鳥飼車輛基地。主要負責檢修東海道山陽新幹線同九州新幹線行嘅子彈頭火車。

歷史

1964年，東海道新幹線支社大阪運轉所成立。1970年8月15號，變成新幹線總局大阪運轉所。1975年1月20號，改名做大阪第一運轉所，而屬下乘務員部門分拆做大阪第二運轉所。

1987年4月1號，因國鐵分割民營化，變成東海旅客鐵道（JR東海）新幹線鐵道事業本部大阪第一運轉所。1988年4月1號，改名做大阪第一車輛所，並分拆交番檢查部門做大阪第二車輛所、台車檢查部門做大阪第三車輛所。

2009年7月1號，因基地車輛所再重組，大阪第一車輛所分拆成大阪仕業檢查車輛所同大阪修繕車輛所。