大星簪

大星簪（西文Pedra Blanca，亦常誤寫Pedro Blanco、Pedro Blanca，意思白石；Tae-sing-chan），又叫大青針、大星簪岩、大星簪礁、針頭岩，《香港雜記》繙必度羅柄冷高島，係中國一島，喺廣東東側嘅南海之上。因爲島之故，亦有寫大青針島或針頭岩島。家下歸惠州市惠東縣，喺大亞灣東南偏南，紅海灣之南。個島孤懸海上，遠離大陸。大星簪係嚿大石，畀海水沖成三截，突出水面，查實係海牀山脊頂。石色白，所以洋人叫白石。

大星簪距大星山福記角（Fokai Point）東南十九哩，方位東南卌二度。而擔桿島東行卌九哩亦可見。

島喺正香港東面，緯度同九龍一樣。由島向西行，就可以到香港，距西貢八萬五千米左右。往來香港、廣東沿岸，茫茫大海見大星簪，就知位置，舊時船以佢做指路。之不過，島上並無燈塔。

大星簪魚獲豐富，亦係潛水勝地，有鯨鯊出沒。漁民在此捕魚。但亦有不法漁民，用魚炮炸魚，破壞生態。

地理

大星簪喺北緯22°18'54"，東經115°7'30"。喺洋面之下，海牀係巨山脊，係岩石層，深度有10米到30米。

中國政府列大三門、小三門、青洲、公洲、黃毛刀、紅聖公同大青針、鬼灣等島，做沱濘列島。

史

一九九六年，中國政府發佈聲明，大星簪爲中國領海基點之一。

二〇〇三年八月開始，惠東縣政府分批喺轄區十九島立碑。當中包括大星簪，其他有鹽洲、小星山、桑洲、三角島、坪峙島、白鴨排、東虎嶼、西虎嶼、龍船洲、聖告島、龜洲等。

出面網頁

• 〈中国东海１０座领海基点石碑建成〉。
• 〈中华人民共和国政府关于中华人民共和国领海基线的声明（1996年5月15號)〉。
• （英文）"Declaration of the Government of the People's Republic of China on the baselines of the territorial sea（May15th, 1996)" (PDF).
• 〈Google Map查大星簪〉。
• 〈中華民國 東南海岸 大星簪礁至南澎列島〉。