太湖縣

太湖縣（粵音：taai³ wu⁴ jyun⁶）係中華人民共和國安徽省安慶市嘅縣。面積2031km²，人口57萬（2010）。

太湖縣比較有名嘅景緻有花亭湖。呢個湖原先係1960年代爲咗調節洪水而挖嘅，後來作為水力發電用。整呢個湖初期因為浸咗好多田畀當地人鬧，不過而家反而開發成旅行地。

另外佛教一派嘅禪宗喺呢度嘅歷史都幾長下。

史

• 太湖個名源自呢度嘅地理。《南畿誌》：「因其地有大湖，故名。」《清史稿·地理誌》：「太湖舊與小湖五，並湮。」《太湖縣誌》：「所湮五湖，名爲大湖、小湖、仰天湖、陸鍾湖、黃里湖。」。講明呢度曾經好多湖，不過後來都乾曬，而個地名就流傳落來，而同太湖嗰個湖撞名。
• 南朝宋元嘉二十五年（448年）呢度設太湖左縣。（南朝宋、齊兩代將南方異族嗌做「蠻左」，異族之地就話係「左縣」。）
• 隋開皇三年（583年）太湖左縣所屬嘅晉熙郡改名做熙州，太湖左縣就跟住改名爲晉熙縣。開皇十八年（598年）恢復原名，不過去咗個「左」字，叫太湖縣。
• 唐武德四年（621年）分太湖縣一部分爲青城、荊陽兩個縣；武德七年（624年）青城併入荊陽；武德八年（625年）荊陽重歸太湖。

政區

太湖轄10個鎮、5個鄉、2個單位

• 鎮：晉熙鎮、徐橋鎮、新倉鎮、小池鎮、寺前鎮、天華鎮、牛鎮鎮、彌陀鎮、北中鎮、百里鎮
• 鄉：大石鄉、城西鄉、江塘鄉、湯泉鄉、劉畈鄉
• 單位：經濟開發區、花涼亭水電站

攷

• 太湖縣府