套息交易

套息交易（英文：Carry Trade）意思係喺套取息差嘅交易，通常嘅做法係借啲低息（低回報率）嘅資金（例如：日圓）嚟買入高息（高回報率）嘅資產（例如：澳元）從中套取息差。套息交易又叫做利差交易或融資套利交易。英文 Carry Trade 嗰度嘅 Carry 意思係持有一項資產所獲得嘅報酬（如果係正數）或者成本（如果係負數），可以粗略咁譯做「利差」。例如，大宗商品通常都係「負利差資產」（negative carry assets），因為持有呢啲資產會產生儲存成本，甚至價格可能會跌。 想像一下，你買咗一大批糖、粟米、大麥或者小麥之類嘅大宗商品，你買咗之後需要搵地方貯存，通常係放喺一啲大型圓筒倉裏面，如果你無賣返出去，時間耐咗，呢啲大宗商品有可能會變壞，而且貯存成本唔平。但係喺某啲情況之下，適當對沖嘅大宗商品，可以係正利差資產，例如喺遠期市場（Forward Market）或者期貨市場（Futures Market）嗰度有人願意俾足夠高嘅溢價嚟買入你手上嗰度大宗商品。對方願意俾高嘅溢價嚟買遠期或者期貨合同，通常係因為預計市場將會供不應求（例如長期旱災或者水浸，令到投資者相信有啲國家會發生糧食失收）。利差交易亦都可以係多邊交易，通常係藉入低利差資產同時借出高利差資產，從中賺取利差；例如金融危機期間嘅黃金就係好出色嘅避險資產。

套息交易通常唔係套戥（arbitrages）：純粹嘅套利，無論點樣，都可以賺到錢；套息交易只係喺無任何不利套息交易嘅變化嘅時候，套息交易先至能夠賺到錢。

利率套息交易/期限轉換

利率套息交易（Interest rates carry trade）或者叫期限轉換（Maturity transformation）傳統上係商業銀行嘅主要收入來源之一，通常係「平借貴貸」，意思就係借入一啲平嘅錢（例如利息比較低嘅隔夜存款）同埋借出比較貴嘅貸款（通常長期利率會高過短期利率）。呢啲套息嘅機會通常都係喺向上傾斜嘅「孳息曲線」（upward-sloping yield curve），但係如果「孳息曲線」倒掛，就會有虧損。好多投資銀行，例如：就算連曾經係美國第五大投資銀行嘅貝爾斯登（Bear Stearns；紐約證券交易所代碼：BSC）都喺利率套息交易嗰度失敗過，因為佢哋借入啲平嘅短期資金來俾高利息嘅長期頭寸提供資金。當長期部位有違約情況出現、短期利率升得太高，或者根本無人借長期貸款嘅時候，銀行可能無辦法履行佢嘅短期負債，最差嘅情況可能會破產，或者好似貝爾斯登咁要賣盤俾摩根大通（JPMorgan Chase & Co.）。

貨幣套息交易

貨幣套息交易（Currency carry trade）係一種無擔保嘅利息套利。「套息交易」呢個術語，最初係指貨幣套息交易：投資者藉入低收益貨幣，同時貸出（投資）高收益貨幣。傳統套息交易活動，受到全球金融同匯率嘅穩定影響。呢啲交易喺有利嘅融資條件之下，同埋金融市場波動性比較低嘅環境之中，會比較多；而喺全球流動性短缺期間，呢啲活動往往會比較少；但係套息交易經常都俾人話係造成貨幣價值快速崩潰同升值嘅原因。

套利交易嘅其中一個主要風險係外匯匯率嘅變化，呢啲變化可能導致投資者蝕本。如果有做孖展（margin trade），有可能會俾銀行要求補倉，甚至俾銀行 call loan（要求提早還錢），而被迫低價出售資產。理論上，根據利率平價（interest rate parity）理論，套利交易係唔可能可以賺到可預測嘅利潤，因為兩國嘅貨幣之間嘅利率差異應等於低利率貨幣相對於高利率貨幣升值嘅預期。但係，套利交易可能會削弱借入嘅貨幣，因為投資者會將借入嘅資金轉換成其他高息貨幣。

從1990年代中期以嚟，日本央行將日圓嘅利率設定喺一個非常低嘅水平，令到借入日圓嚟買其他貨幣嘅套息活動變成有利可圖，導致日圓嘅套利交易大幅增加。喺2007年初，估計大約有1兆美元押注咗喺日圓相關嘅套利交易。 喺2021至2024年嘅三年間，外國投資者借入嘅日圓貸款增加咗4,600億美元，達到1.8兆美元。

歐洲央行喺2015年12月延長咗量化寬鬆計畫。歐洲央行寬鬆嘅貨幣政策令到低收益嘅歐元成為風險資產投資者常用嘅融資貨幣。

大多數關於套利交易獲利能力嘅研究都係大約大嘅交易商，佢哋可以用到大量唔同嘅「貨幣對」（currency pairs）。 不過，小型零售交易者可以獲得嘅「貨幣對」種類有限，呢啲貨幣對主要都係G20國家嘅貨幣嘅組合，而且考慮埋各種成本同價差之後，收益率會低好多。

已知風險

2008年至2011年冰島金融危機（2008-2011 Icelandic financial crisis）嘅根源之一就係套利交易，喺2007 年初，冰島克朗俾《經濟學人》評為世界上最被高估嘅貨幣（基於巨無霸指數），加上喺2008年冰島想發展離岸金融中心，然後進一步引發咗大量嘅套利交易，好多人用歐元計價嘅貸款喺冰島買屋同其他資產，呢個做法等於做咗借歐元嚟買冰島資產嘅套利交易。當冰島克朗相對於歐元嘅價值大幅度貶值嘅時候，大多數貸款都會出現違約，導致3大銀行喺一個禮拜之內破產，冰島克朗兌歐元嘅匯率急跌40%，導致借咗歐元買屋或者其他冰島資產嘅人無辦法還到貸款，通膨率同利率躍升到18%，失業率從接近零增加到接近10%。

自從1990年代以嚟，美元同日圓一直都係套息交易嗰度最常用嘅貨幣。用宏觀經濟學嘅數學模型，可以睇到比較大嘅經濟體對套息交易嘅破壞性有更大嘅免疫力，呢點主要係由於大經濟體嘅貨幣流通量比較大，相對流通嘅貨幣量嚟講，外匯套息交易嘅比率唔大，但係2008年套息交易崩潰嘅原因，喺日本國內，一般都認為喺日圓嘅快速升值。 當貨幣升值，借入嗰種貨幣嘅人就有債務壓力，需要增加抵押，需要補倉，甚至需要將外國資產兌換成嗰種貨幣嚟還部分或者全部嘅債。呢種週期可能會加速貨幣估值嘅變動。如果出現大幅波動嘅時候，甚至可能會出現「利差交易反轉」（Carry Reversal）。 2008年嘅利差逆轉導致咗大幅信貸緊縮，引發咗2008年嘅全球金融危機，雖然利差交易同其他因素嘅相對影響有幾大，仍然存在一啲爭議。 類似嘅美元快速升值亦都同時發生咗，而套利交易好少俾人認為係引起呢啲升值嘅原因。

外部連結

• The Yen Carry Trade Revisited
• The Unwinding of the Carry Trade Has Finally Hit Currencies by Jeffrey Frankel, Harvard Kennedy School, Oct. 29, 2008
• The Effects of the Yen Carry Trade Unwinding
• "GETTING TECHNICAL: A Secret Time Bomb Made of Gold"
• An explanation of the carry trade
• Mother of all carry trades faces an inevitable bust by Nouriel Roubini, 1 Nov 2009
• Carry Trades and Speculative Dynamics by Guillaume Plantin and Hyun Song Shin, May 2010. Explains the dynamics of the carry trade by the example of Iceland and then goes on to develop a mathematical model for the exchange rate movements caused by carry trades.

延伸閱讀

• Lee, Tim; Lee, Jamie; Coldiron, Kevin (2020). The rise of carry : the dangerous consequences of volatility suppression and the new financial order of decaying growth and recurring crisis. New York. ISBN 978-1-260-45841-1. OCLC 1107844536.
• Read, Charles (2022). Calming the storms : the carry trade, the banking school and British financial crises since 1825. Cham, Switzerland. ISBN 978-3-031-11914-9. OCLC 1360456914.