女人街英文Ladies' Market)係香港登打士街亞皆老街嗰一段通菜街嘅俗稱,位於油尖旺區,係旺角嘅一個觀光購物地點同小夜市。

旺角女人街行人專用區

歷史

1970年代,香港有好多小販喺路邊無牌經營,除咗影響市容之外,亦為居民帶嚟不便甚至危險。為咗將佢哋規範化,市政局喺1975年3月14號喺九龍嘅20個地點推行「小販認可區」計劃。亞皆老街山東街嘅一段通菜街,就係第一個獲准成立嘅小販認可區,其後延長至登打士街。由於街道早期嗰啲攤檔售賣嘅物品,多數以女性服裝同女性用品為主,所以俗稱女人街。

現況

現時,女人街已經成為香港人同外地遊客嘅購物地點。而所售賣嘅物品亦已經趨向多元化,包括各種家居用品、男女服裝化妝品手袋手錶飾物玩具香薰等等。由於貨物都係價廉物美,所以能夠吸引大量人士到訪同購物。攤檔一般喺中午開營業至夜晚十一點為止。女人街外圍附近亦有唔少熟食檔同濕貨攤檔。

事件

韓國瑜搞烏龍用香港女人街照片做文宣

女人街算係亞洲其中一條最有名嘅香港街道,除咗香港亦有唔少台灣人認識。喺2021年8月8號,針對行政院規劃嘅振興「五倍券」,台灣前高雄市長韓國瑜喺Facebook呼籲政府能夠苦民所苦,體察民意。不過有網友發現,韓國瑜喺嗰篇文章嘅配圖竟然係香港女人街,引發熱議同揶揄[1]

出面網頁

參考

  1. "韓國瑜搞烏龍 批5倍券配香港女人街". tw.news.yahoo.com (中文). 喺2021-08-08搵到.