伊利沙伯二世登基白金禧年紀念

伊利沙伯二世登基白金禧年紀念喺2022年舉行，紀念英國女王伊利沙伯二世70年前喺1952年2月6號登基成為英國、海外領地、皇家屬地及其他英聯邦國家嘅君主。呢次紀念，係首次慶祝有英國君主登基70週年。英國因此享有多一日公眾假期，並將以往5月底放嘅春季公眾假期延至6月先放，形成一個四日長嘅週末連假，橫跨6月2號禮拜四到6月5號禮拜日。英國同英聯邦舉行咗一系列慶祝活動。

伊利沙伯二世登基白金禧年紀念
伊利沙伯二世
日期	2022年2月6號
國家	英國、加拿大、澳洲、紐西蘭、英聯邦
網站
platinumjubilee.royal.uk（英文）

澳洲

踏入2022年嘅第一日，澳洲總理史葛·摩利臣亦宣佈，將會為女王登基白金禧年舉行一系活動慶祝，致謝女王70年來為澳洲作出嘅貢獻。其中包括：發行紀念幣同紀念郵票、喺首都點烽火、將首都嘅楊樹島（Aspen Island）改名做伊利沙伯二世島。

加拿大

加拿大聯邦政府文化遺產部開放畀唔同嘅社區組織申請資助，舉行以社區為本嘅免費公眾活動來慶祝女王白金禧年。

英國

紀念幣

英國皇家鑄幣局推出兩款慶祝女王白金禧年嘅紀念幣，包括5英鎊同50便士幣值，依次更加係首次推出50便士幣值嘅皇室禧年紀念幣。紀念幣上刻有女王在位至今嘅年份，即係1952年至2022年。鑄幣局亦同一時間公佈另外三款新幣，包括兩款2英鎊同一款50便士硬幣，分別紀念已故發明家亞歷山大貝爾（ Alexander Graham Bell）、已故女星薇拉．琳恩（ Vera Lynn），同埋2022年喺英國伯明翰舉行嘅英聯邦運動會。五款新硬幣會共同組成皇家鑄幣局嘅年度硬幣套裝，並且喺2022年1月4號開始發售。皇家鑄幣局亦以紀念幣為本，推出唔同數量嘅限量版收藏裝。

紀念郵票

皇家郵政喺女王登基紀念日前兩日，即係2022年2月4號，推出一套八款嘅紀念郵票慶祝白金禧年。當中包括四張第一級郵費（first class）郵票，同另外四張1.7英鎊面額郵票。八款紀念郵票展示女王由1957年到2020年嘅相片。按慣常做法，特別郵票一般都會有女王嘅側影輪廓符號（silhouette），但依套紀念郵票就冇。皇家郵政解釋，因為依套郵票本身嘅設計已經包含咗女王嘅相，所以，女王嘅側影輪廓符號就唔需要有。

女王綠樹蔭植樹計劃

英國幾個環境保育團體聯同政府，共同發起名為「女王綠樹蔭（The Queen's Green Canopy）」嘅全國植樹計劃，鼓勵個人、私人企業、學校、社區組織等等，透過植樹為女王慶祝白金禧年，而且可以將植樹嘅數量、品種、位置等資料，放上女王綠樹蔭官方網站入面嘅互動地圖。女王亦同大仔查理斯王子率先喺2021年3月，一齊喺溫莎堡種落第一樖「白金禧年樹」。計劃會主力喺2021年同2022年嘅十月到第二年嘅三月植樹，因為秋冬係唔少植物嘅休眠（dormant）時期，搬運及植樹過程中受傷嘅機會相對較低。

皇家住所特別展覽

女王嘅皇家住所舉辦咗特別展覽，包括白金漢宮、溫莎堡同荷里路德宮。女王嘅肖像、珠寶頭飾以及馬車會喺白金漢宮展出。溫莎堡會展出女王嘅加冕禮服。荷里路德宮就會展示女王喺銀禧年、金禧年同鑽禧年着過嘅衫。

白金禧年長週末

英國會喺6月2號禮拜四到6月5號禮拜日，連放四日嘅長週末，並舉行一系列慶祝活動。

6月2號禮拜四

• 女王生日巡遊

按傳統，軍方會喺女王生日當日舉行巡遊（Parade），當中又以軍旗敬禮分列式（Trooping the Colour）最為出名，到時預計會有約1,400名士兵，200名騎兵同400名軍樂手參與。巡遊會由白金漢宮開始，經過林蔭大道（The Mall）前往騎兵衛隊閱兵場（Horse Guards Parade），皇室成員更會騎馬加入巡遊隊伍當中。女王其實年輕時都會騎馬出席，但近年改為坐馬車。最後，空軍會派出軍機進行空中分列敬禮（flypast），而女王同皇室成員則會喺白金漢宮露台觀禮。

• 白金禧年烽火儀式

英國上傳統會就皇家禧年、婚禮及加冕舉行點烽火儀式（lighting of beacons），女王登基白金禧年自然唔會少，到時英國、海峽群島、馬恩島及海外領地都會舉行烽火儀式。而今年，更加係首次每個英聯邦國家嘅首都地區都會參與烽火儀式慶祝白金禧年。

6月3號禮拜五

聖保羅大教堂為女王舉行咗特別感謝崇拜儀式。

6月4號禮拜六

• 葉森打吡大賽

葉森馬場（Epsom Downs Racecourse）舉行咗葉森打吡大賽（the Derby），有皇室成員出席，但女王因為健康原因缺席。

• 白金漢宮派對

英國廣播公司喺白金漢宮舉行咗特別演奏會，邀請娛樂名星表演，慶祝女王登基70年。英國公眾亦可以報名抽籤門票出席依次演奏會。

6月5號禮拜日

• 大晏晝餐

自2009年，每年6月，英國各地都會稱為「大晏晝餐（the Big Lunch）」嘅社區聚餐活動，畀居民相聚一齊，分享美食，希望透過聚餐，加深互相了解同鄰里關係。而女王白金禧年嘅大晏晝餐活動，規模比之前更加盛大。

• 白金禧年盛裝慶典

白金漢宮外面舉行咗盛裝慶典（pageant），從英聯邦各地邀請超過5,000人，身穿唔同服飾，進行各種唔同表演。