姓氏

姓氏，泛指用來分辨人嘅宗族嘅名稱呼。喺秦漢之前嘅中國，姓同氏係唔同一回事嘅。先有姓，再有氏。

「姓」爾個字最初嘅意思係「女人生嘅後代」。上古時代嘅中國係母系社會，「只知其母而不知其父」，因此仔女個姓係跟老母個姓嘅。旁證之一就係上古時代嘅大姓，包括「姬」、「姒」、「媯」、「姚」、「姜」同「嬴」等，都係「女」字旁嘅。後來中國發展到父系社會時期之後，越來越多人開始跟老頭個姓。大家族嘅後代開始散居各地之後，散居各地嘅分支隨徂保留自己嘅姓之外，重會另外起一個「氏」，以講明自己來自焉個家族嘅焉個分支。以姜子牙為例：姜子牙個姓係「姜」，個氏係「呂」，個名叫做「尚」（一說「望」），個字叫做「子牙」，所以姜子牙就係來自「姜」爾個大家族嘅「呂」爾個分支嘅阿尚，全名係「姜呂尚」（一說「姜呂望」）。姓產生之後，世代相傳，一般唔會更改，比較穩定。而氏就會隨著封邑、官職嘅改變而改變，因此一個人嘅後代可能有幾個氏，而父子兩代亦都可能唔同氏。另外，唔同姓之間可能會以同樣嘅方式起氏，因此唔同姓嘅人可能都會同氏。

喺夏商周時期，氏唔單止係宗族嘅標誌，重係社會地位嘅標誌：貴族有姓有氏，平民有名無氏。另外，由於怕近親通婚生出有遺傳病嘅後代，同姓嘅人唔可以通婚，就算係同姓唔同氏都唔可以通婚，但係同氏唔同姓就可以通婚。

春秋戰國時期，由於宗法制度瓦解，姓同氏之間嘅界限越來越模糊，而之前有名無氏嘅平民都開始有氏。到徂秦漢時期，姓同氏合而為一，但係之後嘅中國社會依然保留徂「同姓唔可以通婚」爾條規矩，而由於姓氏唔再區分得到，同氏唔同姓嘅人都唔可以再通婚。到徂近代，爾條規矩先至慢慢被人打破，但係重有好多保守嘅華人反對仔女同同姓嘅人通婚。

睇埋

• 姓
• 氏