姬宮湦

周幽王（前795年—前771年，前782年至前771年在位），真名姬宮湦（湦讀笙，sang1），係西周第十二代兼最後一代天子（君主），在位十一年。佢係周宣王個大仔。佢同桀、商紂王一樣，沉迷女色，敗壞朝政，係古代中國史上出名嘅暴君。

早年經歷

周幽王二年（前781年），關中大地震，西周嘅老百姓認為呢個係西周滅亡嘅先兆。周幽王三年（前780年），絕世靚女褒娰入宮做周幽王嘅妃子，冇幾耐褒娰大肚，生咗伯服。周幽王好冧褒娰，伯服出世之後，周幽王廢咗嗰陣時嘅王后申后同埋嗰陣時嘅太子宜臼（即係第時嘅周平王），改立褒娰做王后、伯服做太子。

烽火戲諸侯

話說褒娰唔鍾意笑，周幽王為咗氹褒娰開心，諗到烽火戲諸侯呢條橋。周幽王喺個烽火台到點火，啲諸侯見到，以為西周王畿俾外敵入侵，即刻派軍隊去救周幽王。啲諸侯到咗之後，先發現自己俾周幽王玩，當場嬲爆。褒娰見到佢哋個樣，終於笑。

周幽王十一年（前771年），戎族入侵西周，周幽王去烽火台點火，結果班諸侯以為周幽王又玩佢，一個諸侯都冇去救佢。最後，周幽王、褒娰同伯服都俾戎族殺死，西周滅亡。

家室

后妃

1. 申后
2. 褒娰

仔

1. 周平王宜臼
2. 伯服

弟

1. 余臣，即周攜王，被虢公翰等擁立做王，同周平王作對。

攷

• 《史記》周本紀