維基百科

姬絲汀娜葛美

姬絲汀娜 葛美（英文：Christina Victoria Grimmie，1994年3月12號—2016年6月10號）係美國創作女歌手，起初喺YouTube上載多首翻唱流行歌曲而開始為人認識，其後參加NBC真人騷歌唱比賽《完美SING戰》更加聲名大噪。喺2011年6月，佢發表咗佢第一張嘅個人專輯《Find Me》，而第二張專輯《With Love》及第三張專輯《Side A》分別於2013年及2016年發表。

Christina Grimmie
2014年嘅演唱
女歌手
國籍美國
出世1994年3月12號
美國新澤西州Marlton
死2016年6月10號（22歲）[1]
美國佛羅里達州奧蘭多
死因中槍身亡
墓地美國新澤西州南部[2]
活躍年代2009 - 2016
唱片公司Creative Artists Agency、Island Records
網站官方網站
相關團體Adam Levine、Before You Exit、Selena Gomez

2014年，Christina Grimmie 參加咗《完美Sing戰》嘅第6季賽事，並奪得第3名。身為佢歌唱導師嘅Adam Levine雖然對賽果表示遺憾，但同時都宣佈會簽Christina成為佢唱片公司222 Records 旗下嘅歌手。同時，Lil Wayne 都有邀請Chritina加盟其唱片公司 Young Money Entertainment。但最後Chritina揀咗加入Island Records唱片公司。

2016年6月10號，Christina Grimmie完咗佢同Before You Exit 樂隊嘅共同演出之後，喺同Fans見面同簽名嘅時候畀狂迷Kevin James Loibl用槍射中，送院後證實不治。

早年生活

編輯

Christina Grimmie 雙親係Tina同Albert Grimmie，同時有一位大佢一年嘅哥哥Marcus。Christina 媽媽喺2014年診斷到有乳癌之前係一個接待員，同年佢爸爸就喺威訊通信公司（Verizon Communications）工作[3]。

Christina Grimmie 係意大利人同羅馬人嘅混血兒[4]，喺新澤西州嘅Marlton長大，分別就讀浸信會分區小學（Baptist Regional Elementary School）以及Cherokee High School中學[5][6]。

唯獨佢喺2010年嘅高中第三年班就喺屋企自學[7]。

喺Christina 6歲嗰時，俾爸爸發現佢有唱歌嘅天份[8]，之後十歲開始彈琴[9]。雖然有去學彈琴，但佢表示主要都係靠聽然後自己用鋼琴演奏出嚟[8]。

另外，Christina 表明自己係一個基督徒[10]，佢全家未搬去洛杉磯之前一直都有去一間叫Fellowship Alliance Church嘅教堂[3]。

音樂生涯

編輯

2009 - 10: YouTube發跡及被賞識

編輯

Christina Grimmie 由2009年開始上載翻唱流行歌曲短片至YouTube，當時佢只得15歲。第一段佢上載嘅影片係翻唱孟漢娜（Hannah Montana）嘅Don’t Wanna Be Torn[6]。而佢其後喺同年8月另一首翻唱自Miley Cyrus嘅 Party in the U.S.A. 令佢開始備受關注[11]。

而另一個突破係Christina同另外兩位Youtuber Sam Tsui 同埋Kurt Hugo Schneider 合作製作嘅翻唱歌，Nelly嘅 Just a Dream；錄得合共超過1億3千5百萬嘅點擊率[12]。

截至2013年4月28號，Christina Grimmie 嘅影片已經有超過3億7千5百萬嘅點擊率以及超過2百萬嘅頻道訂閱者，令到佢當時成為YouTube上第四多訂閱者嘅音樂人。佢甚至喺MyYouTube比賽入面擊敗Rihanna，Nicki Minaj，Justin Bieber等人，奪得亞軍，僅次於Selena Gomez。

隨著佢喺YouTube上嘅成功，Christina畀Selena Gomez 阿媽Mandy Teefey 同佢繼父Brian賞識，並決定做Christina嘅經理人[13]。

喺2010年嘅10月，Christina 參演Selena Gomez主演嘅聯合國兒童基金會慈善演唱會（UNICEF’s Trick of Treat Concert）[14][15]。除咗演唱自己嘅歌曲外亦都有為Selena Gomez & the Scene 和音。

2011: Find Me

編輯

喺2011年，一個啱啱成立專為YouTuber 音樂人而設嘅DigiTour演唱會上，Christina亦有參與其中。其後Selena更成為咗佢嘅導師。

其後佢更加上咗美國權威音樂雜誌Billboard當時排行榜50名之內[16]。

同年，Christina 做咗希望演唱會（Concert of Hope）嘅其中一位演唱者。

隨後佢喺Selena Gomez & the Scene 嘅We Own the Night Tour巡迴演唱會中做開場嘉賓，並跟住佢哋巡迴咗6個禮拜[17]。

2011年6月14號，Christina出咗佢第一張個人專輯Find Me。而第一首單曲Advice亦都喺11號喺迪士尼電台（Radio Disney）首播[18]，並喺7月將MV上傳去佢自己嘅YouTube頻道。其後佢亦受到迪士尼頻道（Disney Channel）嘅邀請於新一輯嘅綜藝節目So Random!中演唱Advice呢一首歌[19]。

同年10月10號，佢同另一位YouTuber兼好朋友Tyler Ward上咗一個美國清談節目The Ellen DeGeneres Show，並即場演唱Lil Wayne 嘅How to Love[20]。而其後嘅11月20號，Christina受邀出席到第三十九屆全美音樂獎（39th American Music Awards of 2011），佢分別聯同Taio Cruz喺開幕嗰時演唱改編版嘅Higher以及紅地毯時段聯同Selena Gomez & the Scene演唱自己嘅歌Not Fragile。

另外，佢同Selena Gomez & the Scene一齊拍咗一個為Xbox新出嘅感應器Kinect做宣傳嘅廣告[21]。

2012 – 13: With Love

編輯

2012年嘅1月，Christina由新澤西洲搬去洛杉磯去追求佢嘅歌唱事業，喺4月初佢簽咗一間叫Creative Artists Agency嘅經理人公司。

同年嘅3月29號至6月5號期間，佢喺迪士尼嘅官網（Disney.com）主持一個網上節目名為Power Up: with Christina Grimmie。佢同時又透露佢將會同一個嚟自新澤西州，同為Marlton出身嘅新興少年樂隊Rising Tide合作[22]。

其後，Christina為Selena Gomez嘅巡迴演唱會Stars Dance Tour喺北美部分嘅場次擔任開場演唱嘉賓[23]，演唱佢喺2013年8月6號發行嘅第二張專輯With Love入面嘅歌。

2013年10月3號，Christina 其中一首歌Tell My Mama嘅MV喺美國權威音樂雜誌Billboard嘅官網（Billboard.com）進行獨家首播。Christina話呢首歌係關於一個咩都會話俾媽媽知嘅女仔喺學校鍾意咗一個似乎係危險分子嘅男仔[24]。

2014: 完美Sing戰

編輯

Christina Grimmie喺佢自己嘅Facebook 度透露自己已經參加咗全國廣播公司（NBC）舉辦嘅真人騷歌唱比賽《完美Sing戰》（The Voice）嘅第6季[25]。

依照呢個節目嘅傳統，一開始會有一個盲眼海選（Blind Auditions），參選者會進行演唱，四位導師會背對參選者純粹以聽覺去進行海選，並喺參選者當中挑選成員組成隊伍，然後進行比賽。如果導師對選手有興趣嘅話，就可以去撳掣將張凳面向返選手，並顯示「我想要你」（I WANT YOU）呢幾個字。

如果無導師轉身，表示嗰個選手已經畀人淘汰；得一個導師想要嘅話就自動加盟嗰位導師嘅隊伍；但若然有多位導師轉身表示想要呢位選手嘅話，就會由選手自行決定加入邊一隊。

而Christina喺呢個盲眼海選嘅環節入面，演唱Miley Cyrus嘅熱門歌Wrecking Ball；四位導師全部都轉身表示想要佢加入自己嘅隊伍。呢四個導師分別係Adam Levine、Usher、莎結拉（Shakira）同埋Blake Shelton。

結果Christina揀咗加入Adam Levine嘅隊伍[26]，並最終奪得季軍。冠軍同亞軍分別係Josh Kaufman同Jake Worthington[27]。

2014 – 16: 《完美Sing戰》後續、出道

編輯

喺《完美Sing戰》期間，Christina嘅導師Adam Levine表示自己想簽Christina成為佢間唱片公司222 Records旗下嘅歌手；同時知名歌手Lil Wayne亦表示有興趣簽Christina 去自己嘅唱片公司Young Money Entertainment。但Christina自己最終揀咗同Island Records呢間唱片公司簽約[28]。

另外，《完美Sing戰》延續一貫嘅作風，搞咗個2014暑期巡迴演唱會（The Voice of Summer Tour 2014），喺2014年6月21號由德州聖安東尼奧出發。當中嘅表演者除咗Christina之外，重包括第5季嘅冠亞季Tessanne Chin、Jacquie Lee、Will Champlin、第1季嘅亞軍Dia Frampton、第6季嘅最後入圍Kristen Merlin以及Jake Barker。

同期，Christina除咗錄製佢個人嘅《完美Sing戰》專輯之外（The Complete Season 6 Collection (The Voice Performance)），重預期會喺同年7月推出新單曲[29]。

隨後，佢透過Facebook宣佈自己會喺7月6號開始拍攝新單曲嘅歌詞版MV[30]；而喺11號，佢宣佈新單曲名為Must Be Love[31]；15號嘅時候，佢透過一個直播頻道宣佈呢首歌會喺月尾31號發行[32]。呢首歌係由Elof Loelv監製，喺位於佐治亞州亞特蘭大嘅ZAC Recording錄音室度錄製[33]。

2015年3月4號，Christina宣佈由於所屬唱片公司Island Records當時有太多知名歌手要跟進，但又唔想擺Christina入雪櫃，所以決定放佢自由。喺Christina畀Island Records踢出公司嘅同時，佢亦都籌備緊嚟緊年尾將會出嘅新專輯[34]。

而新單曲Cliché率先喺同年3月16號推出；其後4月27號再推出新一首單曲Stay With Me，呢首歌係同Diamond Eyes合作製作嘅，當時重獲得iTunes電子音樂排行榜上嘅第五名嘅佳績[35]。其後重畀一個收錄年度最佳電子舞音嘅專輯2015 UFK Dubstep所收錄[36]。

另外，Christina參加咗一個由美國電台iHeartRadio舉辦嘅明日之星比賽iHeartRadio/Macy’s Rising Star Content；同年5月27號，iHeartRadio正式宣佈Christina 贏咗，並且將會參與旗下喺9月舉辦嘅音樂節2015 iHeartRadio Music Festival[37]。

直到7月2號，Christina再次推出新單曲Shrug；另外，佢喺9月同其他15位國際歌手例如保羅麥卡尼合作錄製咗一首關於地球氣候危機嘅歌Love Song to the Earth[38]。

2016年2月21號，Christina發行咗佢第四張專輯Side A，表示係A碟咁解，同時暗示會有B碟Side B嘅嚟臨。

喺2月同3月期間，佢為Rachel Platten嘅Wildfire Tour巡迴演唱會做開場嘉賓，初次公開演唱佢Side A入面嘅歌。

喺其中一條Christina被殺前嘅訪問入面，佢表示希望可以喺年尾之前推出第二張完整長度嘅專輯（即音樂總長度為40分鐘或者包含10首歌以上）[39]。

另外佢將會喺年尾上映嘅電影The Matchbreaker入面參演，呢套戲已經喺2015年拍完[40][41]。

歌喉評價及主要影響者

編輯

Christina屬於女高音，音域橫跨三個八度[42]。喺2014年嘅《完美Sing戰》期間，其中一個導師Usher稱佢為「小絲蓮」（baby Céline Dion）；而另一位導師莎結拉（Shakira）更加表示Christina嘅高音係天籟之音。另外，知名音樂人Graham Nash就表示「一個只得20歲嘅女仔，居然可以擁有咁闊嘅音域而且重要收放自如，真係好勁好癲。」[43]。

Christina自細就聽住基督徒兼歌手Stacie Orrico嘅歌長大，佢曾經講過「佢（Stacie Orrico）嘅歌聲好有魅力，深深吸引住我。我諗我之所以擁有一把扣人心弦嘅歌聲都係因為自細受佢嘅歌嘅薰陶。佢對我真係有好大影響，我好想可以唱到好似佢咁好，甚至我寫歌嘅時候覺得佢都會創作類似嘅歌。」

另外佢表示對於自己嘅歌聲有最大影響嘅人係Christina Aguilera；佢亦話過自己好欣賞Beyoncé嘅歌聲。

音樂類型方面，Christina鍾情嘅音樂類型其實好廣，除咗鍾意Christina Aguilera嘅所有歌之外，佢亦都表示自己比較鍾意DJ音樂、迴響貝斯（Dubstep）、樂與怒搖滾同重金屬音樂，例如Metallica、Pantera、Iron Maiden、Tool呢幾個樂隊嘅歌[44]。

逝世

編輯

2016年6月10號，Christina俾一個嚟自佛羅里達州聖彼得斯堡[1]，27歲名為Kevin James Loibl嘅男人用槍射中。

當時佢啱啱完咗佢同Before You Exit喺奧蘭多The Plaza Live 劇院度合演嘅演唱會，然後進行緊一個同Fans見面嘅活動。突然就畀Kevin James Loibl射咗三槍，隨後立即送到醫院搶救；但搶救失敗，喺當地時間夜晚差唔多11點宣佈死亡[1]。

而個殺人兇手當時立即畀Christina嘅阿哥Marcus撲上去制伏咗，重用槍自殺埋[45][46]。

奧蘭多警察局指兇手之前並未有任何犯罪紀錄，而且都唔見得同Christina有任何私底下嘅聯絡[47]。但就查到佢係極度迷戀Christina，曾經試圖減肥、植髮、割雙眼皮等手術諗住去吸引Christina嘅注意[45]。

當局嘅發言人就表示調查到個兇手係蓄意嚟到奧蘭多犯案，佢當時身上帶住兩把手槍，兩排子彈同一把獵刀[1][48]；而佢屋企人話唔知佢有去奧蘭多嘅計劃同身上帶有槍械[45]。

隨著Christina逝世嘅消息公佈後，有好多名人喺Twitter發文哀悼。例如：

《完美Sing戰》官方Twitter「對於失去一個有美妙歌聲又心地善良嘅女仔，我哋根本無法言喻呢種傷痛。」[49]；

佢當時嘅教練Adam Levine寫話佢同佢老婆「徹底地心碎，悲痛欲絕……呢件係一件毫無道理可言嘅極度暴力行為。我除咗震驚之外重好疑惑究竟點解同類型嘅事可以持續發生？」[50][2]；

長期嘅好友兼前巡迴演唱會拍檔Selena Gomez寫「我個心已經粉碎咗，我好掛住你，Christina。」[51]；

當晚同Christina一齊表演嘅Before You Exit樂隊發文表示「今日我哋失去咗一個天使，一個細妹，一個心愛嘅朋友。」[52]。

喺6月16號，Christina被安排喺家鄉一個私人葬禮度下葬[2]，而翌日喺Medford搞嘅公開追悼會就有數以千計嘅朋友同Fans出席追悼[53]。

影響

編輯

Christina嘅死除咗令成千上萬嘅Fans悲痛欲絕之外，重對藝人嘅安全有極大嘅警剔。

美國重金屬樂隊Pantera表示今次呢單槍擊案同前Pantera結他手Darrell Abbott及另外三名在場人士喺2004年受襲事件好相似，促請各表演單位及場地保安加強保安措施以確保藝人嘅人身安全。「對於呢啲持槍極端分子，一定要做返啲嘢，如果唔係就會有更多嘅明日之星有同樣下場。」[54]。

事發當時Selena Gomez正喺距離案發現場幾英里外嘅安麗中心（Amway Center）道演唱緊，收到消息後佢傷心之餘重將第二晚將會喺邁亞密舉行嘅演唱會中其中一個同Fans見面嘅環節取消[55]。

案發場地The Plaza Live四日後重開場館，重主動邀請當地警察去評估佢哋嘅保安措施[56]。

部分喺拉斯維加斯嘅歌手，包括同樣係《完美Sing戰》第6季嘅選手Cali Tucker喺表演完畢後都被護送離開[57]。

而喺加州，一個主要針對網上影片嘅媒體VidCon亦都因為Christina 被槍擊呢件事而宣佈加強保安系統[58]，包括會加裝金屬探測器同保安人員數量，甚至會禁止一啲非正式未經申請嘅見面活動，以確保藝人嘅人身安全[59]。

另外，部分Youtuber例如Joey Graceffa甚至決定聘請私人保鑣[58]。

某位業界律師表示雖然金屬深測器又貴又唔受歡迎，但呢個就係新嘅趨勢[60]。

同年6月23號，美國權威音樂雜誌Billboard發表咗一篇文章，題名為「一封致國會嘅信：立即停止槍擊案」要求對每位買槍械嘅人士進行背景審查，並有權唔賣畀任何可疑人物。Billboard嘅編輯話過度放寬嘅槍械管制同Christina嘅死以及另一單奧蘭多嘅夜店槍擊案有莫大嘅關係。呢篇請願信有接近200位音樂業界名人簽名支持，包括藝人Billy Joel、Cher、Jennifer Lopez、Lady Gaga、披頭四剩低嘅成員、製作人Daniel Glass、Irving Azoff同埋Russell Simmons[61]。

音樂作品

編輯

專輯

編輯
Find Me
  • 2011年6月14號
  • CD、網上下載
With Love
  • 2013年8月6號
  • CD、網上下載
The Complete Season 6 Collection (The Voice Performance)
  • 2014年5月20號
  • Republic Records
  • 網上下載
Side A
  • 2016年2月21號
  • LH7 Management
  • 網上下載

單曲

編輯
歌名 年份 收錄專輯
Advice 2011 Find Me
Liar Liar
Tell My Mama 2013 With Love
Wrecking Ball 2014 The Complete Season 6 Collection

(The Voice Performance)

I Knew You Were Trouble
Counting Stars
I Won't Give Up
Dark Horse
Hold On, We're Going Home
How to Love
Hide and Seek
Some Nights
Can't Help Falling in Love
Somebody That I Used to Know

(Christina Grimmie & Adam Levine)

Must Be Love 無收錄喺任何專輯
Cliché 2015
Stay with Me
Shrug
Love Song to the Earth

(Paul McCartney, Jon Bon Jovi, Sheryl Crow, Fergie,

Colbie Caillat, Natasha Bedingfield, Leona Lewis,

Sean Paul, Johnny Rzeznik, Krewella, Angélique Kidjo,

Kelsea Ballerini, Nicole Scherzinger, Christina Grimmie,

Victoria Justice, Q'orianka Kilcher)

其他歌曲

編輯
歌名 年份 收錄專輯
What a Girl Is

(Dove Cameron, Christina Grimmie,

Baby Kaely)

2015 Liv and Maddie: Music from the TV Series

Music Video (MV)

編輯
年份 歌名 導演
2011 Advice Sean Babas
2013 Tell My Mama David Turvey
2015 What a Girl Is 未知

獎項及提名

編輯
年份 獎項 競逐類別 結果
2011 全美音樂獎

(American Music Awards)

New Media Honoree

(Female)

得獎[62]
2013 迪士尼電台音樂獎

(Radio Disney Music Awards)

Biggest Viral Artist 提名
2014 年輕荷里活藝人頒獎禮

(Young Hollywood Awards)

Viral Superstar 提名
2014 新世代之選頒獎禮

(Teen Choice Awards)

Choice Web Star: Music 提名
2015
2015 iHeart明日之星

(iHeart Radio Rising Star)

iHeart Contest 得獎
2016 新世代之選頒獎禮

(Teen Choice Awards)

Choice Web Star: Music 得獎[63]

巡迴演唱會

編輯

擔任開場嘉賓

編輯
  • DigiTour (2011)
  • Selena Gomez & the Scene - We Own the Night Tour (2011)
  • Selena Gomez - Stars Dance Tour (2013)
  • iHeartRadio Music Festival (2015)
  • Rachel Platten - The Wildfire Tour (2016)
  • Before You Exit - All The Lights Tour (2016)

公開巡迴演唱會

編輯
  • 完美Sing戰 - 暑期巡迴演唱會 (2014)
  • Before You Exit - January and February UK/ Europe Tour (2015)

參考

編輯
  1. ↑ 1.0 1.1 1.2 1.3 Dendy, Michelle (June 22, 2016). "Friend: Shooter had fixation on 'The Voice' singer". WKMG-TV.
  2. ↑ 2.0 2.1 2.2 Bendlin, Karli (June 17, 2016). "Christina Grimmie Buried In Her Beloved New Jersey Hometown". The Huffington Post.
  3. ↑ 3.0 3.1 Terruso, Julia (May 19, 2014). "For South Jersey's Christina Grimmie, 'The Voice' is a dream come true" 互聯網檔案館嘅歸檔，歸檔日期2016-08-20.. The Philadelphia Inquirer.
  4. ↑ zeldaxlove64 Christina Grimmie (July 31, 2013). "LIVE Q&A Listening Party w/Surprise! 4PM PST". Youtube.
  5. ↑ Wood, Steve (May 5, 2014). "S.J. native shines on The Voice". Courier-Post (South Jersey).
  6. ↑ 6.0 6.1 Linnehan, Robert (January 26, 2011). "Marlton singer taking her talents to L.A."(PDF). The Marlton Sun. p. 2. Archived from the original (PDF) on November 9, 2013.
  7. ↑ goomradio (August 19, 2010). "Christina Grimmie Interview on Goom Radio". YouTube.
  8. ↑ 8.0 8.1 Levy, Mallory (June 10, 2011). "Exclusive Interview with Christina Grimmie" 互聯網檔案館嘅歸檔，歸檔日期2016年6月14號，.. Joonbug.com.
  9. ↑ "About" 互聯網檔案館嘅歸檔，歸檔日期2014年9月1號，.. ChristinaGrimmie.com (official website).
  10. ↑ Sands, Nicole; Chiu, Melody (June 14, 2016). "Christina Grimmie 'Had the Biggest Heart Known to Mankind' When It Came to Her Fans, Says Close Friend Bria Kelly". People.
  11. ↑ Staff (May 20, 2014). "7 things you need to know about localVoice finalist Christina Grimmie". The Philadelphia Inquirer.
  12. ↑ Schneider, Kurt Hugo (November 20, 2010). ""Just A Dream" by Nelly – Sam Tsui & Christina Grimmie". YouTube. Grimmie, Christina (November 20, 2010). ""Just A Dream" by Nelly – Sam Tsui & Christina Grimmie". YouTube.
  13. ↑ Geffen, Sasha (June 13, 2016). "Looking Back On Selena Gomez and Christina Grimmie's Lasting Friendship" 互聯網檔案館嘅歸檔，歸檔日期2020年11月12號，.. MTV News.
  14. ↑ Peel, Sarah (October 30, 2010). "Christina Grimmie UNICEF Performance – Selena Gomez Introduction". BSCkids.com. Archived from the original on March 20, 2012.
  15. ↑ "Christina Grimmie Opens for Selena Gomez Tonight!" 互聯網檔案館嘅歸檔，歸檔日期2012年3月15號，.. Fanlala.com. October 26, 2010.
  16. ↑ Caulfield, Keith (January 13, 2011). "A Canoodling Justin Bieber Bullets to No. 1 on Social 50 Chart; Snoop's 'Wet' Rise; Christina Grimmie YouTube Phenom" 互聯網檔案館嘅歸檔，歸檔日期2018年5月5號，.. Billboard.
  17. ↑ Staff (June 2, 2011). "Exclusive Interview: Christina Grimmie". Seventeen.
  18. ↑ "MAJOR UPDATE! Album on June 13th Dudes!!". YouTube.
  19. ↑ "Christina Grimmie Performs On ‘So Random!’". ClevverTV. December 7, 2011. Archived from the original on May 14, 2012.
  20. ↑ "Christina Grimmie Performs 'How to Love' – The Ellen DeGeneres Show" 互聯網檔案館嘅歸檔，歸檔日期2011年10月12號，.. Ellen.warnerbros.com.
  21. ↑ Cheung, Nadine (November 11, 2011). "Selena Gomez and the Scene Star in New Xbox Kinect Commercial With Christina Grimmie". Cambio.
  22. ↑ Kaur, Jaskiran (February 27, 2014). "The Voice2014: Christina Grimmie Talks about Blind Audition; Things to Know ...". Archived from the original on October 9, 2014.
  23. ↑ Staff (May 22, 2013). "Christina Grimmie Will Join Selena On Her 'Stars Dance' Tour!". Archived fromthe original on May 22, 2015.
  24. ↑ Lipshutz, Jason (October 3, 2013). "Christina Grimmie, "Tell My Mama": Exclusive Video Premiere".Billboard.com
  25. ↑ "Christina Grimmie on Facebook".
  26. ↑ Christina Grimmie Audition: "Wrecking Ball" (The Voice Highlight) on YouTube
  27. ↑ Romano, Nick (June 11, 2016). "The Voice: Remembering season 6 contestant Christina Grimmie". Entertainment Weekly.
  28. ↑ "NBC’s ‘The Voice’ alum Christina Grimmie signs with Island Records". July 4, 2014.
  29. ↑ "Ever-evolving Christina Grimmie working on 'Voice' tour, new music". July 4, 2014.
  30. ↑ "Christina Grimmie on Facebook".
  31. ↑ "Christina Grimmie on Facebook".
  32. ↑ "Christina Grimmie "Must Be Love" (Official Lyric Video Premiere)" Archive.is嘅歸檔，歸檔日期2014年7月18號，.
  33. ↑ ""Must Be Love" In Studio – A Sneak Peak at the NEW Single (Coming July 31st)".
  34. ↑ "Voice USA pop sensation Christina Grimmie on why she won't get undressed to impress". March 4, 2015.
  35. ↑ "Instagram". Instagram.
  36. ↑ ""UKF Dubstep 2015 (Album Mix)"". 原著喺2016年4月28號歸檔. 喺2016年6月25號搵到.
  37. ↑ "Christina Grimmie" 互聯網檔案館嘅歸檔，歸檔日期2015年9月8號，.. Macy's iHeartRadio Rising Star.
  38. ↑ Mitchell, Gail (September 3, 2015). "Paul McCartney, Jon Bon Jovi & More Sing a 'Love Song to the Earth' to Support Climate Action". Billboard.
  39. ↑ Ramanand, Liz (June 7, 2016). "Singer Christina Grimmie Talks ‘Side A,’ ‘The Voice’ + More [Interview"]. PopCrush.
  40. ↑ McConiga, Rimsie (August 15, 2015). "Q5: Lights, camera, action" 互聯網檔案館嘅歸檔，歸檔日期2019年12月6號，.. Leavenworth Times. p. 1.
  41. ↑ McConiga, Rimsie (August 15, 2015). "Q5: Lights, camera, action". Leavenworth Times. p. 2.
  42. ↑ "Vocal Profile and Range: Christina Grimmie". Critic of Music. August 11, 2013.
  43. ↑ Yahr, Emily (June 13, 2016). "This is why Christina Grimmie stood out on ‘The Voice,’ above the thousands who audition". The Washington Post.
  44. ↑ jgardiner (May 24, 2011). "Christina Grimmie: A Real Depiction Of A Jersey Shore Native (EXCLUSIVE)".GlobalGrind. pp. 4–5.
  45. ↑ 45.0 45.1 45.2 Tziperman Lotan, Gal (June 22, 2016). "Police: Man who killed singer Christina Grimmie was 'infatuated' with her". Orlando Sentinel.
  46. ↑ Dineen, Caitlyn (June 11, 2016). "Motives still unknown in slaying of singer Christina Grimmie".Orlando Sentinel.
  47. ↑ Winsor, Morgan (June 11, 2016). "Gunman Who Killed The Voice Singer Christina Grimmie Traveled to Orlando to Shoot Her, Police Say" 互聯網檔案館嘅歸檔，歸檔日期2016年6月25號，.. ABC News.
  48. ↑ Jagannathan, Meera; Brown, Stephen Rex (June 11, 2016). "Killer of The Voice star Christina Grimmie drove to Orlando armed with two guns, hunting knife".New York Daily News.
  49. ↑ "Former Voice contestant Christina Grimmie shot dead in Orlando". BBC News. June 11, 2016.
  50. ↑ Heller, Corinne (June 11, 2016). "Christina Grimmie Shot Dead at 22: The Voice Family and Other Stars Pay Tribute". E! News.
  51. ↑ Romano, Nick (June 11, 2016). "Selena Gomez responds to Christina Grimmie's death: 'My heart is broken'". Entertainment Weekly.
  52. ↑ Chiu, Melody (June 11, 2016). "Christina Grimmie Shot Dead After Concert with Before You Exit: 'Today We Lost an Angel, Sister and a Beloved Friend', Says Band". People.
  53. ↑ Staff (June 18, 2016). "Thousands say farewell to slain Voice singer Christina Grimmie". Associated Press.
  54. ↑ Kaufman, Gil (June 13, 2016). "Pantera Calls On Club Owners & Promoters to Beef Up Artist Security After Christina Grimmie Murder". Billboard.
  55. ↑ Rosenbloom, Alli; Vulpo, Mike (June 11, 2016)."Selena Gomez Cancels Meet-and-Greets at Miami Concert Following Christina Grimmie's Death". E! News.
  56. ↑ Cridlin, Jay (June 15, 2016). "Orlando's Plaza Live to resume concerts following Christina Grimmie shooting" 互聯網檔案館嘅歸檔，歸檔日期2016年6月16號，.. Tampa Bay Times.
  57. ↑ Elfman, Doug (June 17, 2016). "Vegas entertainers receive more protection after Christina Grimmie’s death". Las Vegas Review-Journal.
  58. ↑ 58.0 58.1 Pierson, David (June 18, 2016). "Christina Grimmie's murder is shaking the bond between fans and YouTube stars". Los Angeles Times.
  59. ↑ Jarvey, Natalie (June 13, 2016). "Voice Singer & YouTuber Christina Grimmie's Murder Prompts Tighter VidCon Security". Billboard.
  60. ↑ Gensler, Andy; Waddell, Ray (June 13, 2016). "'This Is the New Reality': Artists & Concert Execs Weigh In on Security Challenges After Orlando". Billboard.
  61. ↑ Editors (June 23, 2016). "An Open Letter to Congress from the Music Industry". Billboard. Goodman, Jessica (June 23, 2016). "Katy Perry, Britney Spears, Billy Joel, more sign open letter to Congress about gun safety". Entertainment Weekly.
  62. ↑ Cohen, Joshua (November 14, 2011). "Exclusive: DeStorm, Christina Grimmie, Karmin Get AMA Honors" 互聯網檔案館嘅歸檔，歸檔日期2012年1月7號，.. News.tubefilter.tv. 
  63. ↑ Yahr, Emily (August 1, 2016). "Christina Grimmie won a Teen Choice Award but wasn't mentioned on the show. Fans aren't happy.". The Washington Post.
由「https://zh-yue.wikipedia.org/w/index.php?title=姬絲汀娜葛美&oldid=2205213」收