安大略教育制度

安大略教育制度有幼稚園、小學、中學、大學、社區學院同職業培訓學院。有英文學校同法文學校。

學校亦可以分公校、天主教學校同私校。中小學程度嘅天主教學校嘅經費都係公帑畀，技術上都可以算係一種公校，但係因為歷史原因，由普通冇宗教背景嘅公校分咗出嚟（以前叫 separate schools），淨係天主教徒先可以讀。

幼稚園

喺安省，4至5歳嘅細路可以讀幼稚園（英文：kindergarten；法文：maternelle 或者 jardin d’enfants），幼稚園冇規定要讀，不過如果讀嘅話係免費教育嘅一部分。幼稚園分低班（junior kindergarten，JK）同高班（senior kindergarten，SK）。

中小學

滿6歳嘅細路一定要讀小學。第1班（英文：Grade 1；法文：1^e année）至第8班算係小學，亦有叫第7同第8班做初中（英文：middle school，以前叫 junior high）。安省係英語為主，母語唔係法文嘅人如果揀送仔女入法文學校，通常會話送仔女去 ｢讀 French immersion⌋。

第9班至12班係中學。以前公立中學學校會叫 collegiate institute（其實即係 college 嘅複雜化），而今gaa1都係叫 secondary school。中學以前仲有13班，2003年取消咗。

管理公立同天主教中小學嘅機構叫教育局（英文：school board，法文：conseil scolaire）。

專上教育

安省嘅專上教育分大學、社區學院同職業培訓學院（career college，官方簡稱 PCC）三種。

大學分立法成立同特別審批嘅兩種。私立教學機構可以喺乎合某啲條件嘅情況之下，經過審批之後，批准用 ｢大學｣ 嘅名義運作，呢啲大學嘅規模可以好細。