安德尊
安德尊，MH[1]（英文：Anderson Junior，1961年9月19號—）係香港電視藝員，花名「大王」。佢主持無綫電視《城市追擊》、午間節目《都市閒情》同埋長者節目《開心老友記》出名。
| 安德尊 | |
|---|---|
 | |
| 出生日 | 1961年9月19號  （63歲） |
| 出生地 | 江門市 |
| 國籍 | 香港 |
| 母校 | 香港珠海學院 |
| 職業 | 演員 |
[改維基數據] | |
安德尊響香港長大，喺香港讀小學，中學重未讀完，就去咗菲律賓讀中學，之後響嗰度讀埋大學。喺中學時佢識咗個女朋友。佢話自己個樣唔討好，成日俾人排擠，所以好難得有女朋友，好驚會冇咗。佢成日掛住女朋友，搞到冇心機讀書，嗰段時間成日送女朋友返佢學校，而自己成日遲到，放學又趕住去接女朋友。
後來女友要去菲律賓讀書，而安德尊忍唔到同女朋友分開，所以佢求屋企人畀佢去菲律賓，去到菲律賓都係掛住女友，佢成日搵人頂堂，考試請槍。唔夠一年女友因腦膜炎病死，當時佢感覺到冷漠、無助、令佢諗起好多嘢，覺得呢幾年浪費咁多時間，荒廢學業，到頭來女朋友未到廿歲就死咗。佢問自己生存響度係咪白過。佢十九歲響菲律賓讀完大學返香港，要追返自己失去嘅嘢。
返到香港，加入亞洲電視做演員，一時力捧擔任多套連續劇同節目主持。響亞視最後一個節目係1993年嘅兒童節目《德尊老師》。其後曾經喺浸會醫院嘅老人中心擔當節目策劃。
1994年6月轉投無綫電視主持《大江南北》、《城市追擊》、《全線大搜查》等節目。響《城追》期間以報道陳健康事件同埋感性事件出名。佢誇張腔調令佢響唔少廣告出現。除此之外，佢亦有主持部份綜藝節目，同客串部份電視劇。2000年曾經夾埋「Gas!」組合合唱《董不董》，重錄埋唱片；安德尊響無綫期間唱過唔少兒歌，出名嘅有前期嘅《前進啊！Gulliver Boy》、《愛吃烏冬的老公公》、《家燕媽媽》系列、《乖仔學堂》；2004年主唱兒歌《大王駕到》，加上佢搞笑嘅演譯而有咗「大王」稱號。2006年仍然有同薛家燕灌錄新唱片（賀歌）。
佢最早演出嘅舞臺劇係1991年2月嘅《油脂》；2005年8月參與《開心鬼》音樂劇演出同主唱劇中歌曲。佢信佛教，去過佛教學校演講，並提倡廣結善緣、珍惜生命以及緣份等。
早年曾流傳安德尊本人好有錢，畀傳媒戲以「禾旱蓋德尊」，安德尊本人極力否認，只係透露曾經喺元朗合資買地建舍，2003年曾經同周秀蘭喺銅鑼灣經營素菜館。
佢主持風格好得意，成日好似有意無意、特登做出錯誤示範，搞到人笑又唔係，喊又唔係。有時主持節目，表演到好緊張，畀人緊湊嘅感覺。另外佢有種「大王」嘅風格，扮到好正義咁指揮同事同觀眾，但各人仍然好受落。
攷
編輯- ↑ 〈二〇一八年授勳名單 附件：二〇一八年獲授勳銜及嘉獎人士的嘉許語〉 (PDF) (新聞稿) (繁體中文)。香港政府新聞公報。2018年7月1號。頁 31。