完美物質

《完美物質》（英文：The Substance）係一部2024年嘅諷刺（satirical）肉體恐怖（body horror）電影，由歌拉莉花潔（Coralie Fargeat）編劇、導演、監製，狄美摩亞（Demi Moore）、瑪嘉烈戈利（Margaret Qualley）、丹尼士奎（Dennis Quaid）主演。電影講一個已經過氣嘅女明星，用咗一種黑市藥物，喺藥物嘅作用之下，用自己嘅身體，暫時創造出一個年輕好多嘅自己，結果要承受佢意想唔到嘅副作用。

完美物質
File:The Substance poster.jpg American theatrical release poster
資料明細
導演	歌拉莉花潔
監製	歌拉莉花潔 Tim Bevan Eric Fellner
編劇	歌拉莉花潔
主演	狄美摩亞 瑪嘉烈戈利 丹尼士奎
配樂作曲	Raffertie
攝影	Benjamin Kracun
剪輯	歌拉莉花潔 Jérôme Eltabet Valentin Feron
製片商	Working Title Films
片長	141分鐘
產地	法國 英國 美國
話	英文
上畫同發行
上畫日期	2024年5月19號 (2024-05-19)（康城） 2024年9月20號 (2024-09-20)（英國、美國） 2024年11月6號 (2024-11-06)（法國）
發行商	Mubi (英國、美國) 大都會電影出口公司 (法國)
預算	1750萬美元
票房	3090萬美元

呢套電影係法國、英國同美國嘅國際合拍片，喺2024年5月19號嘅第77屆康城影展（77th Cannes Film Festival）首映，喺影展嗰度，花潔攞到最佳劇本獎（Best Screenplay）。呢套電影喺9月20號喺英國同美國上映，由MUBI發行，11月6日由大都會電影出口公司喺法國發行同埋上映。

劇情

過氣荷里活電影明星伊利沙伯（Elisabeth Sparkle），佢一直都主持緊一個長壽健美操電視節目，喺佢50歲生日嗰日，佢返到錄影室，發現走廊上面自己嘅相全部俾人攞走晒。伊利沙伯無意中聽到監製話佢做緊嘅節目要換人，原因係佢嘅年紀太大。當伊利沙伯揸車返屋企嘅途中，發現工人喺度拆緊佢嘅廣告牌，結果因為分咗神，撞咗車，不過佢無受到傷。喺醫院接受檢查嘅時候，護士俾咗隻USB手指佢，手指入面係宣傳一種叫「完美物質」（The Substance）嘅血清嘅廣告，廣告聲稱可以幫佢整個「更年輕、更靚、更完美」嘅自己。

經過一段時間嘅深思熟慮，為咗回復青春美貌，伊利沙伯柯打咗一套「完美物質」，然後佢收到一張寫住503嘅卡，佢依照指示去攞「完美物質」。返到屋企，佢打開個包裝盒，裡面有血清、穩定劑，仲有詳情指示。佢依照指示，喺廁所嗰度全身赤裸，見到自己嘅身體上嘅皺紋，佢更多想回復青春。於是佢注射咗裡面嘅一次性活化劑血清，注射咗之後佢突然不斷抽筋，然後瞳孔都一分為二，跟住連眼球都一分為二，最後背脊骨突起，撐開；最後，伊利沙伯失去意識。失去意識之後，一個全身赤裸、更靚、更年輕，滿身都係透明液另一個自己喺背脊嗰度走咗出嚟，呢個另一個自己叫做 Sue （由瑪嘉烈戈利飾演），然後 Sue 將伊利沙伯裂開嘅背脊用粗針縫好。

「完美物質」喺兩個身體之間建立咗一種共生關係：伊利沙伯每七日就要將佢嘅意識喺兩個身體之間轉移一次，轉移咗意識嘅身體可以正常活動，而閒置嘅身體就會保持喺無意識嘅狀態。喺新身體活躍嘅七日嗰陣，佢要用腰椎穿刺（lumbar puncture）嘅方法喺原本嗰個嘅自己嘅腰椎嗰度攞腦脊髓液做「穩定液」（stabilizer fluid），注射入新身體，嚟防止身體急速衰老。

無幾耐，化名做 Sue 嘅另一個自己，就成功俾監製睇中，請咗做接替伊利沙伯嘅主持人。七日之後，伊利沙伯返番去錄影室，佢見到監製攞住個裝咗佢嘅私人嘢嘅紙箱，同佢講佢已經俾公司炒咗魷魚。 伊利沙伯喺月曆上面寫低邊日自己可以切換成 Sue，邊日需要切換返番原本嘅身體。 Sue 嘅節目相當成功，Sue 嘅名氣急速攀升，事業可以話係如日中天，甚至俾電視台邀請做跨年晚會嘅主持人。作為 Sue ，藉住年輕嘅身體、優美嘅身段、靚樣，佢可以好自信咁，無憂無慮咁盡享榮華富貴、享受生活；而一旦返番去自己嘅肉體，伊利沙伯就變成毫無安全感，開始過住隱居生活。

喺一夜情之後，伊利沙伯知道以 Sue 嘅身份留超過七日會令到佢原本嘅自己迅速老化。供應商警告，呢種老化係無得逆轉嘅，而伊利沙伯一定要遵守轉換嘅時間表，咁樣先至可以防止呢種情況再發生。 雖然伊利沙伯嘅兩副肉體都保持住單一嘅意識，但係隨著時間嘅推移，兩副肉體都開始將自己視為獨立嘅個體，而且開始出現互相鄙視。 「伊利沙伯」開始嫉妒 Sue 嘅青春、美貌同成功，而且對 Sue 經常唔按時切換覺得反感，而 Sue 就對伊利沙伯不斷嘅厭惡自己同暴飲暴食感到震驚。經歷咗伊利沙伯故意毀滅自己嘅事之後，Sue 心煩意亂，受困擾嘅 Sue 決定拒絕轉返去做伊利沙伯，決定繼續抽取伊利沙伯嘅腦脊髓液做穩定液，永遠保持喺年輕嘅肉體裏面。

三個月後，喺跨年電視晚會直播當日，Sue 嘅脊柱已經抽唔出穩定液。供貨商話畀佢知，、唯一可以補充穩定液嘅方法係轉返去佢原本嘅身體。轉換返嚟之後，伊利沙伯發現自己嘅身體已經變到好恐怖，唔似人形，甩咗好多頭髮，駝晒背。伊利沙伯決心阻止 Sue 過度抽取穩定液，繼續將自己嘅身體搞壞，於是同供應商訂咗終止 Sue 嘅血清。但係伊利沙伯依然對名氣念念不忘，所以臨打終止血清嘅時候，改變咗主意，唔單止無同 Sue 打終止血清，而係將 Sue 復活咗。佢咁樣做嘅結果係兩副肉體同時激活，共生關係就咁打破咗。Sue 見到終止血清，知道伊利沙伯想點做，於是好嬲，仲殺死咗伊利沙伯，之後佢若無其事咁照去主持跨年電視晚會。

冇咗伊利沙伯，Sue 嘅身體開始迅速惡化，三隻牙、一隻手指嘅指甲都甩咗，然後右耳都開始甩。Sue 好驚，即刻衝返屋企，想用剩低嘅激活劑去創造一個新版本嘅自己，呢個係供應商明確禁止嘅事。 佢咁樣做，無意中創造咗「怪物伊利沙蘇」（Monstro Elisasue），係兩副肉體嘅奇怪混合體。

「伊利沙蘇」着好衫，戴上臨時做嘅伊利沙伯面具，嚟到直播現場。當佢上台想同觀眾講嘢嗰陣，個面具跌咗落嚟，露出恐怖嘅面容，引起現場一片混亂。一名男人用個咪架將「伊利沙蘇」嘅頭，令到「伊利沙蘇」嘅身軀噴出好多血，噴到周圍都係。「伊利沙蘇」離開直播室之後，肉體徹底崩潰，留低伊利沙伯原本嘅臉。伊利沙伯嘅臉爬到荷里活星光大道，停喺自己嘅星星上面。佢望住天上嘅星星，微笑，然後慢慢溶解。佢留低嘅血喺第二日俾洗地機清理得乾乾淨淨。

演員

瑪嘉烈戈利、歌拉莉花潔、狄美摩亞出席2024多倫多國際電影節

• 狄美摩亞] 飾演 伊利沙伯·史巴克（Elisabeth Sparkle）
• 瑪嘉烈戈利] 飾演 蘇（Sue）
• 丹尼士奎] 飾演 哈維（Harvey）
• Edward Hamilton Clark 飾演 Fred
• Gore Abrams 飾演 鄰居 Oliver
• Christian Erickson 飾演 餐廳嗰度嘅男人
• Robin Greer 飾演 男護士
• Tom Morton 飾演 醫生
• Hugo Diego Garcia 飾演 Diego
• Phillip Schurer 飾演 尖叫嘅男人 （screaming man）
• Yann Bean 飾演 「完美物質」供貨商（配音）
• Joseph Balderrama 飾演 Craig Silver

製作

喺2022年1月，宣布由狄美摩亞同瑪嘉烈戈利主演呢套電影，由 Working Title Films 製作，環球影業（Universal Pictures）負責發行。歌拉莉花潔做導演，佢亦都會同 Working Title Films 嘅聯合主席 Eric Fellner 同 Tim Bevan一齊擔任製作人。 同年，歌拉莉花潔喺巴黎創立嘅工作室鐵匠影業（ Blacksmith ）加入聯合製作。 2022年2月，宣佈雷萊達（Ray Liotta）加入演員陣容。不過，雷萊達喺2022年5月去世，之後花潔搵咗丹尼士奎演出雷萊達原本嘅角色。

主體拍攝用咗108日，喺2022年10月正式完成。呢套電影全程喺法國拍攝，廠景係喺巴黎地區嘅影棚嗰度拍，外景係喺法國地中海沿岸嘅蔚藍海岸（Côte d'Azur）拍，假扮成洛杉磯嘅場景。由於呢套電影需要大量「實物特效」（Practical Effect），同埋拍攝時間好長，所以選擇咗法國做拍攝地點，另外嘅部分原因係因為法國嘅稅務減免政策。 喺主體拍攝嘅初期，外景拍攝嘅時候只係用咗8個工作人員；而喺廠景拍攝嘅時候，因為需要大量現場「實物特效」，需要多達200個工作人員。

花潔形容佢用咗「實驗室拍攝」（lab shoot）嘅方法去拍呢套電影。喺同演員一齊拍完之後，最後一個月嘅時間係用咗呢做「實驗室拍攝」，佢同一個核心劇組人員一齊拍攝一啲細節嘅特寫鏡頭，例如背部裂開嘅過程或者注射嘅畫面。

假肢同化妝效果

花潔選擇咗主要依靠「實物特效」嚟拍呢套戲，佢認為「實物特效」對於傳達暴力主題係好重要嘅。最終套電影嘅70-80%都係用「實物特效」，佢唔想用更加平嘅電腦數碼特效。

套電影嘅假肢同化妝特別效果，最初係由幾間唔同嘅公司設計，不過佢哋嘅設計都太過男性化，所以無用到。之後就請咗 Persin，由 Pierre-Olivier Persin 同埋佢公司 Pop FX 設計。Persin 為呢個項目投入咗超過一年嘅時間。Persin 嘅設計最獨特嘅地方就係融入咗女性感同優雅感，而唔係設計成「男仔嘅橡膠怪獸」（a rubber monster for the guys）。

Persin 為伊利沙伯嘅變身過程設計咗假肢，呢個過程分為五個階段，由一隻枯萎嘅手指開始（「 The Finger」）。 下一個階段係一個更加老化嘅造型，叫做「安魂曲」（Requiem ，受一部2000年上映嘅美國電影《迷上癮》啟發），然後係駝背、似下垂嘅「咕嚕」，高潮時嘅生物「怪物伊利沙蘇」（Monstro Elisasue），最後係「Gremlin」。 花潔刻意避免令呢啲效果睇落過於真實，原因係佢認為造型嘅目的係透過角色嘅恐懼同憤怒嚟塑造老化過程嘅變形表現。

Sue 嘅誕生場景係結合咗一系列精緻嘅矽膠公仔、替身用嘅義肢，同埋喺狄美摩亞身上嘅化妝嚟完成嘅。除咗眼裂嘅特寫之外，整個誕生過程嘅鏡頭幾乎全部都係用「實物特效」。

喺裸體場面，瑪嘉烈戈利戴咗義乳，嚟呈現一個理想嘅美麗體態，令人聯想到謝茜嘉兔（Jessica Rabbit）。戈利幽默咁解釋咗呢個過程：「可惜無魔法豐胸藥，所以我哋只能夠將啲假胸粘上去……[佢哋俾咗]我一世人從來未擁有過嘅傲人身材。」

對於涉及局部義肢嘅場景，特效團隊都要好小心咁做，目標係要避免出現一個唔平衡嘅外觀，由伊利沙伯枯萎嘅手指開始，就要避免呢啲義肢睇落比未受影響嘅手指粗。 要喺唔增加多餘體積嘅情況之下，達到無縫嘅外觀造型，所以需要將啲義肢整到好薄。喺測試期間，最初嘅版本睇落太大同古怪，令 Persin 暫時停止咗所有其他假肢嘅開發、設計；團隊由重新設計手指開始。總括嚟講，所有嘅義肢都需要重新設計咗兩次。

義肢化粧用嘅時間因角色嘅複雜程度唔同而唔同，最短只需要45分鐘，最長可以多達7小時，有時一日只係淨低一兩個鐘嘅時間可以用嚟拍影。