容錯原則

  提示：呢篇文講嘅唔係容錯性。

容錯原則（英文：tolerance for error）係通用設計嘅第五個原則，指設計一樣嘢嘅時候，應該積極預防用家做錯嘢或者做危險嘅舉動，同埋用家做錯嘢嘅時候要避免出現危險或者導致故障；實行方法包括令危險動作冇咁易做、要確認先做得危險動作、系統有容錯性等等。

通用設計講嘅容錯原則好容易同工程學講嘅容錯性溝亂，因為個名太似，但係其實好唔同。例如，喺屋企用電磁爐（即係唔用氣爐或者一般用發熱線嘅電爐）喺通用設計嘅角度叫乎合容錯原則，因為可以預防用家掂到爐頭造成危險，但係喺工程學嘅角度咁做同系統有冇容錯性完全冇關係。通用設計講嘅容錯原則着重嘅係預防出錯，唔係工程學講嘅出咗錯系統可以繼續運作。