岐周衞公祠

岐周衞公祠，堂號明湮，亦叫水邊明湮祠，喺廣州市海珠區瀝滘村付四約，係番禺瀝滘衞氏大夫房八世祖嘅祠堂。明朝嘉靖四十二年（1563年）起。坐北朝南。2012年8月定爲海珠區不可移動文物。

岐周衞公祠 明湮堂
主祀	岐周（八世祖） 誠（十二世祖）
家族信息
家族	瀝滘衞氏
起源	河東郡
修建史
始建	1563年
方位
地址	廣州市海珠區瀝滘村付四約南11號
朝向	坐北朝南
現時尚存 經已掛牌
登錄名	岐周衞公祠
等級	海珠區不可移動文物
登錄時間	2012年8月13號

建築

總面闊三間12.6米，總進深兩進31.5米，佔地396.9平方米。

頭門面闊三間12.6米，進深兩間九架8.75米。前便有花崗岩條三級石級。硬山頂，封火山牆，博古正脊，碌筒瓦面，素瓦當剪邊，雕花封簷板。前簷柱花崗岩方柱，柱同山牆間架蝦弓樑，上高放石雕柁墩。前步廊雕花板樑，有石雕人物挑頭。正牆水磨青磚，花崗岩石腳。牆頭先頭有采繪，經已抆咗坭灰。正牆明間中開大丁，施石門夾，兩棟木板門。門額石陰刻「岐周衛公祠」，後簷柱係花崗岩石八角柱。天井深10.9米，闊5.1米，改成石屎鋪地。兩便係卷棚頂廊。三三級石級上一沓。

第二沓面闊三間，進深三間十三架。硬山頂，博古正脊，碌筒瓦面。前簷柱花崗岩石方柱，兩金柱水圓柱有石柱礎、柱櫃，後簷柱係花崗岩八角柱，有後牆。

匾額同門聯

祠堂有匾額寫「明湮」，落款係「冬官郎歐大任書」。門聯係「廟祐孔安千里炳靈三粵望 苾芬式薦萬年保禮重周宗」，落款係「歐大任書」。

攷

• 衞宗正、衞鎔. 《衞氏族譜六卷》.
• 廣州市文物普查增編編纂委員會 (2014). 〈岐周衞公祠〉. 出自 陳建華 等 (編). 《廣州市文物普查增編 中卷》. 廣州出版社. p. 367. ISBN 978-7-5462-1837-3.