希伯來文嘅羅馬字拼音方案

希伯來文嘅羅馬字拼音方案並唔統一，日常生活中遇到嘅方案多過一種；視乎詞性、地區、語言等等，一個字可能會有好多種拼法。其中一個原因係呢啲方案幾乎全部都係跟讀音，但係讀音唔止一種。

以色列官方整咗兩套官方拼音方案，一套學術用，一套日常用，官方拼音會用喺例如地名咁，最初嘅方案喺1957年1月23號公佈，但係官方方案因為覺得唔啱音，喺2000年代改過，所以實際上遇到嘅拼音方案，就算淨計官方方案，其實都唔止兩套。

官方嘅拼音方案，喺以色列境外嘅例如美國、加拿大、法國等等嘅地方，幾乎唔會見到；喺呢啲地方，用嘅係一啲同當地語言比較兼容嘅本地拼音，呢啲方案就算喺當地嘅猶太人社區都唔統一，唔同語言嘅方案一般亦唔兼容。