希伯來書

希伯來書（希臘文：Προς Εβραίους）係《新約聖經》之中，寫畀猶太地區基督徒嘅一封書信。呢卷書冇提及作者個名，內容大概講述耶穌基督喺舊約同新約時代嘅獨特地位，重有解釋部分舊約聖經嘅真正含義。

簡介

作者：唔清楚
日期：64~66年
地點：唔清楚（可能喺士班雅，即係西班牙）
收信人：住喺羅馬城裏面嘅猶太人

希伯來書係作者寫畀一班面臨困難信徒嘅信。佢哋受到反對者日益增加嘅壓力，有放棄信仰嘅危險。作者為咗堅定佢哋嘅信心，鄭重向佢哋指出耶穌基督係上帝最真、最完整嘅啟示。作者特別強調下面三點；

1. 耶穌係永恆上帝嘅仔，佢忍受一切苦難，始終順服父神嘅旨意。身為上帝嘅仔，耶穌嘅地位比舊約所有先知高，亦比天使同摩西高。
2. 上帝立耶穌做永恆嘅祭司，高過舊約祭司。
3. 藉賴耶穌，信徒可以喺罪惡、恐懼同死亡裏面拯救出嚟。身為大祭司嘅耶穌畀人真嘅拯救，佢喺天上聖所獻上嘅祭遠超過猶太教嘅禮儀同獻祭。

作者引述以色列史度好多著名人物嘅信心榜樣（第十一章）勸勉讀者要堅守信仰。喺十二章佢要求讀者守信到底，始終仰望耶穌，忍受各種可能臨到佢哋身上嘅災難同迫害。最後佢用勸勉同警告嘅話做結束。

提要

1. 序言：基督係上帝完整嘅啟示（1章1-3節）
2. 基督嘅優越性（1章4節-10章39節）
   1. 基督高過天使（1章4節-2章18節）
   2. 基督高過摩西同約書亞（3章1節-4章13節）
   3. 基督嘅祭司職位（4章14節-7章28節）
   4. 基督嘅約（8章1節-9章28節）
   5. 基督嘅祭（10章1-39節）
3. 信心嘅重要性（11章1節-12章29節）
4. 最後嘅勸勉同結語（13章1節-25節）