帝國球場 (溫哥華)

  想搵第二個意思嘅話，請睇帝國球場。

帝國球場（英文：Empire Field）係加拿大溫哥華嘅一座臨時球場，位於希斯廷斯公園帝國大球場嘅原址上面。

帝國球場

歷史

帝國大球場喺1993年拆徂之後，溫哥華市政府將帝國大球場嘅原址改建徂做社區運動場，爾座公園有兩座天然草皮足球場，兩座棒球場同一條跑道。

2007年，由於卑詩大球場需要起一座新嘅開合式屋頂，以取代漏水嘅舊屋頂，卑詩大球場嘅營運商BC Pavilion決定喺帝國大球場嘅原址上面起一座臨時球場，作為卑詩雄獅同埋溫哥華白浪嘅臨時主場。總部設喺瑞士，專長係建造臨時體育設施嘅努斯利集團（Nussli Group）贏得徂建造爾座臨時球場嘅合約，而爾座臨時球場應用徂好多模塊化設計理念。建造爾座球場用徂111日，用徂2500噸材料，喺2010年6月下旬完工，啱好趕得切加拿大加式足球聯賽嘅常規賽季。

起好嘅帝國球場有27528個座位，其中20500個係單人凳座位，其餘7000個係長凳座位。單人凳座位上高有屋頂遮頭，長凳座位上高就無。此外，帝國球場重有12個包廂同一個貴賓區，照明設施同媒體設施亦都一應俱全。不過，同卑詩大球場相比，帝國球場嘅座位雖然離比賽場地近啲，但係由於係露天球場，球迷嘅聲浪唔會好似喺卑詩大球場恁到處迴響，撼動對手嘅軍心，因此好多球迷認為帝國球場削弱徂主隊嘅主場優勢。帝國球場嘅另一個缺點係：由於地處郊區，遠離架空列車路線，帝國球場平時祗有兩條公交車路線：135路同28路，比賽日經常要靠加開特別班車來滿足通勤球迷嘅需求；而歷史更悠久嘅卑詩大球場，行路唔使10分鐘就可以到架空列車嘅體育館－華埠站。

2011年尾，喺卑詩大球場重開之後，帝國球場終於壽終正寢，之前由努斯利集團借出嘅設施全部歸還 ，但係人造草皮、更衣室同照明設備就無拆到。2012年，溫哥華市政府經過一系列公眾咨詢之後，決定將帝國球場嘅舊址改建成一座新嘅社區運動場。根據溫哥華市政府嘅規劃，新嘅社區運動場會包括兩座大足球場（可以分割成四座細足球場），觀眾座位，熱身區同埋一條560米長嘅跑道，但係唔會有棒球場。改建計劃原定2014年11月完工，但係由於不可抗力因素嘅作用，直到2015年先至完工。

重大事件

• 第一場加式足球賽事：2010年6月20號加拿大加式足球聯賽熱身賽，卑詩雄獅對沙省遊騎兵；
• 入場人數最多嘅加式足球賽事：2011年9月10號加拿大加式足球聯賽常規賽，卑詩雄獅對多倫多船工，26253人入場觀戰；
• 第一場足球賽事：2011年3月19號北美足球大聯盟常規賽，溫哥華白浪對多倫多FC；
• 入場人數最多嘅足球賽事：2011年7月30號北美足球大聯盟常規賽，溫哥華白浪對洛杉磯銀河，27500人入場觀戰。
• 2010年8月21號，為徂慶祝太平洋國家展覽會開幕100週年，溫哥華市政府請到拜仁·亞當斯同海灘男仔來開演唱會。