庖丁解牛

庖丁解牛係《莊子》嘅一篇寓言故事，出自《養生主》。由於戰國時期戰爭冇停過，喺呢個年代莊子主張「保身」、「避禍」等。呢篇文借庖丁解牛嘅故事講出順應自然嘅養生之道同人生哲學。「庖」文言文意思係廚師，庖丁即係一個個名叫做「丁」嘅廚師。庖丁為魏惠王劏牛，順應天然之道從筋骨嘅空隙遊刃有餘，並藉機會講述道家養生嘅道理。

創作背景

莊子生活喺戰國中期，當時係非常激烈嘅社會轉型時期，中國社會經歷咗一次「高岸為谷，深谷為陵」嘅滄桑鉅變，社會動亂，百姓生活極之困苦，喺身處亂世當中嘅人對人生、前途充滿迷茫。莊子針對人喺殘酷現實唔能夠任人嘅本性無拘無束噉生活、面臨無情摧殘難以盡享天年嘅現實，被迫隨時隨地心驚驚噉要搵地方匿，又要識得隨機應變，以免受到傷害，想喺複雜嘅鬥爭嘅骨節縫中尋找一個空隙，將佢作為保全生命嘅安樂窩，以便喺呢個亂世之中游刃有餘噉生存落去。呢篇寓言體現嘅就係呢種心境。

譯文

我嘅一生有盡頭，而知識係無窮無盡。以有限嘅生命嚟追求無限嘅學問，只會令人疲乏傷神。既然係噉，重喺度不停追求知識，只會更加危險！做善事只係為咗名譽，做惡事嘅人都會遭到刑罰，順其自然嘅道作為做事嘅準則，可以保護身體，可以保存天性，可以養心，可以盡享天年。

庖丁為文惠君劏牛，佢用手捉住，膊頭挨住，用腳踩住，用膝頭頂住牛身，用刀切割牛身嘅時候，發出皮肉分離嘅聲音，呢啲聲響都合乎音樂節拍，佢嘅動作符合《桑林》舞曲嘅節奏，落刀時所發出嘅聲音都配合《經首》樂章嘅節奏。

文惠君話：「呀！犀利！你劏牛嘅技術點樣達到呢個咁高明嘅地步㗎？」

庖丁放低把刀回答話：「我崇尚自然之道，已經超過普通技術嘅階段。我最初劏牛嘅時候，只見到一隻完整嘅牛。三年之後，我對於牛嘅每個部分嘅結構已經完全了解，唔會將牛睇成整體。而家，我用心神去接觸牛而唔係用眼去睇，感官活動停止咗，只係靠精神活動嚟行事。我按照牛身體嘅肌肉紋理，劈開牛筋骨間嘅空隙，順住牛身體裏面骨節間嘅空間，並順住牛嘅結構落刀。刀刃從來未掂過筋骨相連、筋肉聚結嘅部位。更何況係大骨頭呢！

技術較高明嘅廚師一年更換一把刀，因為佢用刀割肉；一般嘅廚師一個月就要換刀，因為佢哋用刀劈骨頭；我嘅刀已經用咗十九年，劏過幾千隻牛，而我嘅刀就好似啱啱用磨刀石磨好咁鋒利。牛嘅骨節間有空隙，而刀刃就薄到好似冇厚度；以冇厚度嘅刀刃插入有間隙嘅骨節間，刀刃有足夠嘅活動空間，好寬闊，所以我呢把刀用咗十九年都好似新磨嘅一樣。雖然係噉，我每次落刀到筋肉聚結嘅部位，見到難以處理嘅地方嘅時候，亦會小心翼翼，目光集中，行動放緩，微微落刀，牛已經劏好，牛身好似泥土噉攤開喺地度。然後我拎住把刀企起身，觀察四面環境，為劏牛而感到心滿意足，最後抹好把刀放入刀套度。」

文惠君話：「好呀！我聽過庖丁講過嘅嘢之後，明白保養生命之道喇。」

道理

牛嘅結構係複雜嘅，庖丁能夠輕鬆簡單噉劏牛，係因爲佢已經能夠掌握牛嘅結構。每隻牛當然都有啲唔同，但無論係乜嘢牛，佢哋嘅結構都係一致嘅；每個人嘅生活亦各有各嘅面貌，但基本原理亦係近似嘅。庖丁因爲已經熟悉牛嘅結構，自然就知道點樣落刀。生活亦一樣，如果能夠了透、領悟咗生活嘅道理，能夠摸準其中嘅規律，就能夠好似同庖丁一樣，做到目中有牛又無牛，就能夠化繁爲簡，真正獲得輕鬆。做事應該處處小心，亦要保持住一種謹慎小心嘅態度，收斂鋒芒，並且喺識得利用規律嘅同時，更要去反覆實踐，好似庖丁「所解數千牛矣」一樣，不停噉重複，最終會領悟出事物嘅真理所在。人類社會充滿住錯綜複雜嘅矛盾，人處世間，只有好似庖丁解牛噉樣避開矛盾，做到順應自然，先至能夠保身、全生、養心、盡年。