廈村鄧氏宗祠
提示：呢篇文講嘅唔係屏山鄧氏宗祠。廈村鄧氏宗祠，又叫元朗鄧氏宗祠、友恭堂，係香港一間祠堂，喺新界元朗廈村，喺2007年12月7號連同附屬建築物嘅禮賓樓同友恭學校，一齊被評為香港法定古蹟。
史 編輯
廈村鄧氏宗祠喺清朝乾隆十四年（1749年）動工起，乾隆十五年（1750年）起好。元朗廈村嘅鄧族起呢間祠嘅原因，係希望能夠紀念鄧洪贄同鄧洪惠兩位祖先嘅功勞。呢間祠曾分別喺道光十七年（1837年）同光緒九年（1883年）進行大規模嘅修葺。而鄰接鄧氏宗祠嘅禮賓樓同友恭學校，相信喺民國十三年（1924年）之前已經起咗。
建築 編輯
廈村鄧氏宗祠係三進兩院式建築設計：祖先神位供奉喺後進明間嘅木神龕裏面，中進就掛咗多塊功名牌匾，而後院亦起咗兩個廂房。佢嘅前中後進同廂房，都飾有用花卉圖案裝飾嘅精美檐板，有啲橫樑更雕刻咗精巧嘅傳統中式吉祥圖案。佢嘅主要建築結構，係用青磚牆同石柱支撐住木構瓦片天面，樑架上面裝有優美精緻嘅斗拱。
禮賓樓就由兩座建築物組成，之間被庭院分隔。佢嘅建築結構用青磚砌成，牆身支撐住用檁條同椽子構成嘅金字瓦面屋頂。佢嘅牆楣用花卉同幾何圖案嘅灰塑裝飾。佢嘅右邊堂依然保存住琉璃漏窗，兩邊就保存有一副灰塑對聯。樓裏面仍舊放咗供奉文昌同武曲嘅神龕。
友恭學校用青磚砌成，有兩組屋脊，飾有吉祥同幾何圖案嘅灰塑。校舍最初係一座三開間建築，直到1952年成為政府資助學校時，曾經加以擴建。佢嘅山牆上面仍然保存住草尾灰塑裝飾。
用途 編輯
廈村鄧氏宗祠係元朗廈村鄧族主要嘅祭祀同節慶活動嘅場所。每年嘅春秋二祭，同埋點燈等宗族傳統習俗，仍然喺祠裏面舉行。此外，間祠亦係舉行十年一屆嘅廈村太平清醮嘅重要場地。
禮賓樓原本係鄧族招待客人留宿嘅地方，大概喺1950年代用做友恭學校嘅教師宿舍。而友恭學校就係為當地細路提供教育而起。
參考 編輯
- 〈元朗鄧氏宗祠評為歷史建築〉，《星島日報》，2008年12月8號
- 〈廈村鄧氏宗祠評為歷史建築〉，《明報》，2008年12月7號