廣州地鐵博物館

 廣州地鐵博物館（粵拼：gwong2 zau1 dei6 tit3 bok3 mat6 gun2） 係中國廣東廣州嘅博物館，2016年12月20號開館，位置喺海珠區新港東路1228號（萬勝圍地鐵站同有軌電車站西南邊冇幾遠嘅位）。

廣州地鐵博物館

喺0樓嘅大型模擬盾構機，屬博物館嘅核心。

佢既係廣州市人民政府屬下喺2015～2016年社會民生基礎設施建設項目之一，又係廣州地鐵屬下嘅博物館，亦係華南地區第一間地鐵博物館。入面主要介紹地鐵站啲原理同由來。

結構

• 佔地面積：約4400m²
• 展覽面積：約3600m²
• 展覽樓層數：4

樓層分佈

• 0樓：廣州嘅地質狀況同起地鐵嘅過程
• 1樓：軌道交通行業同廣州地鐵發展歷程
• 2樓：地鐵營運安全體驗區
• 3樓：廣州地鐵企業形象展覽廳

門票同開放時間

門票

呢間博物館雖然遊覽全程免費（包括屬下遊樂場同康樂設施），但入面部分商鋪擺攤賣啲貨品係要錢嘅。入場時有兩個辦法：

1. 有互聯網環境：必須要通過微信嘅廣州地鐵博物館官方公眾號嘅線上預約，入場時必須要畀保安仔睇有冇預定成功嘅二維碼同用手機掃閘機嘅二維碼先至有得畀入。雖然唔受入閘票限制，但一人同日最多凈畀預約6張，而且限一票一人出入。
2. 冇互聯網環境：必須要去門口個客務中心簽名預約攞入閘票，入場時必須將門飛畀驗票員嘟閘機入去就得。但入閘票買嗮嘅話，門口有公告會嗌你第日再嚟過。

開放時間

• 禮拜二到五：10:00～16:00（UTC+8）
• 禮拜六、日：09:00～17:00（UTC+8）
• 每日收檔前一個鐘內或場內預約名額滿嗮嘅話，都唔賣門飛入場（入場時除在線預約成功者之外）。
• 每個禮拜一或遇到惡劣天氣現象、場館附近或周邊爆發大型示威或恐怖襲擊等惡性治安事件時，博物館都會閉館。