弘文天皇

弘文天皇（日文：弘文天皇／こうぶんてんのう ^{Kōbun tennō}；648年—672年8月21號）係日本第三十九位天皇，原名大友（日文：大友／おおとも ^Ootomo），又叫伊賀（日文：伊賀／いが ^Iga），響671年12月5號至到672年7月23號在位。

弘文天皇

佢係天智天皇大仔，叔叔係天武天皇。

經歷

佢細細個嗰時識好多嘢，好有才幹，因此老豆天智天皇好睇起佢，甚至一度想換咗當時嘅儲君、細佬天武天皇。響671年，佢做咗太政大臣，實際上已經有好大實權。響672年老豆死咗之後，佢同叔叔天武天皇爭皇位，因而發生壬申之亂。佢以近江國做基地，掌握咗實權。響同年七月，佢響瀨田川之戰入面失敗，於是佢就吊頸自殺，終年廿四歲。

認受性

因為本身叔叔天武天皇係老豆天智天皇冊封嘅儲君，但弘文天皇唔係由天皇冊封嘅儲君，所以弘文天皇嘅天皇身份一直都唔畀人承認。直到1870年，明治天皇承認佢嘅天皇身份，同埋追封佢做弘文天皇。但係到今時今日，依然有好多人唔承認佢係天皇，淨係叫佢做大友皇子或者伊賀皇子（多數叫大友皇子）。

屋企

老婆：十市皇女

妾侍：藤原耳面刀自

• 大仔：葛野王（阿媽係十市皇女）
• 大女：壹志姬王（阿媽係藤原耳面刀自）
• 細仔：與多王（唔知阿媽係邊個）