彩虹站第三條路軌傳說

彩虹站第三條路軌傳說，係指位於港鐵彩虹站，中間第三條路軌被保留、荒廢，甚至話可以直通鬼門關嘅傳說。

傳說內容

1980年代，彩虹站首次通車時曾經出現意外。平日只需要四分鐘嘅路程，但下一站職員遲遲未見列車埋站，開出後嘅列車更加失去聯絡。一個站之間，系統失靈，只係傳出詭異嘅沙沙聲。之後列車終於到站，但車長就臉無血色，唔肯講發生乜事。車上所有人受驚過度送院，之後更有傳有工作人員離奇死亡。之後，就開始傳出路軌通往鬼門關嘅傳聞，當時有人更指地鐵曾請經道士到彩虹站調查，最後為咗安撫人心，地鐵決定多開一條路軌，自此以後地鐵就沒再用嗰條路軌。

關於傳說真確性

地鐵曾經解釋，被指鬧鬼嘅中間月台路軌，其實係通往九龍灣車廠。港鐵亦曾經喺2016年10月上載喺車頭拍攝嘅片段，展示列車其實只是通往九龍灣車廠。亦有另一個講法，話係70年代政府本來計劃再擴展東九龍線，由鑽石山至上環，不過由於最後計劃被擱置，所以多出來嘅第三條路軌而家只係用作調配列車，而唔係接載乘客。YouTuber Professor PowPow亦曾經查證，指出中間路軌係用嚟配合九龍灣車廠，路軌到依家都偶然會被使用。