徐順全

徐順全（Chee Soon Juan，1962年—）係星加坡政治人、新加坡民主黨秘書長，以多次向新加坡執政黨人民行動黨作出反抗同批評為知名。

徐順全
出生地	星加坡
國籍	星加坡
母校	University of Georgia、Anglo-Chinese School
職業	政治人
僱主	星加坡國立大學
政黨	Singapore Democratic Party
[改維基數據]

簡歷

徐順全喺1990年得到哲學博士之後，入咗新加坡國立大學教書。

1992年徐順全得到新加坡民主黨創黨人詹時中介紹入黨。1993年徐順全被指濫用大學研究基金被新加坡國立大學開除之後，徐順全隨即進行絕食抗議。詹時中同徐順全喺事件上意見不合，引致黨內分歧，民主黨中委最終支持徐順全。其後詹時中去咗新加坡報業俱樂部批評徐順全同埋民主黨中委，民主黨中委唯有選擇開除佢黨籍。詹時中事後對外話自己係俾徐順全逼走。事隔廿幾年後呢單嘢都繼續俾反對徐順全嘅人提起，而徐順全仍然未能同詹時中和解。

詹時中落馬之後徐順全喺黨內上位，佢喺臨到1997年大選之前轉投新加坡人民黨。

徐順全加入新加坡民主黨之後，長年參選新加坡唔同嘅選舉，但都未能獲勝，1997年新加坡民主黨輸嗮國會議席之後都冇贏過一個國會議席。不過，去到2020年新加坡大選嗰陣，佢就出戰武吉巴督單選區，獲得45.2%得票，以2,712票之差輸咗畀人民行動黨角逐連任嘅穆仁理。呢次算係徐順全咁多次選舉以嚟表現最好嘅一次。

政治立場

作為新加坡反對派主要人物之一，徐順全致力推動新加坡民主化。徐順全喺2014年11月接受香港南華早報訪問嘅時候，就話香港同新加坡同樣需要民主化，先可以減輕貧富懸殊，收入不均等社會問題。

徐順全早年嘅政治作風都被視為激進派，甚至因為言論惹上官非，因為無法賠償而宣告破產，2006年同2011年都冇辦法參加大選。2012年徐順全至籌到錢打甩破產令。由2015年新加坡大選起，佢開始塑造偏向溫和嘅新形象。

另外，佢亦不時批評人民行動黨嘅部長自視過高，領取優厚薪金，但就唔願意實施最低工資等有利民生嘅政策。例如喺武漢肺炎疫情期間，佢就喺社交媒體批評新加坡貿易和工業部部長陳振聲話香港人無腦嘅言論，而陳振聲反對新加坡全民戴口罩，反過來新加坡一度成為全東南亞最多武漢肺炎確診個案嘅國家。