御史衞公祠

御史衞公祠，堂號永思，亦叫御史祠、隔橋永思祠，喺廣州市海珠區瀝滘村中區坊，係番禺瀝滘衞氏五世祖、御史中丞衞伯英嘅祠堂。明朝萬曆十六年（1588年）起。初頭門額寫衞氏宗祠。坐東朝西。2011年10月，公佈為海珠區登記保護文物單位。

衞氏宗祠 永思堂
主祀	伯英（五世祖） 元泰（六世祖） 君盛（七世祖） 宗禮（八世祖） 觀德（九世祖） 文杰（十世祖） 文政（十世祖） 文受（十世祖） 文昱（十世祖）
家族信息
家族	瀝滘衞氏
起源	河東郡
修建史
始建	1588年
方位
地址	廣州市海珠區瀝滘村中區一巷18號
朝向	坐東朝西
現時尚存 經已掛牌
登錄名	御史衞公祠
等級	海珠區登記保護文物單位
籌	1-2
登錄時間	2011年10月

建築

總體係蝠鼠型格局。總面闊30.6米，總進深18.9米，佔地578.34平方米。磚木石結構。

中路第一沓面闊三間13.52米，進深3.5米共七架，前牆後柱承重。硬山頂，鑊耳封火山牆，灰塑龍船脊。明間前便有四級石級，有抱鼓石。牆體青磚花崗石腳。分中牆中開大門，兩便有門枕石，兩棟木門。花崗石鋪地。後簷係花崗石柱。第一、二沓之間有天井。中間係花崗橫條石鋪地。兩便係卷棚頂廊，碌筒瓦面。

第二沓內寢十五架，面闊三間，進深11.8米，三三柱加後牆承重，屋頂形式似足第一沓。有三級花崗岩石級。側邊有個細抱鼓。前簷柱係八角鹹水石柱。金柱係木圓柱，有柱頭斗。左路形式係梯形，面闊約莫7.4米，進深約莫18.9米。右路有兩房，中間有小天井，總面闊9.7米，總進深13.4米。

建築前便有一個三面圍住嘅院仔，闊16.8米，進深9.0米。

匾額同神主

祠堂初頭門額寫「衞氏宗祠」，落款係「經筵講官黎民表贈」。第二沓內寢上高掛堂號「永思」，落款係「翰林檢討林承芳贈」。祠堂內寢神主四櫃，祭祀六世祖元泰、七世祖君盛、八世祖宗禮、九世祖觀德；左廊三櫃，祭祀十世祖文杰、文政、文受、文昱。

攷

• 衞宗正、衞鎔。《衞氏族譜六卷》。
• 廣州市文物普查增編編纂委員會 (2014)。〈心和衞公祠〉. 出自 陳建華 等 (編)。《廣州市文物普查增編 中卷》。廣州出版社。頁 365。ISBN 978-7-5462-1837-3。