微信支付

微信支付（英文：WeChat Pay）係騰訊旗下應用程式微信內置嘅流動支付功能，以綁定銀行卡嘅快捷支付為基礎，由財付通運營同提供支付牌照。

截至2017年第四季，微信支付係中國大陸嘅第二大流動支付平台，市場佔有率達38.15%。

各地版本

微信支付香港

微信支付香港（WeChat Pay HK）喺2018年1月開始可以用部份網上銀行同信用卡增值。同年9月底，港版微信支付接入香港轉數快（FPS），可以即時將錢由本地銀行戶口或者其他電子銀包轉入，但係轉出功能就暫時未開放。

2021年，微信支付香港做咗香港政府嘅消費券計劃嘅其中一個指定儲值支付工具。

爭議同事件

逃稅爭議

喺一啲國家，微信支付同支付寶被視為幫中國商人逃稅嘅工具，喺2019年5月20號，尼泊爾中央銀行宣布禁止喺當地使用中國微信支付同支付寶，主要原因係因為呢兩款支付方式，會令交易變咗喺中國地區進行，款項無經過尼泊爾當地嘅銀行進行，當地中國商人可以喺冇被徵稅嘅情況下，賺取到更多嘅收入。佢哋又話，若果發現有人繼續用，會進行刑事調查。

被美國政府封殺

喺2021年1月5號，美國總統特朗普為咗遏制中國軟件應用程序對美國人構成嘅威脅，簽署咗一項行政命令，禁止包括微信支付在內嘅中國多個軟件應用相關嘅交易。