忌十三西方世界十三依個禁忌來源,眾說紛紜,有啲話北歐神話,有啲話耶穌最後晚餐。實情並無一般人諗得咁古老。現今考據,忌十三,都只係十九世紀九十年代先開始有,而且二十世紀就變本加厲。小說電影題材,加深咗依個禁忌。在此之前,根本無證據西方人咁忌十三。

荷蘭一宅,門牌避寫十三。
機場無咗十三號閘。
上海一部𨋢,四、十三、十四樓都無咗。

一九〇七年,商人作家,寫咗本小說,叫十三號禮拜五,講股票經紀,要搞死股市[1]。自始,啲人認為十三好唔吉利。一九一〇年,心理學重係好早期之時,美國心理學家,作咗個字,叫triskaidekaphobia,取自希臘文τρεισκαίδεκα,意謂怕十三,畏十三症[2]。自始更加深咗大眾印象[1]。一九八〇年,又一部美國電影斬人片,以十三號禮拜五為名。十三唔吉利又再加深同擴散開去[1]。有啲事件,亦加深西方人認為唔吉利,好似太陽神十三號升空失敗。

時至今日,有啲人忌十三,做啲奇怪嘅事。例如開派對,人數唔會十三人,就算咁啱十三人,會加隻玩具熊,或者畀錢請多個人,補到十四。有啲樓係無十三依層。有啲編號,唔寫十三,寫咗十二 A 咁。有啲人將失敗歸於十三。

古埃及,十三反而係吉利數字[3]。同樣,唐人而言,十三有大好意頭,唔會話唔吉利,唐話尤其廣東話,十三諧音實生,意謂必定生,風生水起。相反,唐人忌四,同諧音,同西人忌十三嘅反應都好似。

推斷

近代有種種故事,推斷忌十三嘅原因。

數字而言,十二經常使用,皆因佢係二、三、四、六嘅倍數,容易使用,視為完美數字。咁之後十三,係個質數,由完美變成唔完美。

北歐神話,十二神開,後洛基不請自來,結果有位被殺。第十三位賓客係唔吉利。

基督教故事,耶穌十二門徒最後晚餐,加埋十三人,咁耶穌就死。

  1. 1.0 1.1 1.2 "Why Do People Think the Number 13 Is Unlucky? Let's Talk About Triskaidekaphobia".
  2. "Abnormal Psychology" p. 319, published in 1910, Moffat, Yard and company (New York). Library of Congress Control No. 10011167.
  3. "What's so unlucky about the number 13?".