情色
情色（希臘文：ἐρωτικός，羅馬拼音：erōtikós；英文：erotica）係指涉及實質上嘅色情（erotic）、性刺激或性鼓勵主題嘅文學或藝術作品。
.jpg)
.jpg)
一啲評論家將「色情物品」（pornography ）睇成情色作品既一種，但係好多人認為佢哋係唔同既文學形式。色情藝術可能會用藝術形式嚟描繪色情內容，包括繪畫、雕塑、戲劇、電影或者音樂。色情文學同色情攝影本身已經形成咗一種藝術流派。情色亦都存在住好多次類型，針對唔同目標群體既性偏好，包括男同性戀、女同性戀、女性、束縛、怪物同觸手酷刑（日文：触手責め；英文：tentacle erotica）等。
歷史
編輯情色以多種唔同既形式存在，既有現代既，亦有古代既。色情藝術可以追溯到舊石器時代，呢個時代既洞穴壁畫同女性生殖器既雕刻，引起咗研究史前史既研究人員極大既興趣[1]。古希臘同羅馬藝術描繪色情行為或人物，通常都會用男性生殖器官或者係色情意象嚟傳達生育觀念[2]。 現代情色藝術既描繪好多時都會同情色攝影交織埋一齊，包括閨房攝影同埋情色電影。對現代色情藝術既討論好多時亦都會同對鹹濕嘢既討論撈埋一齊。
更具體咁講，色情攝影既大眾市場係喺鹹濕雜誌嗰度。 呢啲雜誌當中，最具代表性既係《花花公子》，呢本成立喺20世紀50年代既男性雜誌，塑造咗現代西方媒體對性同埋性行為既睇法[3]。 鹹濕雜誌仲可能包括閨房攝影同海報模特，雖然海報模特本質上並唔一定同性有關係既[4]。
隨著現代電影製作技術既進步，色情電影已經有相當巨大既發展，包括開發咗一個大規模既卡通色情片子類型，其中最受歡迎既形式係日本既變態（日文：変態／へんたい）色情藝術[5] 。色情電影係情色既一種形式，由於佢哋喺形式同功能上好相似，所以色情電影經常俾人睇成同鹹濕電影係一樣既。
色情文學亦都可以追溯到古代，雖然唔係遠到遠古時期。古印度性愛經典《慾經》（Kama Sutra）可以話係最具代表性既色情文學作品，佢係喺1到6世記之間用梵文寫成既書，主要描述同描繪性、性慾、愛同埋人類情感既概念[6]。 古希臘同羅馬既情色唔淨係得視覺藝術，希臘既薩福（Sappho ）、羅馬既卡圖盧斯（Catullus）同奧維德（Ovid）等詩人都寫過情色詩同情慾抒情詩[7]。 現代色情文學通常叫做「鹹濕嘢」（smut），非常流行，尤其係喺女性當中[8]。 現代色情文學既一種流行形式係同人小說（fan fiction），或者由粉絲整出嚟嗰啲關於現有媒體系列裏面啲角色既內容。AO3作品庫、FanFiction.Net 之類既線上網站嗰度既故事佔現代情色同人小說文學既好大部分。
睇法
編輯喺現代文化，關於性既話題，好多時都係禁忌，尤其係喺媒體嗰度。 審查制度係色情作品既創作者經常需要面對既問題，無論係藝術、電影或文學都有可能需要接受某程度既審查。 世界各地創作同出版色情作品既合法性有所不同，但係對情色內容或色情媒體既出版實行嚴格監管既情況並唔罕見。
卡通色情或動畫色情電影既合法性係色情審查制度當中最具爭議既議題之一。 原因係動畫、虛構既涉及未成年人既情色或性行為既描繪係好多地方既審查制度既灰色地帶。
有關「色情物品」或者情色嘢既法律同道德問題，好可能會同有關賣淫同性工作合法化或者非刑事化既爭論聯繫喺一齊，而呢啲都係備受爭議既話題，社會好難有共識。 雖然對某啲人嚟講，色情製品仍然係一個喺道德上好有爭議性既，不過色情製品既監管通常比性工作少好多，而且生產色情製品既法律限制亦都少啲[9]。
喺英國，1857年既《淫穢出版物法》（Obscene Publications Act）將販售「淫穢」物品定為法定犯罪。 呢個法案無論係喺頒佈既時候，定係喺事後回顧當中，都備受嚴厲既批評[10]。 喺美國，幾個世紀以嚟，色情媒體既話題一直有人提交俾美國州法院同埋聯邦法院。 一啲著名既案例包括《人民控告弗里曼》（People v. Freeman），喺呢件案當中，加州堅持認為，為咗製作色情電影而僱用演員從事性活動唔會被當係「色情物品」；而喺《米勒控告加利福尼亞》（Miller v. California）既案例，色情作品提供咗嚴肅既藝術或文學價值呢個概念，被引入法律領域嗰度[11]。
喺香港，喺1987年9月1日起，實施咗香港法例第390章既《淫褻及不雅物品管制條例》（Control of Obscene and Indecent Articles Ordinance）；根據呢條條例，「任何事物因為淫褻而不宜向任何人發布，即屬淫褻」、「任何事物因為不雅而不宜向青少年發布，即屬不雅」[12]。根據《淫褻及不雅物品管制條例》規定而成立既淫褻物品審裁處（The Obscene Articles Tribunal），由一位主審裁判官同兩位或以上既審裁委員組成，目的係阻止青少年接觸不雅（indecency）同埋淫褻（obscenity）物品[13]。喺新加坡， 1967 年通過咗《1967 年不良出版物法》（The Undesirable Publications Act 1967，UPA），禁止進口、分發或複製不良出版物，呢條法案授權新加坡政府對參與銷售、供應、展覽或分發淫穢同埋令人反感既出版物既個人同公司進行定罪同懲罰[14]。新加坡喺執行呢啲條例，同埋對情色影片既管控比較嚴格，例如，有一對新加坡夫婦因為分享自己拍攝既含有裸露內容既影片到私人通訊群組，而被政府罰款1.7萬美元，原因係嗰老婆喺老公拍攝緊佢既時候，拉下上衣露出乳房[15]。
女權主義
編輯大多數色情作品都係以女性做性慾既對象，呢點喺從二十世紀中開始，以女性為中心既色情雜誌，非常流行就可以睇得出嚟[16]。 20 世紀，一群女性藝術家、作家同埋其他創作者開始創作一種新既色情作品。
女性色情作品既存在係為咗滿足女性消費者對色情材料既性滿足。 女權主義色情媒體通常以女性愉悅做中心，而唔係為咗迎合男性視角。女性主義色情藝術係20世紀中期開始蓬勃發展，最具代表性既係，將女性既裸體形象從性快感既對象，轉變成為女性性解放既象徵[17]。Martha Edelheit 係現代女性色情作品既先驅，佢透過將藝術重點放喺裸體男性形像上，徹底顛覆咗呢個流派既藝術表現手法。 喺色情媒體嗰度，男性做性慾對象並唔太罕見，但係喺以前，呢啲描繪通常都只係出現喺同性戀色情作品之中，而且通常都係由另一個男性創作或者係出版既。 Edelheit 作為女性藝術家，佢既作品係現代女性主義色情媒體既基礎[17]。
至於成人電影，以前既觀眾都係男性，直到 1984 年，前成人電影明星 Candida Royalle 創作咗佢既第一部針對女性既成人電影《Femme》[18]，喺嗰陣時開始，女性先至成為色情電影製片人眼中既潛在觀眾。 呢部電影既特色係用露骨既性愛，重點描繪同關注女性既快感，拒絕用男性成人電影既「流行鏡頭」（體外射精場景）。 佢總共拍咗16部女性成人電影；2007 年 4 月，佢推出咗一系列新電影《巧克力女人》，描繪黑人女性既性幻想[19]。
情色同色情
編輯雖然有啲觀眾可能無辦法區分情色作品（erotica ）同色情作品（pornography），但係佢哋係唔同既。本質上色情作品既目的係刺激人既情慾做目的既，而情色作品（例如情慾藝術）既目的就係表現情慾既美感[20]。
無可否認，情色同色情的確唔係咁容易分，兩者都係可以引起或者試圖引起某種性反應既描繪，呢啲描繪可以係視覺、觸覺、聽覺、嗅覺等。
不過如果睇返呢兩個字既英文來源就可以略知一二。情色（Erotica）源自希臘神話既愛神 Eros，係指一切同性愛或性慾有關既嘢同感覺，簡單啲講，情色一般唔係以引起官能刺激為目的，性只係用嚟反映人同人既關係、社會現象、舖排故事，甚至係表達一啲哲學或者藝術概念等。而 Pornography（色情）就源自希臘文 porne（賣淫）同 graphos（有描寫既意思），簡單啲講就係所有同妓女生活或者行為有關既描述，例如猥褻、淫穢既文字、影像或者其他相關作品。
有啲有情色內容既小說，因為情色唔係佢哋既重點，所以描寫情色既部分未必好多，睇完整本小說，而完全錯過咗情色元素係有可能既，例如《紅樓夢》第五回[21]用咗好多筆墨，好密集咁描繪咗秦可卿間房既擺設，充滿咗情色暗示，呢啲描繪係後面寫太虛幻境寶玉既性啟蒙、第六回既「賈寶玉初試雲雨情」[22]同埋佢同一眾女仔既情欲關係做鋪墊。不過因為寫得比較含蓄，如果讀者用速讀既方法去睇呢本小說，未必一定會留意。
而《紅樓夢》第二十三回《西廂記妙詞通戲語，牡丹亭艷曲警芳心》[23]賈寶玉同林黛玉喺大觀園偷睇既禁書《西廂記》就寫得更加隱瞞，第一本第二折「若共他多情小姐同鴛帳，怎捨得他疊被鋪床」[24]；喺第二本第三折嗰度，老夫人邀請張生赴宴，張生即時對鶯鶯有咗性幻想：「今宵歡慶，軟弱鶯鶯、可曾慣經。你索款款輕輕，燈下交鴛頸。端詳可憎，好煞人也無干凈！……俺那裡有落紅滿地胭脂冷，休辜負了良辰美景。夫人遣妾莫消停，請先生勿得推稱。俺那裡準備著鴛鴦夜月銷金帳，孔雀春風軟玉屏。樂奏合歡令，有鳳簫象板，錦瑟鸞笙。…… 小生到得臥房內，和姐姐解帶脫衣，顛鸞倒鳳，同諧魚水之歡，共效於飛之願……」[25]；喺第四本第一折嗰度，「我將這鈕扣兒松，把縷帶兒解，蘭麝散幽齋。…… 我這裡軟玉溫香抱滿懷。呀，阮肇到天台。春至人間花弄色，將柳腰款擺，花心輕拆，露滴牡丹開。…… 但蘸著些兒麻上來，魚水得和諧，嫩蕊嬌香蝶恣採。半推半就，又驚又愛，檀口搵香腮。…… 妾千金之軀，一旦棄之。此身皆托於足下，勿以他日見棄，使妾有白頭之嘆 …… 春羅原瑩白，早見紅香點嫩色…… 燈下偷睛覷，胸前著肉揣。暢奇哉！渾身通泰，不知春從何處來…… 」[26]，呢啲描述，相當細緻，但係又相當隱瞞、含蓄咁描寫崔鶯鶯喺半推半就之下同張生做咗愛，而含蓄既程度，甚至可以話係含蓄到會令一啲人睇唔太明白既地步。事後，老夫人見生米已經煮成熟飯，只好答應兩人既婚事。
情色小說既性愛描寫，其實亦可以好大膽，例如：《金瓶梅》[27]、話本小說《杜麗娘慕色還魂》同埋改編自佢既劇本《牡丹亭》[28]，雖然呢啲情色小說既寫作手法比一般小說大膽，直截講俾讀者知道佢哋做愛，不過同色情小說唔同，當中無涉及任何生殖器官既細緻描述，反而注重係內心既描寫。
對於視覺藝術，「情色」作品通常係用姿勢既擺弄、道具等形式嚟表達，而且情色藝術通常係寫實、愛情相關既，係藝術創作同藝術技巧；相反「色情」作品通常係用性愛場面、性器官既展示等方法嚟滿足觀眾既精神同身體快感，係粗糙、非真實、肉慾既。色情作品既目的係對露骨既性場景進行描述，色情作品試圖講述一個涉及性主題既故事，而唔係藝術既表達。
簡單啲講，情色作品會比色情作品有更合理既人性描述。 而喺性描述既時候，涉及有辱人格或者剝削既作品，往往都俾人認為係「色情作品」，而唔係「情色作品」。 好多國家都有法律禁止或者係至少規範，嗰啲涉及色情既內容，呢啲禁止或者規範通常都唔適用係情色內容。
對反色情活動家 Andrea Dworkin 嚟講，「情色小說就係高級既色情作品；更好既製作、更好既構思、更好既執行、更好既包裝，係為咗更好既消費階層而設計既。[29]」 女性主義作家 Gloria Steinem 將情色同色情區分開來，佢認為：「情色同色情既唔同，就好似愛同強姦既唔同，尊嚴同羞辱既不同，夥伴關係同奴役關係既唔同，快樂同痛苦既唔同」 ，佢既論點取決於互惠同統治之間既區別，佢亦都話：「無論係明目張膽既，定係微妙既，色情作品都不會涉及平等既權力或關係；事實上，大部分既緊張同戲劇性都係嚟自於一個人支配另一個人。」[30]
參考
編輯- ↑ Rudgley, Richard (January 25, 2000). The Lost Civilizations of the Stone Age. Simon and Schuster. pp. 193–196. ISBN 9780684862705.
- ↑ Johns, Catherine (2000). Sex or Symbol? Erotic Images of Greece and Rome. ISBN 0415925673.
- ↑ "Why America loved Playboy". BBC News (英國英文). 2015-10-14. 喺2023-11-30搵到.
- ↑ Childs, Peter; Storry, Mike, 編 (2014). Encyclopedia of contemporary British culture (第First issued in paperback版). London New York: Routledge, Taylor & Francis Group. ISBN 978-0-415-14726-2.
- ↑ Short, Mary B.; Black, Lora; Smith, Angela H.; Wetterneck, Chad T.; Wells, Daryl E. (January 2012). "A Review of Internet Pornography Use Research: Methodology and Content from the Past 10 Years". Cyberpsychology, Behavior, and Social Networking (英文). 15 (1): 13–23. doi:10.1089/cyber.2010.0477. ISSN 2152-2715.
- ↑ Doniger, Wendy (2002). "On the Kamasutra". Daedalus. 131 (2): 126–129. ISSN 0011-5266. JSTOR 20027767.
- ↑ Parker, Derek, 編 (1980). An anthology of erotic verse. London: Constable. ISBN 978-0-09-463500-5.
- ↑ Miller, Alyson (December 2013). "Scandalous women: Gender and identity in top-notch smut". Journal of Gender Studies (英文). 22 (4): 367–382. doi:10.1080/09589236.2012.681186. ISSN 0958-9236.
- ↑ Weitzer, Ronald (2023). Sex for Sale: Prostitution, Pornography, and Erotic Dancing (第3版). ISBN 9781032133157.
- ↑ Drake, Miriam A., 編 (2003). Encyclopedia of library and information science. 1: Abs - Dec, pages 1 - 802 (第2版). New York Basel: Dekker. ISBN 978-0-8247-2077-3.
- ↑ Reese, Debbie-Anne; Kyle. "Obscenity and Pornography". Georgetown Journal of Gender and Law. 4: 138–142 –透過HeinOnline.
- ↑ "Hong Kong e-Legislation". www.elegislation.gov.hk. 喺2024-03-01搵到.
- ↑ https://www.judiciary.hk/zh/court_services_facilities/oat.html
- ↑ "TRANSCRIPT OF PARLIAMENTARY DEBATE ON THE UNDESIRABLE PUBLICATIONS (AMENDMENT) BILL, 19 FEB 98". www.nas.gov.sg. 喺2024-03-01搵到.
- ↑ 黃瑞黎 (2023-03-07)。〈新加坡夫婦分享情色影片到群聊，被政府罰款1.7萬美元〉。《紐約時報中文網》 (中文)。喺2024-03-01搵到。
- ↑ "Why America loved Playboy". BBC News (英國英文). 2015-10-14. 喺2023-11-30搵到.
- ↑ 17.0 17.1 McDonald, Helen, 1949- (2001). Erotic ambiguities : the female nude in art. London: Routledge. p. 3. ISBN 978-0-203-44870-0 OCLC 51161504
- ↑ Niemi, R. Lauren; Royalle, Candida (1992-05-01), Femme, Rhonda Jo Petty, Jerry Butler, Tish Ambrose, Femme Productions, Lunarex Ltd., 喺2024-03-01搵到
- ↑ "Femme Chocolat" (美國英文). 喺2024-03-01搵到.
- ↑ 林子龍 (2012)。〈情慾圖像藝術性的論述：藝術昇華〉 (PDF)。《臺北市立教育大學學報》。43(1): 81–103。
- ↑ 〈脂硯齋重評石頭記甲戌本/第五回 - 維基文庫，自由的圖書館〉。zh.wikisource.org (繁體中文)。喺2024-03-01搵到。
- ↑ 〈脂硯齋重評石頭記甲戌本/第六回 - 维基文库，自由的图书馆〉。zh.wikisource.org (中文)。喺2024-03-01搵到。
- ↑ 〈紅樓夢/第023回 - 維基文庫，自由的圖書館〉。zh.wikisource.org (繁體中文)。喺2024-03-01搵到。
- ↑ 〈西廂記/第1本 - 维基文库，自由的图书馆〉。zh.wikisource.org (中文)。喺2024-03-01搵到。
- ↑ 〈西廂記/第2本 - 维基文库，自由的图书馆〉。zh.wikisource.org (中文)。喺2024-03-01搵到。
- ↑ 〈西廂記/第4本 - 维基文库，自由的图书馆〉。zh.wikisource.org (中文)。喺2024-03-01搵到。
- ↑ 〈金瓶梅 - 維基文庫，自由的圖書館〉。zh.wikisource.org (繁體中文)。喺2024-03-01搵到。
- ↑ 〈牡丹亭〉。zh.wikisource.org (繁體中文)。喺2024-03-01搵到。
{{cite web}}: CS1 maint: url-status (link) - ↑ Dworkin, Andrea (1981). Pornography: Men Possessing Women. Putnam. p. 39. ISBN 978-0-399-12619-2.
- ↑ Steinem, Gloria (1984). Outrageous Acts and Everyday Rebellions (第1版). New York: Henry Holt & Co. p. 219.