愛瞞日報

愛瞞日報
語言	中文
停刊日	2021年10月19號
網站	mcnews.cc

愛瞞日報 （粵拼：oi3 mun4 yat6 bou3，英文：Macau Concealers，原本叫愛瞞傳媒，粵拼：oi3 mun4 chyun4 mui4，Concealing Daily）係由新澳門學社成員發起出版嘅刊物，2005至2021年發行。佢哋嘅版面仿照《澳門日報》，以惡搞形式「諷刺時弊」，並以「出紙一大張，瞞遍全澳市民」為口號^[1]。

沿革編輯

2005年澳門立法會選舉期間嘅賄選同脅選問題引起社會討論。而喺選舉後，《澳門日報》登出多個議員當選祝賀廣告，凸顯咗澳門日報社會主義嘅立場。另外，當時正值第四屆東亞運動會舉行，當中嘅開支失控問題隨住東亞運嘅結束而逐漸浮現^[2]。澳門嘅城市規劃同公帑浪費問題亦深受關注。喺呢種社會氣氛下，時值澳門大學學生嘅周庭希等發起出版《愛瞞日報》，指出係「因為澳門有好多事被隱瞞住」先有出版嘅念頭^[1]。

《愛瞞日報》諧仿《澳門日報》嘅讀音同版面，諷刺《澳門日報》報社嘅親政府立場，同時亦諷刺澳門嘅時弊^[3]。

喺第一期出版前，網上流傳住一份叫做「愛瞞日報」嘅「報章」，但實際上係「盜版」嘅作品，因為當時第31期《新澳門》並未出版，而當時《愛瞞日報》並非獨立刊物。直至2005年11月底，《新澳門》第31期出版，《愛瞞日報》先正式問世，並喺創刊號發表啟事，對喺製作期間曾經被竊取盜用予以譴責。^{[未記出處或冇根據]}

由於新澳門學社會將每一期《新澳門》上載到官方網站，所以《愛瞞日報》成日喺討論區被轉載或者作電郵轉寄，受到部份澳門網民歡迎^[4]。

《愛瞞日報》由2010年11月開始獨立出刊。2012年12月正式喺澳門新聞局以《愛瞞傳媒》名義登記，獲出版登記編號456，2013年3月開設新聞網站。

《愛瞞日報》喺2021年10月19號之後停止運作^[5]。