慈山寺
慈山寺（粵拼：ci4 san1 zi2；英文：Tsz Shan Monastery）係香港嘅佛教修道寺院，喺大埔洞梓。曾獲香港富商李嘉誠捐款與建，二〇一四年落成，北靠山，南近海。入面有座好高觀音像，喺黃嶺山腳底，色白垂頭，大埔海、船灣對岸都望到佢。交通要靠大埔東面汀角路、經洞梓路，再由專屬普門路入。現時一週只對外開六日，禮拜一閉寺靜修，兼且要早早預約先可以到臨。
二〇一九年，觀音像下，加設慈山寺佛教藝術博物館。
屋宇
編輯慈山寺所有屋宇，皆由鋼筋石屎建造，石屎以非洲紫檀木包實，外觀好似木造咁。美觀之餘亦防火。
慈山寺以山門、彌勒殿同埋大雄寶殿為軸線，南低北高，層層推上。南端為一臺，可遠觀山海之景。臺北階梯，直達山門。
山門右行有講廳，有地藏殿，五經堂等。彌勒殿左右有鐘樓、鼓樓。大雄寶殿前，左邊有藏經閣，右邊有普門。普門殿後有觀音像，像下有慈山寺佛教藝術博物館。
山門
編輯山門之外，門上掛咗個扁，寫咗「入解脫門」。一左一右，有青銅鑄金剛力士，俗名哼哈二將，守喺山門。合口者為哼，口吽形，密跡金剛力士，守喺左邊。開口者為哈，即口阿形，那羅延堅固王，守喺右邊。
山門之內，門上掛咗個扁，寫咗「不二法門」。