戴叔倫
中國唐代詩人
戴叔倫（粵拼：daai3 suk1 leon4；732年—789年7月10號[註 1]），字幼公（jau3 gung1），一作次公（ci3 gung1）[註 2]，潤州金壇人（而家江蘇金壇），係中國唐代詩人。
| 戴叔倫 | |
|---|---|
| 字 | 幼公/次公 |
| 出世 | 732年 |
| 死 | 789年7月10號 |
| 墓地 | 江蘇常州金壇金城鎮愚池社區 |
| 籍貫 | 潤州金壇 |
| 職業 | 詩人、官員 |
| 風格 | 大曆詩風 |
安史之亂時，爲咗避兵亂，戴叔倫全家搬去京口（而家江蘇鎮江）[註 3]，爲咗習得學問，佢入咗蕭穎士嘅門下，後來成爲門人當中最叻嘅門生。戴叔倫喺唐代宗廣德初年做祕書省正字[註 4]。大曆元年（766年），佢入劉晏幕下，當時劉晏做戶部尚書充諸道鹽鐵使，受劉晏表奏，戴叔倫做監察御史。唐德宗建中初年做婺州嘅東陽縣令（而家浙江東陽），對啲勤務做得好認真[註 5]。之後佢又入江西觀察使幕府，做大理寺司直。興元元年（784年）做撫州刺史（而家江西臨川）[註 6]。貞元元年（785年）十一月寫《賀平賊赦表》[註 7]，任職吏部郎中，貞元二年（786年）辭官歸鄉，四年（788年）復出做容州刺史兼容管經略使（而家廣西容縣）[註 8]。佢歷任咁多地方官，都施行善政，所以獲得居民仰慕。貞元五年（789年）7月10號喺路途上過身[註 1][註 9]。
而今，有兩卷《戴叔倫》留低。戴叔倫嘅詩以描寫農村生活爲主，例如《女耕田行》寫女人耕田嘅辛苦，《邊城曲》寫士兵遠戍嘅痛苦。佢寫詩講究韻味，曾經評詩話「詩家之景﹐如藍田日暖﹐良玉生煙﹐可望而不可置於眉睫之前也。」[註 10]，係後世神韻派嘅先導。《全唐詩》收有戴叔倫嘅詩304首，但當中有好多係偽作，據蔣寅嘅考證，可信嘅散落喺唐宋元文獻嘅有148首，60首判斷唔到真僞，56首偽作[註 11]。
註
編輯- ↑ 1.0 1.1 梁肅《戴叔倫神道碑》：「凡歷官十一任，享壽五十八。罷，歲在己巳六月（貞元五年）遭疾，歸全於南海清遠縣。」權德輿《戴叔倫墓志銘》：「維貞元五年夏四月、容州刺史經略使侍御史誰縣男戴公至部之三月，以疾受代，回車販駱，六月甲申次於清遠峽而莞，春秋五十八」（《權載之文集》卷二四）。查兩千年中西曆轉換，貞元五年六月甲申即係西元789年7月10號；「五十八」係虛歲，得出出世年係732年。
- ↑ 字幼公係據《新唐書》嘅傳記，字次公出自陸長源《唐東陽令戴公去思頌》。
- ↑ 《唐才子傳》寫話戴叔倫家族避亂去鄱陽（而家江西鄱陽縣），呢個係作者據戴叔倫啲詩發揮嘅，所以唔係。見《唐才子傳》李立朴嘅注釋。
- ↑ 《唐才子傳》寫話貞元十六年（800年），戴叔倫及第進士，但據墓誌銘，戴叔倫死於貞元五年，所以無可能喺十六年及第。據蔣寅攷據，戴叔倫進士及第嘅年歲不可攷，大約喺至德二年（757年）到廣德二年（764年）間。
- ↑ 墓誌銘記：「其阜人成化也，則東陽一同之人沐旬歲之治。」
- ↑ 梁肅《戴公神道碑》「會有詔擇二千石，試守撫州刺史，周月即真。」
- ↑ 《文苑英華》卷599。
- ↑ 《唐國史補》：「貞元五年，初置中和節。御製詩，朝臣奉和，詔寫本賜戴叔倫於容州，天下榮之」。
- ↑ 《唐才子傳》話佢辭職去做道士，無耐就死咗。但《新唐書》嘅傳記同墓誌銘都話佢死喺路上，無話佢去做道士。
- ↑ 司空圖《與極浦書》
- ↑ 據蔣寅《戴叔倫詩集校注》。
參攷資料
編輯- 歐陽脩、宋祁。〈列傳第六十八：戴叔倫傳〉. 《《新唐書》》。
- 辛文房（著）；李立朴（注）。〈卷五：戴叔倫傳〉. 《《唐才子傳》》。臺灣古籍出版社。
- 前野直彬註解。《《唐詩選》》 (日文)。岩波書店。