打仗原則

打仗原則（粵拼：daa2 zoeng3 jyun4 zat1；英文：principles of war）係指一套套教人點樣行軍打仗嘅法則。

軍事教育上常用嘅模擬打仗遊戲棋盤

重要概念

睇埋：軍事戰略

到咗廿一世紀初，並冇一套全人類統一嘅打仗原則，而係世界各國各有自己嘅軍事傳統。不過有一啲戰略概念係世界各國嘅打仗原則普遍都會考慮嘅：

• 目的（goal）：每一場軍事行動都要係為咗某個清楚界定咗、而且有可能達到嘅意圖而做嘅；打仗最主要嘅目的係要令到敵人（因為部隊傷亡或者士氣低落等嘅原因）無力還擊，而喺達到呢個終極目的嘅中途，一隊軍隊要達到好多細啲嘅目的－例如「攻下呢個據點」同「確保呢隊部隊得到充足嘅物資」呀噉。
• 攻擊（offense）：攻擊喺軍事戰略上係軍事行動一種，指派出自己部隊，為嘅係要達到「拿下敵人嘅陣地」等嘅軍事目的；攻擊可以好有用，例如如果一隊軍隊能夠進攻佔領敵軍嘅一個重要港口，就有可能做到局部切斷敵軍嘅物資供應嘅效果，令敵軍嘅行動嚴重受阻。唔同嘅打仗原則對「攻擊要點樣使用」呢一點有唔同嘅見解。
• 集中火力（force concentration）：軍事戰略上一般認為，「優勢」會隨「人數」嘅二次方增長，即係話四個打兩個嘅優勢（$4^{2}-2^{2}=12$）超過三個打兩個（$3^{2}-2^{2}=5$）嘅兩倍，所以集結一大隊人進行軍事行動會令嗰場軍事行動嘅贏面激增；因為噉，打仗原則一般會思考「喺乜嘢情況下要用集中火力呢一張皇牌」嘅問題。
• 軍隊經濟（economy of force）：打仗一定要作出資源分配方面嘅考量；打仗係一樣好花人力物力嘅嘢，最簡單嘅例子係，啲士兵都要食嘢先有力打仗，所以一隊軍隊實要監察住自己嘅糧食供應，仲有要諗點樣安排糧食運輸先可以確保糧食能夠有效率噉運去前線部隊嗰度；「軍隊經濟」就係指打仗嘅經濟學－思考自己嘅軍隊當中有邊啲重要嘅資源，以及呢啲資源要點樣分配。
• 間接行動（indirect approach）：指軍事行動最好係沿會遇到最少障礙嘅路線進行，噉先可以節時省力，例如假如有兩條進攻路線都可以幫自己部隊到達某個目的地，就應該揀行冇咁嘥力嘥時間（遇到敵人嘅機會率比較低、冇咁崎嶇）嗰條。
• 統一指揮原則（unity of command）：指任何一個軍事目的都要有一個中央指揮官；一隊典型嘅軍隊會分階級，每一場軍事行動都會由某一個人負責指揮，而軍隊整體都會有一個人做指揮（例如係將軍，不過唔同國家嘅軍隊分階方法都唔同），一班受指揮嘅人冚唪唥都要向指揮官報告自己做嘅嘢，而指揮官就要負責睇實每一個人或者一隊人做緊啲乜，並且作出適當嘅應變同俾出適當嘅命令。一般認為，跟從統一指揮原則嘅軍隊先至會有效率。
• 簡單（simplicity）：指一個戰略計劃要盡可能簡單，唔好有啲不必要嘅複雜性；複雜得滯嘅戰略計劃往往會喺執行上容易出問題，例如係啲士兵覺得個計劃難明，或者對個計劃有誤解搞到中途出錯呀噉。

... 等等。除咗喺打仗嗰陣有用，呢啲打仗原則有好多都可以應用落去軍事以外嘅場合嗰度，例如喺策略管理上都有討論，一間公司嘅管理者可以將市場佔有率想像成領土，思考集中火力相關原則嘅使用同埋喺乜嘢時候要集中火力攻打自己嘅目標市場。

一位美國空軍嘅後勤人員喺度打點啲醫療物資嘅運送。 一位美國空軍嘅後勤人員喺度打點啲醫療物資嘅運送。  窩打老戰役其中一場戰鬥嘅地圖；幅圖描述唔同軍隊嘅人馬分別嘅移動。 窩打老戰役其中一場戰鬥嘅地圖；幅圖描述唔同軍隊嘅人馬分別嘅移動。  喺二戰俾斯麥海海戰重挫日軍嘅佐治·肯尼將軍；佢係嗰場戰事嘅美軍指揮官。 喺二戰俾斯麥海海戰重挫日軍嘅佐治·肯尼將軍；佢係嗰場戰事嘅美軍指揮官。

睇埋

• 策略
• 軍事策略
• 孫子兵法

文獻

• merson, Harrington, Twelve Principles of Efficiency, Kessinger Publishing, 2003.