一班軍人喺度思考打仗用嘅策略
一班阿伯喺度捉象棋,思考用乜策略先可以贏。
一班人喺度玩星際爭霸,每個玩家都要考慮自己揀邊個策略先最大機會贏。

策略粵拼caak3 loek6英文strategy希臘文στρατηγία,「stratēgia」[1]),亦即係所謂嘅兵法,係指喺有不確定性(uncertainty)嘅情況下,用嚟達到一個或者多個目標嘅高層次計劃,當中「目標」好多時係「要喺某啲方面打低對手[2][3]

策略相對於戰術(tactics),但兩個概念相輔相成:喺一場一對一嘅對局當中,雙方都有若干個可能採取嘅行動,其中一個行動係所謂嘅戰術(用嚟達到短期目標嘅實質行動),而策略係指其中一方對於「整體嚟講,應該點樣達到目標」嘅宏觀計劃,而且往往會指定乜嘢時候應該用乜嘢戰術;舉個例說明,家陣有個玩家玩緊一隻射擊遊戲,佢嘅計劃係「盡可能喺對手留意唔到嗰陣移到對手側面,並且進行側擊」,而當佢喺某個時間地點撞到一個對手,佢採取嘅行動係「移去對手側面,進行側擊」-嗰個計劃係佢嘅策略,而嗰個行動就係佢嘅戰術。一個策略會講明行動者大致上有乜戰術可以用,以及呢啲戰術分別要喺乜嘢時候使用[3][4]

商學軍事學等領域上嘅學者有對策略思考(strategic thinking)嘅課題著墨-即係有關「要點樣制定策略」以及「點樣教人制定策略」(後者喺管理學教育同軍訓上相當受重視)等嘅問題。呢啲學者諗出咗多個唔同嘅理論框架,講制定策略嘅步驟,務求對策略思考建立更深入嘅了解以及更有效噉教人做策略思考[5][6]

定義

 
東周軍事家孫子嘅畫像;佢嗰本名著《孫子兵法》到咗今日都仲有好多人會攞嚟參考。

核心結構

美國著名管理學者李察·魯梅德(Richard P. Rumelt)主張,策略最主要嘅部份係思考點樣克服挑戰。根據佢嘅見解,理想(能夠有效率噉幫決策者達成目的)嘅策略有一個佢稱之為「核心」(kernel)嘅結構。一個策略核心有三大組成部份,呢三大部份嘅定義大致如下[7][8]

  1. 診斷(diagnosis):一個策略家首先需要知道佢達到目的嘅過程會遇到邊啲主要挑戰(例如係對手會作出乜嘢行動,而呢啲行動會點樣阻礙自己達到目的);喺好多情況下,個策略家發現會遇到嘅挑戰有好多個,不過當中有一啲比較重大,有一啲比較濕碎。
  2. 引導政策(guiding policy):然後個策略家就要知道每一個挑戰要用乜方法應付;個策略家仲好可能要作出取捨-每個挑戰嘅應付方法都會消耗時間同錢等嘅資源,所以個策略家一定要考慮資源分配,集中處理比較重大嗰啲挑戰。
  3. 連貫行動(coherent action):最後個策略家就要有一套具體嘅行動嚟執行佢嗰套引導政策-「具體」嘅意思即係話,呢啲行動要有明確清晰嘅定義,需要確保接收策略家嘅指令叫佢哋做嘢嘅人(通常係下屬)能夠一聽就知自己要做乜。

以美國第 35 任總統約翰甘迺迪(John Kennedy)喺 1962 年 10 月 22 號就古巴導彈危機所發表嘅演講為例[9]

診斷
原版英文:"This Government, as promised, has maintained the closest surveillance of the Soviet military buildup on the island of Cuba. Within the past week, unmistakable evidence has established the fact that a series of offensive missile sites are now in preparation on that imprisoned island. The purpose of these bases can be none other than to provide a nuclear strike capability against the Western Hemisphere."

粵文翻譯:呢個政府,一如承諾,一路都有密切噉監察住古巴呢個島仔上嘅蘇聯軍事力量積聚。喺上個禮拜之內經已搵到無可否定嘅證據,證明啲人喺嗰個受監禁嘅島仔上準備緊一連串嘅攻擊性導彈發射區。而呢個基地嘅存在目的淨係想要(為蘇聯)提供針對西半球嘅核攻擊能力。

引導政策
原版英文:"Our unswerving objective, therefore, must be to prevent the use of these missiles against this or any other country, and to secure their withdrawal or elimination from the Western Hemisphere."

粵文翻譯:所以我哋堅定不移嘅目的一定係要防止呢啲導彈被用嚟攻擊呢個國家(指美國)或者任何其他國家,以及確保佢哋(呢啲攻擊性導彈發射區)由西半球撤走或者清除。

連貫行動
原版英文:"First among seven numbered steps was the following: "To halt this offensive buildup a strict quarantine on all offensive military equipment under shipment to Cuba is being initiated. All ships of any kind bound for Cuba from whatever nation or port will, if found to contain cargoes of offensive weapons, be turned back."

粵文翻譯:我哋有七步行動要採取,其中第一步如下:「為咗要制止呢股攻擊性嘅軍事力量積聚,我哋正開始對所有要運去古巴嘅攻擊性軍事設備作出嚴格嘅封鎖。嚟自任何國家港口、任何類型前往古巴嘅船隻,如果被發現有運載攻擊性武器,都會被下令回航。」

數學性定義

 
圖 1;一場假想嘅博弈
內文: 策略 (博弈論)

博弈論(game theory)係應用數學上嘅一套理論框架,研究曉做決策嘅個體點樣互動,對「策略」呢個詞有比較數學性嘅概念化:博弈論會將一場博弈(game)想像成一件數學物體,一場博弈由某啲規則同若干個參與者組成,每個參與者手上都有一柞可能選擇,而對於一個參與者嚟講,佢每個選擇都會引致某啲得失,得失由博弈嘅規則話事;每一個參與者會想令自己嘅利益最多,並且按照呢條原則做決策。捉棋、打機以至國際關係等好多現象都可以想像成博弈[10]

喺博弈論上,策略可以想像成一個博弈者做決策所用嘅演算法(algorithm)[10][11],例如:

 估對手會揀邊個選擇;
 if 估對手會揀選擇 A,
   then 揀選擇 B;
   else 揀選擇 A。

舉個簡單嘅例子說明,想像家吓有兩間公司,叫公司 1(firm 1)同公司 2(firm 2),喺度鬥爭一個市場嘅買家,每間公司都有兩個選擇,一係揀「進入市場」(entry,簡稱「E」),一係揀「遲啲先進入市場」(delay entry,簡稱「DE」)。喺呢個個案之下,如果兩間同時進入市場嘅話,佢哋都會各自損失 4,000,000 文嘅盈利;而如果公司 1 而家進入市場,而公司 2 揀遲啲先入,噉公司 1 會得到 6,000,000 文嘅盈利,而公司 2 乜嘢都得唔到;淨低嘅情況可以睇圖 1。喺呢個形勢之下,對於公司 1 嚟講,揀 DE 嘅話實蝕,相比之下,佢揀 E 嘅話至少會蝕少啲,甚至有機會賺(如果公司 2 揀 DE 嘅話),同時,就算公司 2 知道呢點,佢可能都會因為唔想蝕 4,000,000 而焗住揀 DE。如果係噉,最後結果會係公司 1 賺 6,000,000,而公司 2 冇得益冇損失。兩間公司「按呢套分析得出嘅結果,揀令自己得益最大化嘅選擇」就係佢哋嘅策略[10]

營商策略

睇埋:策略管理營銷策略同埋投資策略

策略喺商學上係一個大課題:管理學(management)係研究要點帶領商業組織、等自己組織效益最大化嘅學問,所以會有興趣研究「組織嘅決策者要點為組織制定策略」等嘅課題,形成策略管理呢一門學問[12]市場學(marketing)旨在研究搵出消費者需求以及點樣令自己嘅產品最有效噉滿足呢啲需求,等自己嘅盈利最大化,所以對營銷策略等嘅課題有相當著墨[13]經濟學(economics)用數學模型研究資源嘅分配,所以經濟學家有數學方法分析要點樣令成本最小化,而呢類有關資源分配嘅問題喺制定策略上相當重要[14]。以下係比較基本嗰啲營商策略概念[註 1][15]

競爭優勢

 
唔同牌子嘅汽水大致都係「嘅有汽嘢飲」;一隻汽水牌子要點先可以有競爭優勢,滿足對手滿足唔到嘅慾望?
內文: 競爭優勢

競爭優勢(competitive advantage)係策略管理上最基本嘅概念之一,指令到一個競爭者(想像一間公司)成功噉喺競爭當中打低對手(攞到更大嘅市場佔有率)嘅因素[註 2]。最簡單直接嘅競爭優勢係以(同對手相比)更低嘅成本提供更優質嘅貨品服務,靠噉嚟吸引買家買自己嘅貨品服務,最後令自己賺取到更大嘅利潤[註 3],而要達到呢種競爭優勢又有好多途徑,例如一間公司嘅產品設計(product design)工序會決定貨品服務嘅質素,因而會影響間公司嘅競爭優勢[16][17]

喺對競爭優勢嘅思考上,競爭優勢嘅可持續性(sustainability)係一個重要嘅問題;一個競爭優勢嘅可持續性係指個競爭優勢有幾容易維持,舉兩個例子說明[16][18]

  • 想像而家某個先進國家 A 國,A 國國內有若干間公司生產汽車,而 A 國嘅鄰國 B 國工業啱啱起步,所以工人嘅人工(生產成本)明顯低過 A 國,於是其中一間 A 國汽車公司就將自己啲工廠搬嗮去 B 國,等自己可以用更低成本生產汽車,然後用平啲嘅價錢賣自己嗰啲質素上同競爭對手相約嘅汽車,得到一個競爭優勢,不過假如佢啲競爭對手喺搬廠上唔受限嘅話,呢個優勢維持唔到幾耐(可持續性低)-佢啲競爭對手大可以跟住就搬廠去 B 國,然後話咁快 A 國啲汽車公司就冚唪唥都以一樣嘅低價賣汽車;
  • 想像而家有若干間遊戲開發商開發遊戲嘅公司或者團隊),其中一個開發商(叫開發商 C),C 嘅團隊當中有勞夫呢一位天才遊戲設計師,勞夫能夠係噉設計出第啲遊戲設計師設計唔到嘅精彩遊戲,而且佢對 C 非常忠誠,冇興趣為 C 以外嘅遊戲開發商工作,噉 C 就有一個維持到好耐嘅競爭優勢(可持續性高)- C 嘅競爭對手因為冇勞夫呢個天才,所以喺開發嘅遊戲嘅質素上差過 C,而且勞夫冇打算幫 C 以外嘅遊戲開發商做嘢,所以 C 嘅競爭優勢會維持一段長嘅時間[19][20]

核心能力

內文: 核心能力

核心能力(core competency)係指一間公司(同競爭對手相比)零舍擅長做嘅工作。公司之間喺專業知識組織文化以及固有客源等各方面都唔同,一間公司嘅成員會喺生產嘅過程當中由呢啲嘢嗰度學習,令到唔同公司之間喺「成員擅長做啲乜」上有差異[21][22]。如果有一間公司:

  1. 零舍擅長做某啲工作(例:一間遊戲製作商開發射擊遊戲嘅經驗特別豐富,所以特別叻整射擊遊戲),
  2. 呢啲能力唔係佢哋啲競爭對手能夠輕易噉模仿嘅(例:開發遊戲嘅經驗往往係要用數以年計嘅時間累積嘅),而且
  3. 呢啲能力能夠為啲客提供更高質素嘅貨品服務-即係能夠提供競爭優勢(例:因為富有經驗,能夠開發更加好玩嘅射擊遊戲),

噉佢哋嘅呢啲能力就算係佢哋嘅核心能力[23]。管理學上一般認為,一間公司喺做策略性嘅決定嗰陣,需要認清自己嘅核心能力,理解到邊啲情況自己有能耐打低競爭對手、邊啲情況自己會輸,而遇到後者嘅情況嗰時就需要退讓,用守勢減低損失[21][22]

基本競爭策略

內文: 基本競爭策略

基本競爭策略(generic strategies)係由美國著名經濟學家米高波特(Michael Porter)提出嘅一個諗法。根據基本競爭策略,一間公司想要爭取競爭優勢,基本上只有三種策略[24]

  • 成本領導性(overall cost leadership):指降低成本,務求有同類公司當中最低嘅成本;用呢種策略嘅公司一般係自己喺效率、規模或者經驗(睇經驗學習曲線)上優勝過對手;
  • 差異化(differentiation):指改變自己嘅產品,務求令到自己提供嘅貨品服務質素優越過競爭對手嘅,所以就算價格一樣都會有更多消費者肯買;
  • 集中(focus):指專化成淨係專攻市場當中嘅某一部份,例如由專門賣運動用品專化成專門賣足球用品,等自己喺生產足球用品嘅成本同質素都變得更有競爭力。

以上呢三種基本競爭策略可以想像成下圖噉嘅樣[25]

一般認為,三個基本競爭策略各有優劣:成本領導性同產品差異化都唔重視專化落市場嘅某一部份,但前者重視成本,後者重視質素,冇得成本優勢同質素優勢兼得;集中就係想成本優勢同質素優勢兼得,但就要犧牲公司嘅覆蓋面,而一旦集中選擇咗嗰個市場因為外在因素唔增長,就會令間公司喺擴張上受阻(例:足球嘅人氣唔上升,搞到足球用品嘅市場唔增長)[註 4]。根據米高波特嘅建議,一間公司喺選擇基本競爭策略嗰陣必需要做取捨(睇埋機會成本),最理想係要淨係揀其中一種基本競爭策略,如果唔係就好容易三頭唔到岸[24]

商業模式

內文: 商業模式

商業模式(business model)係指一間公司有關「要點樣達到自己目的」(正路係賺取高嘅利潤)嘅詳細策略計劃。一個商業模式會講明以下嘅資訊[26][27][28]

  • 間公司要提供乜嘢貨品或者服務,以及呢啲貨品服務對客嚟講有乜經濟價值(會令客肯俾錢買呢啲貨品服務);
  • 間公司主打乜嘢市場
  • 間公司有乜競爭對手;
  • 間公司嘅核心能力係乜,可以得到乜嘢競爭優勢
  • 間公司要提供做到呢啲嘢需要用到啲乜嘢資源,以及間公司要點確保呢啲資源嘅供應(可以睇價值鏈);

...等等。

舉個例說明,想像家陣有個遊戲開發者要諗佢哋嘅商業模式,佢哋要度嘅有以下嘅嘢[29]

  • 佢哋要開發一隻遊戲  ,呢隻遊戲能夠滿足乜嘢需求;
  •   主要吸引乜嘢類型(性別、年齡、喜好)嘅玩家
  • 喺經已存在喺市面上嘅遊戲或者好快會出嘅遊戲當中,有邊啲有可能係  替代品
  • 佢哋有啲乜嘢專長,而呢點會令   同競爭對手喺設計上有邊啲唔同嘅地方,令   具有獨特價值;
  • 要開發   需要乜嘢人員,請呢啲人員要使幾多同第啲資源,呢啲資源要點樣籌募;

...等等。

軍事戰略

 
軍事教育上常用嘅模擬打仗遊戲棋盤
內文: 軍事戰略

軍事戰略(military strategy)泛指一系列俾軍事組織運用嚟達到戰略目的嘅諗頭,即係狹義上嘅兵法。軍事戰略涉及軍事行動嘅計劃同執行、軍隊嘅管理、以及軍事情報嘅控制等等嘅作業。漢字文化圈當中嘅軍事戰略思考源自東周時期軍事家孫子(公元前 544 至 496 年)嘅名著《孫子兵法》,佢喺呢本著作當中提出好多有關軍事戰略嘅諗頭,對成個漢字文化圈嘅軍事傳統都影響深遠[30]。而孫子等一眾人類史當中嘅著名軍事家對打仗作出詳細分析,諗出咗好多現代人都仲用嘅軍事戰略概念[31]

打仗原則

內文: 打仗原則

打仗原則(principles of war)係指一套套教人點樣行軍打仗嘅法則。到咗廿一世紀初,並冇一套全人類統一嘅打仗原則,而係世界各國各有自己嘅軍事傳統。不過有一啲戰略概念係世界各國嘅打仗原則普遍都會考慮嘅[32][33]

  • 目的(goal):每一場軍事行動都要係為咗某個清楚界定咗、而且有可能達到嘅意圖而做嘅;打仗最主要嘅目的係要令到敵人(因為部隊傷亡或者士氣低落等嘅原因)無力還擊,而喺達到呢個終極目的嘅中途,一隊軍隊要達到好多細啲嘅目的-例如「攻下呢個據點」同「確保呢隊部隊得到充足嘅物資」呀噉[34]
  • 攻擊(offense):攻擊喺軍事戰略上係軍事行動一種,指派出自己部隊,為嘅係要達到「拿下敵人嘅陣地」等嘅軍事目的;攻擊可以好有用,例如如果一隊軍隊能夠進攻佔領敵軍嘅一個重要港口,就有可能做到局部切斷敵軍嘅物資供應嘅效果,令敵軍嘅行動嚴重受阻。唔同嘅打仗原則對「攻擊要點樣使用」呢一點有唔同嘅見解[35]
  • 集中火力(force concentration):軍事戰略上一般認為,「優勢」會隨「人數」嘅二次方增長,即係話四個打兩個嘅優勢( )超過三個打兩個( )嘅兩倍,所以集結一大隊人進行軍事行動會令嗰場軍事行動嘅贏面激增[36];因為噉,打仗原則一般會思考「喺乜嘢情況下要用集中火力呢一張皇牌」嘅問題[37]
  • 軍隊經濟(economy of force):打仗一定要作出資源分配方面嘅考量;打仗係一樣好花人力物力嘅嘢,最簡單嘅例子係,啲士兵都要食嘢先有力打仗,所以一隊軍隊實要監察住自己嘅糧食供應,仲有要諗點樣安排糧食運輸先可以確保糧食能夠有效率噉運去前線部隊嗰度;「軍隊經濟」就係指打仗嘅經濟學-思考自己嘅軍隊當中有邊啲重要嘅資源,以及呢啲資源要點樣分配[38]
  • 間接行動(indirect approach):指軍事行動最好係沿會遇到最少障礙嘅路線進行,噉先可以節時省力,例如假如有兩條進攻路線都可以幫自己部隊到達某個目的地,就應該揀行冇咁嘥力嘥時間(遇到敵人嘅機會率比較低、冇咁崎嶇)嗰條[39]
  • 統一指揮原則(unity of command):指任何一個軍事目的都要有一個中央指揮官;一隊典型嘅軍隊會分階級,每一場軍事行動都會由某一個人負責指揮,而軍隊整體都會有一個人做指揮(例如係將軍,不過唔同國家嘅軍隊分階方法都唔同),一班受指揮嘅人冚唪唥都要向指揮官報告自己做嘅嘢,而指揮官就要負責睇實每一個人或者一隊人做緊啲乜,並且作出適當嘅應變同俾出適當嘅命令。一般認為,跟從統一指揮原則嘅軍隊先至會有效率[40]
  • 簡單(simplicity):指一個戰略計劃要盡可能簡單,唔好有啲不必要嘅複雜性;複雜得滯嘅戰略計劃往往會喺執行上容易出問題,例如係啲士兵覺得個計劃難明,或者對個計劃有誤解搞到中途出錯呀噉[32]

... 等等。除咗喺打仗嗰陣有用,呢啲打仗原則有好多都可以應用落去軍事以外嘅場合嗰度,例如喺策略管理上都有討論,一間公司嘅管理者可以將市場佔有率想像成領土,思考集中火力相關原則嘅使用同埋喺乜嘢時候要集中火力攻打自己嘅目標市場[41][42]

出名戰略

 
一戰時嘅塹壕戰;塹壕戰涉及喺地下掘坑,俾士兵匿喺入面向敵人開火。

消耗戰

內文: 消耗戰

消耗戰(attrition)係一種軍事戰略,指透過不斷慢慢噉損耗敵人嘅人力同物力,務求令到敵人最後因為人力物力枯竭而崩潰。消耗戰會發生通常都係因為環境嘅問題,搞到進攻非常困難,於是想進攻嗰一方就焗住要用消耗戰策略,喺一個戰略重地積聚大量嘅人力同火力(同時佢嘅敵人無力噉做),慢慢噉磨損敵人嘅人力物力;例子有一戰時期常見嘅塹壕戰(trench warfare)-喺一戰嗰陣興喺地下掘條坑,俾啲士兵匿喺入面向敵人開火,呢種做法能夠令自己士兵能夠輕易迴避敵人嘅槍炮攻擊,同時嗰陣未有先進嘅坦克或者戰機能夠有效噉推進,於是就形成一個「交戰雙方都無力進攻,只係一味喺度互相開火同迴避敵人槍炮火,諗住想敵人因為頂唔順壓力而投降」嘅局面[43]

一般嚟講,消耗戰會損耗自己嘅大量大力物力,如果交戰雙方勢均力敵,噉最後贏嗰一方頂櫳都只會得到皮洛士式勝利(Pyrrhic victory,即係慘勝),所以消耗戰俾好多軍事戰略家覺得係下策[43]。事實係,就連遠至公元前嘅孫子都覺得打仗最好係速戰速決,消耗戰呢家嘢可免則免[44]

原版文言文:其用戰也勝,久則鈍兵挫銳,攻城則力屈,久暴師則國用不足。夫鈍兵挫銳,屈力殫貨,則諸侯乘其弊而起,雖有智者不能善其後矣。故兵聞拙速,未睹巧之久也。

粵文翻譯:軍隊作戰要速戰速決,如果拖得耐,軍隊就必然會攰同喪失士氣。一旦攻起城上嚟,就會兵力耗盡,長期喺外面打仗仲會搞到國家財政有問題。而如果軍隊因為打仗打得耐而攰到不堪,銳氣受挫,軍力耗盡,國內物資枯竭,啲諸侯實會趁火打劫。噉就算有足智多謀之士都冇良策可以挽救危亡。所以喺實際作戰當中,只係聽講過將領冇高招難以速戰速決,但就未見過指揮高明而係擅長持久作戰嘅。

焦土政策

內文: 焦土政策

焦土政策(scorched-earth policy)係另一種出名嘅戰略,指(通常係要撤出一個據點嗰時)要破壞任何對敵軍嚟講有用嘅嘢:例如有一隊軍隊,佢哋知道守緊嗰個據點就快要失守,於是佢哋就大舉噉破壞據點當地有用嘅嘢,包括破壞嗰度基地儲住嘅武器同糧食,以及放火燒嗮當地啲農田同工廠,目的係想敵人就算拿下咗呢個據點,都用唔到呢啲物資-「令到呢個地點變成一片焦土」;呢種策略亦可以由進攻嗰一方使用-例如有隊軍隊攻下咗敵軍一塊地,但遇到敵軍反攻,於是就係臨撤退之前用焦土政策[45]。焦土政策喺廿世紀都仲見得到:一個出名嘅例子發生喺 1991 年嘅波斯灣戰爭(Persian Gulf War),當時以美軍為首嘅同盟軍喺科威特嗰度攻下咗唔少據點,伊拉克嘅軍隊眼見就快失守,於是就一路撤退一路喺科威特國內嘅 605 至 732 個油井放火,務求想美軍用唔到啲油井[46]

焦土政策呢家嘢就連喺商界都見得到:管理學上亦有所謂嘅焦土政策,主要旨在透過降低自己公司嘅吸引力嚟防止間公司俾人收購;常用嘅戰術包括賣走間公司嘅某啲資產、增加間公司嘅同進行第啲會損害間公司嘅活動,而喺極端嘅情況下,商業上嘅焦土政策仲可能會搞冧自己間公司,成為所謂嘅「自殺藥丸」[47]

 
1991 年科威特油井俾伊拉克嘅士兵放火嘅情境

運動策略

睇埋:團隊運動

運動亦都係一樣講求策略嘅嘢,尤其涉及一大隊人互相協調並且同第啲隊伍競爭嘅團隊運動(team sports)[48]。團隊運動上有用博弈論作出分析,並且運用博弈論上嘅概念,務求令到自己贏比賽嘅機會率最大化。例如博弈論上有將策略分做純粹(pure)同混合(mixed):一個用緊純粹策略嘅博弈者會一路用死一個能夠令佢報償最大化嘅選項,係對嗰個博弈者嚟講最理想嘅狀態;相比之下,現實嘅博弈者多數會用混合策略,即係話個博弈者會每一個選擇俾個概率佢,而個概率代表咗佢會揀嗰個選項嘅機會率[49]

好多運動都會講「要用多變嘅策略,令到對手冇咁易估到自己將會使用乜嘢戰術」-喺博弈論上即係「唔好用純粹策略」[50]。以美式足球為例:美式足球比賽會分攻守,進攻嗰隊目的係要帶住個波衝過對手防線,並且去到得分區達陣(達陣會得分);而要衝過對手防線,主要有兩個方法-跑陣同傳球;跑陣指由負責開波嘅四分衛交個波俾(通常)跑衛,再要個跑衛向對手防線衝刺,嘗試以個跑衛嘅速度同敏捷身手嚟突破防線;傳球就係指由啲線鋒一路護住四分衛、一路俾班外接員同跑衛跑向對手防線,再要個四分衛掟個波俾其中一個外接員或者跑衛。多數嘅美式足球隊都會採取混合策略-一時跑陣一時傳球,等對手無所適從[51][52]

RB
WR1
WR2
一場美式足球比賽嘅一次進攻;而家係白色衫嗰隊做進攻,佢哋個跑衛(RB)準備好衝刺,同時佢哋兩個外接員(WR1 同 WR2)都準備向前跑-就噉睇,呢次進攻有可能係跑陣,又有可能係傳球。

制定策略

策略思考

 
一班軍人喺度思考戰略;佢哋以資訊(交戰雙方嘅軍力以及戰場地勢等)同經驗(知軍力同地勢會點影響行軍成敗)作出決策。
內文: 策略思考

策略思考(strategic thinking)係指運用知識同手上資訊諗一個策略出嚟嘅認知過程加拿大管理學者亨利·明茨伯格(Henry Mintzberg)認為,策略思考嘅重點在於「搜集相關嘅資訊(有啲乜嘢可能選擇、每個選擇嘅回報係點... 等等),然後作出決定」,當中資訊來源包括市場研究等嘅數據同個人經驗。例如佢喺 1994 年就撰文噉樣講[53]

原版英文:"... is more about synthesis (i.e., "connecting the dots") than analysis (i.e., "finding the dots"). It is about "capturing what the manager learns from all sources (both the soft insights from his or her personal experiences and the experiences of others throughout the organization and the hard data from market research and the like) and then synthesizing that learning into a vision of the direction that the business should pursue"."

粵文翻譯:(策略思考)係整合(「將啲點點連埋一齊」)多過分析(「搵啲點點出嚟」)。策略思考旨在於「獲取管理者由所有資訊源(包括由佢同佢身邊嘅人嘅個人體驗而嚟嘅軟性洞見,以及由市場研究等來源嚟嘅硬數據)然後將學到嘅嘢結合成一個有關『間公司應該向邊個方向前進』嘅目光」。

類似嘅諗法-策略思考主要係睇數據同整合數據-喺軍事戰略界都有人認同。例如廿世紀上半嘅法國將軍兼軍事戰略家安德烈·博福(André Beaufre)就噉講[54]

英文翻譯:"... is a mental process, at once abstract and rational, which must be capable of synthesizing both psychological and material data. The strategist must have a great capacity for both analysis and synthesis; analysis is necessary to assemble the data on which he makes his diagnosis, synthesis in order to produce from these data the diagnosis itself - and the diagnosis in fact amounts to a choice between alternative courses of action."

粵文翻譯:(策略思考)係一個心智過程,同時抽象理性,要求(思考者)能夠結合心理性同物質性嘅數據。策略一定要好識得分析同結合;分析對於組合用嚟做診斷(指問題診斷)嘅數據嚟講係心要嘅,而結合就要用嚟由數據嗰度搵出個診斷-個診斷會得出一個由多個選項揀一個行動嘅選擇。

策略計劃

 
強弱危機分析嘅圖解
內文: 策略計劃

策略計劃(strategic planning)係指一啲諗策略並且實行策略嘅系統性方法。管理學等嘅領域有好多策略計劃思考框架,一套噉嘅思考框架好多時係由學者進行研究之後諗出嚟嘅形式化程序,旨在教管理者等嘅人制定策略主要需要考慮乜嘢因素、要點樣分析手上嘅數據、仲有係分析過後要點樣執行套策略呀噉[53][55]

教有乜因素要諗:

策略計劃工具好多時係教人制定策略嗰陣要考慮啲乜嘢因素。例如強弱危機分析(SWOT analysis)就係策略管理上常用嘅一種策略思考方法。根據強弱危機分析嘅諗頭,幫一間公司制定策略重點要分析四方面嘅嘢[56][57]

  1. 間公司嘅強項Strength;指能夠令佢有競爭優勢能力)、
  2. 間公司嘅弱項Weakness;指會令佢喺競爭優勢上不如對手嘅特性)、
  3. 周圍環境有乜嘢機遇Opportunities;指間公司可以利用嘅嘢)、
  4. 周圍環境有乜嘢危險Threats;指可能會搞到佢有麻煩嘅嘢)。

強弱危機分析呢四大因素淨係提供咗有關「策略要點制定」嘅大方向:喺睇完呢四大因素之後,管理者仲要做多項工序-例如係諗吓有邊啲量度得到嘅變數可以攞嚟衡量強項同弱項,以及係實際做數據搜集呀噉[56]

教點樣分析數據:

策略計劃工具可以係教人點樣由數據嗰度得出要用嘅策略。例如 BCG 矩陣(BCG matrix)就係策略管理上一種用嚟分析數據嘅工具。要用 BCG 矩陣,分析者要搜集有關自己公司每件產品嘅市場佔有率(market share)同增長率(market growth)嘅數據,然後用呢啲數據畫出一個 BCG 矩陣;一個 BCG 矩陣有兩條軸,打橫嗰條代表市場佔有率(愈左表示愈高),打戙嗰條代表增長率(愈上表示愈高),每一點代表間公司其中一件產品。靠住呢個矩陣,管理者可以將間公司啲產品分做四種,並且制定跟住落嚟要採取嘅策略[58][59]

  • 低增長、高市場佔有率嘅產品就算唔點樣落力做開發創新,都可以持續幫間公司賺錢;呢啲產品就係所謂嘅現金牛(cash cow)。
  • 高增長、高市場佔有率嘅產品係最有潛力嘅,需要投資大量嘅資源做開發創新;呢啲產品係所謂嘅明星(star)。
  • 高增長、低市場佔有率嘅產品需要做進一步評估,睇吓間公司有冇本事增加市場佔有率,令呢啲產品變得更加有利可圖;呢啲產品係所謂嘅問號(question mark)。
  • 低增長、低市場佔有率嘅產品係最冇潛力嘅,需要考慮放棄;呢啲產品係所謂嘅(dog)。

戰略遊戲

 
一隻戰略遊戲嘅畫面;玩家由上空望到自己嘅軍事單位,並且作出指揮。
內文: 戰略遊戲

戰略遊戲(strategy game)係一種遊戲類型,指重視策略計劃嘅遊戲,出名嘅作品有星際爭霸系列(Starcraft)、終極動員令系列(Command & Conquer)同文明帝國系列(Civilization)等等[60]。一隻典型嘅戰略遊戲會有一個虛擬世界,玩家會鳥瞰式噉由上面睇到個虛擬世界嘅情況,然後指揮一大柞嘅個體作戰(呢啲個體可以有一定程度嘅人工智能),作出有計劃有組織嘅行動。喺美術上,呢啲遊戲通常會將玩家描繪成將軍等嘅軍事領袖,而玩家所指揮嘅個體就係士兵,成隻遊戲模擬緊打仗[61]。因為隻遊戲模擬打仗,所以自然會用到軍事戰略上嘅概念[62]

設計上,戰略遊戲通常會有以下呢啲機制[63]

  • 玩家會控制一柞單位:玩家可以向自己控制嘅單位俾指令(例如「前進」同「攻擊」呀噉),但一般唔會能夠用上下左右掣直接控制啲單位;唔同單位喺能力上可能有所不同(例如有啲單位行得快啲,所以比較擅長負責做側擊嘅工作),所以玩家要識軍事戰術,知道邊啲單位可以用於邊啲戰術;就好似喺戰場上指揮緊士兵噉。
  • 經濟同管理:玩家手上會有若干類資源,而達成唔同目的需要用唔同嘅資源,例如喺世紀帝國系列(Age of Empires)當中,每位玩家扮演諸侯或者國王,喺自己嘅領土上手持木材、糧食、黃金同石頭四種資源,起城牆有助防守,但要消耗石頭,訓練士兵係進攻嘅必要一環,但要消耗黃金同糧食,而且隻遊戲仲涉及開採資源同貿易等嘅事務[64];所以玩家要考慮軍隊經濟方面嘅嘢[65]
  • 地圖同探索:對局當中嘅玩家會俾個遊戲程式擺喺一幅地圖上面,地圖上面會有玩家嘅單位、障礙物同資源補給點等嘅物件;玩家控制嘅單位會受地圖限制,例如攻擊有一個有限嘅射程,只可以攻擊射程內嘅敵人,或者係陸軍單位唔可以直接喺水上面移動;於是玩家就要好似現實世界嘅軍隊指揮官噉,要考慮地理因素對行軍嘅影響[66]

到咗廿一世紀,隨住遊戲製作相關技術成熟,有唔少戰略遊戲嘅設計都達到高度精緻,例如啲遊戲人工智能會用到日益先進嘅人工智能技術,會要求玩家使用現實軍事上都會用嘅戰略。因為噉,甚至有軍界人士主張可以用呢啲遊戲做軍事教育嘅一部份[62][67]

註釋

  1. 呢啲概念都可以廣義化,應用落去商業以外嘅競爭性場合當中。
  2. 又或者想像一個人想喺搵工嗰陣打低對手。
  3. 再想像一個搵工嘅人,佢可以要求低啲人工(老細請佢嘅成本下降)或者提升自己嘅技能(自己提供嘅服務質素上升)。
  4. 個人層面嘅現象都可以噉想像:一個人要有競爭優勢,可以降低成本(要求低啲人工)、提升質素(學好啲技能)或者集中(將技能專化,令請自己嘅成本跌同服務質素升)。

睇埋

 
美國著名經濟學家米高波特嘅相,喺 2013 年影嘅;佢對營商策略方面嘅理論作出咗重大貢獻。

參考文獻

  • Burgelman, R. A., & Andrew, S. (2001). Strategy is destiny: How strategy-making shapes a company's future. The Free Press.
  • Freedman, L. (2015). Strategy: A history. Oxford University Press.
  • Johnson, G., Whittington, R., Scholes, K., Angwin, D. N., & Regnér, P. (2017). Exploring strategy (No. 11th e). Pearson.
  • Kvint, V. (2015). Strategy for the Global Market: Theory and practical applications. Routledge.
  • Rumelt, R. (2011). The perils of bad strategy (PDF). McKinsey Quarterly, 1(3), 1-10.
  • Rumelt, R. P. (2012). Good strategy/bad strategy: The difference and why it matters. Strategic Direction.
  • Teece, D. J. (2010). Business models, business strategy and innovation (PDF). Long range planning, 43(2-3), 172-194.
  • Waddington, C. H. (2014). The strategy of the genes. Routledge.

  1. στρατηγία, Henry George Liddell, Robert Scott, A Greek-English Lexicon, on Perseus.
  2. Porter, M. E. (1996). What is strategy. Published November.
  3. 3.0 3.1 Freedman, Lawrence (2013). Strategy. Oxford University Press.
  4. Strategy Vs. Tactics: The Main Difference & How to Track Progress Of Both.
  5. Mintzberg, Henry and, Quinn, James Brian (1996). The Strategy Process: Concepts, Contexts, Cases. Prentice Hall.
  6. The 10 Ingredients That Every Strategy Should Have. Forbes.
  7. Rumelt, Richard P. (2012). Good Strategy/Bad Strategy. Crown Business.
  8. Rumelt, R. (2011). The perils of bad strategy (PDF). McKinsey Quarterly, 1(3), 1-10.
  9. "American Rhetoric: John F. Kennedy – Cuban Missile Crisis Address to the Nation".
  10. 10.0 10.1 10.2 Myerson, Roger B. (1991). Game Theory: Analysis of Conflict, Harvard University Press, p. 1.
  11. Samuelson & Nordhaus (2004), ch. 11, "Uncertainty and Game Theory" and [end] Glossary of Terms, "Economics of information", "Game theory", and "Regulation".
  12. Pettigrew, A. M., Thomas, H., & Whittington, R. (Eds.). (2001). Handbook of strategy and management. Sage.
  13. 10 Marketing Strategies to Fuel Your Business Growth. Entrepreneur ASIA PACIFIC.
  14. What an Economist Brings to a Business Strategy. Harvard Business Review.
  15. Teece, D. J. (2010). Business models, business strategy and innovation. Long range planning, 43(2-3), 172-194.
  16. 16.0 16.1 Porter, Michael E. (1985). Competitive Advantage. Free Press.
  17. Competitive Advantage. Investopedia.
  18. Chacarbaghi; Lynch (1999), Competitive Advantage: Creating and Sustaining Superior Performance, by Michael E. Porter 1980, p. 45.
  19. Scholz, T. M. (2012). Talent management in the video game industry: The role of cultural diversity and cultural intelligence. Thunderbird International Business Review, 54(6), 845-858.
  20. Ashton, C., & Morton, L. (2005). Managing talent for competitive advantage: Taking a systemic approach to talent management. Strategic HR review.
  21. 21.0 21.1 Hafeez, K., Zhang, Y., & Malak, N. (2002). Core competence for sustainable competitive advantage: a structured methodology for identifying core competence. IEEE transactions on engineering management, 49(1), 28-35.
  22. 22.0 22.1 Mooney, A. (2007). Core competence, distinctive competence, and competitive advantage: What is the difference?. Journal of education for business, 83(2), 110-115.
  23. Core Competencies. Investopedia.
  24. 24.0 24.1 Porter, Michael E. (1980). Competitive Strategy. Free Press.
  25. Kiechel, Walter (2010). The Lords of Strategy. Harvard Business Press.
  26. Business Model Generation, Alexander Osterwalder, Yves Pigneur, Alan Smith, and 470 practitioners from 45 countries, self-published, 2010
  27. Geissdoerfer, Martin; Savaget, Paulo; Evans, Steve (2017). "The Cambridge Business Model Innovation Process". Procedia Manufacturing. 8: 262–269.
  28. George, G. and Bock, A. J. (2011). The business model in practice and its implications for entrepreneurship research. Entrepreneurship Theory and Practice, 35(1): 83-111.
  29. Rayna, T., & Striukova, L. (2014). 'Few to Many': Change of Business Model Paradigm in the Video Game Industry. Digiworld Economic Journal, (94), 61.
  30. Matti Nojonen, Jymäyttämisen taito. Strategiaoppeja muinaisesta Kiinasta. [Transl.: The Art of Deception. Strategy lessons from Ancient China.] Gaudeamus, Finland. Helsinki 2009.
  31. Gartner, Scott Sigmund, Strategic Assessment in War, Yale University Press, 1999. p. 163.
  32. 32.0 32.1 van Avery, Chris, 12 New Principles of War, Armed Force Journal, The Defense News Media Group, July 2007.
  33. West, Joseph, Dr., Principles of War: A Translation from the Japanese, U.S. ARMY COMMAND AND GENERAL STAFF COLLEGE, FORT LEAVENWORTH, KANSAS, 1969.
  34. Gartner, Scott Sigmund, Strategic Assessment in War, Yale University Press, 1999. p. 14.
  35. Edward Wegener; Henning Wegener, The Soviet Naval Offensive: An Examination of the Strategic Role of Soviet Naval Forces in the East-West Conflict, Naval Institute Press, 1976.
  36. Lanchester, F.W., "Mathematics in Warfare" in The World of Mathematics, Vol. 4 (1956). Ed. Newman, J.R., Simon and Schuster, 2138–2157.
  37. Evans D. (1997) Concentration of Force. In: War: A Matter of Principles. RUSI Defence Studies Series. Palgrave Macmillan, London.
  38. Handel, Michael I. (12 June 2001). Robert Cowley, Geoffrey Parker (ed.). The Reader's Companion to Military History. Houghton Mifflin Harcourt. pp. 147-.
  39. "Strategy: the Indirect Approach". Foreign Affairs: An American Quarterly Review. 2011-10-08.
  40. Winnefeld, J. A., & Johnson, D. J. (1993). Joint air operations: Pursuit of unity in command and control, 1942-1991. Naval Institute Press.
  41. Keller, G. F. (2009). The influence of military strategies on business planning. International Journal of Business and Management, 3(5).
  42. Lee, S. F., Roberts, P., Lau, W. S., & Bhattacharyya, S. K. (1998). Sun Tzu's The Art of War as business and management strategies for world class business excellence evaluation under QFD methodology. Business Process Management Journal.
  43. 43.0 43.1 Murray, Nicholas: Attrition Warfare, in: 1914-1918-online. International Encyclopedia of the First World War.
  44. 《孫子兵法》
  45. Willcox, Tilton (January 1988). "The Use and Abuse of Executive Powers in Warding off Corporate Raiders". Journal of Business Ethics. 7 (1/2): 51.
  46. "III. CHRONOLOGY OF EVENTS A. Discussion".
  47. Scorched Earth Policy. Investopedia.
  48. Martinovic, J., Snásel, V., Ochodkova, E., Nolta, L., Wu, J., & Abraham, A. (2010). Robot Soccer-Strategy Description And Game Analysis. In ECMS (pp. 265-270).
  49. Rosenthal, R. W. (1973). A class of games possessing pure-strategy Nash equilibria. International Journal of Game Theory, 2(1), 65-67.
  50. Boronico, J. S., & Newbert, S. L. (1999). Play calling strategy in American football: a game-theoretic stochastic dynamic programming approach. Journal of Sport Management, 13(2), 103-113.
  51. Football: Strategy.
  52. Run/Pass Balance and a Little Game Theory. Smart Football.
  53. 53.0 53.1 The Fall and Rise of Strategic Planning. Harvard Business Review.
  54. Beaufre, Andre (1965). An Introduction to Strategy. Translated by R.H. Barry. With a pref, by B.H. Liddell Hart. Frederick A. Prager.
  55. Mintzberg, Henry and, Quinn, James Brian (1996). The Strategy Process: Concepts, Contexts, Cases. Prentice Hall.
  56. 56.0 56.1 Dess, Gregory (2018). Strategic Management. United States: McGraw-Hill. p. 73.
  57. Armstrong, M. A handbook of Human Resource Management Practice (10th edition) 2006, Kogan Page, London
  58. Fripp, Geoff."BCG Matrix and the Experience Curve" Guide to the BCG Matrix.
  59. Mohajan, H. (2017). An analysis on BCG Growth sharing matrix (PDF).
  60. Emrich, Alan (September 1993). "MicroProse's Strategic Space Opera is Rated XXXX". Computer Gaming World (Issue #110). pp. 92–93.
  61. Rollings, Andrew; Ernest Adams (2003). Andrew Rollings and Ernest Adams on Game Design. New Riders Publishing. pp. 321–345.
  62. 62.0 62.1 WAR BOOKS, SPECIAL EDITION: LEARNING STRATEGY BY PLAYING VIDEO GAMES.
  63. Rollings, Andrew; Ernest Adams (2006). Fundamentals of Game Design. Prentice Hall.
  64. Resource. Age of Empires Wiki.
  65. Todd Barron (2003). Strategy Game Programming with DirectX 9. Wordware Publishing, Inc.
  66. Map Design Index. AOE Heaven.
  67. Playing War: How the Military Uses Video Games. The Atlantic.