打麻雀運動

  提示：呢篇文講嘅唔係打麻雀。

打麻雀運動，又叫消滅麻雀運動，指嘅係中國大陸1958年2月開始，大躍進初期毛澤東發起嘅「除四害運動」之一，以消滅麻雀為目標嘅全國性大規模群體事件。

背景

喺中國歷史上曾經就麻雀嘅食性發生過激烈嘅爭論。1955年，有農民反映麻雀食農作物。時任中國共產黨主席毛澤東知道之後就話麻雀係害鳥，最好要消滅。1957年1月18號，時任教育部副部長、生物學家周建人喺《北京日報》發表題為《雀是害鳥無須懷疑》嘅文章，就肯定：「麻雀係害鳥，害鳥應當撲滅，唔使猶豫。」

毛澤東根據當時情況自行判斷，之後喺中共中央會議上全體討論認為麻雀以谷物為食，影響到農業生產，因此將麻雀定為四害之中嘅老四，喺中國大陸開展咗除四害運動。

過程

1958年初，中國殺死咗近20億隻麻雀。

影響

對生態嘅嚴重影響

睇埋：三年大饑荒

殲滅麻雀嘅結果令農田當中嘅害蟲幾乎冇曬天敵，而第二年嘅糧食嚴重失收，發生極為嚴重嘅饑荒問題。無幾耐之後，包括鄭作新在內嘅好多鳥類學者通過野外研究，證實咗喺麻雀嘅食譜入面，人工種植嘅谷物僅佔唔到50%嘅比重，佢哋嘅研究成果甚至發表喺中共中央機關報《人民日報》上面，可謂史無前例。1959年11月27號，中國科學院黨組書記張勁夫，綜合生物學界嘅意見，寫咗一份《關於麻雀問題向主席嘅報告》。隨即喺1960年3月16號，毛澤東喺為中央起草嘅關於衛生工作嘅指示入面改變咗消滅麻雀嘅決定，提出麻雀唔打啦，取而代之嘅係打臭蟲，4月19號，包含修正之後除四害嘅《農業發展綱》四十條，正式提請第二屆全國人民代表大會第二次會議討論通過，向全國公布。從承受唔起麻雀造成嘅糧食損失而打麻雀，到全面權衡利弊、寧可遭受糧食損失都要容忍麻雀，最後仲係肯定咗麻雀嘅作用，改變咗打麻雀嘅做法。但係由於生態平衡已經受到破壞，再加上糧食制度同政策錯誤、浮誇風等問題，最終都係改變唔到「三年大饑荒」嘅發生。

事後清算科學家

喺幾年之後開始嘅文化大革命入面，呢啲反對打麻雀運動嘅科學家被扣上利用麻雀做文章嚟反對毛主席、反對大躍進、反對最高指示等種種罪名，受到殘酷迫害。朱洗喺1962年就已經病逝，但當時仍被扣上將毛主席同腓特烈大帝相提並論、公開反對毛主席嘅罪狀，因此受到紅衛兵砸碑掘墳、曝其屍骨。