投機tau4 gei1英文speculation)係指一個人喺預打後會得益嘅情況下買一啲資產,不過喺噉做嗰陣冇詳細嘅計劃,對自己做緊嘅投資亦都一無所知,亂咁買,好多時搞到自己最後損手爛腳。

「咦?嗰隻股票嘅價係噉升緊喎。我唔知嗰間公司做咩生意,不過等我即刻買嗰隻股然後快手賣咗佢賺錢先。」

概念 編輯

投機喺概念上同投資好相似。不過有好多經濟學金融學等領域嘅工作者都鍾意強調投機同投資喺以下呢幾點上嘅差異[1]

  • 持有時期:投資者會攞住為投資買嘅資產攞一段相對長嘅時間,投機者會攞住啲資產攞一段短時間;
  • 分析程度:投資者會為咗做投資做好多詳細嘅分析,投機者靠嘅頂嗮櫳係小道消息;
  • 結果出現嘅時間:投資回報需要一段有返咁上下長嘅時間先會浮現,而投機嘅時期短。

例如有好多人喺買股票嗰陣都會噉樣做:佢哋冇清楚理解一間公司嘅情況,唔知間公司响業務上前景好唔好,所以冇充分理由真係信間公司嘅股票會升值,淨係諗住齋靠股票市場實會有嘅週期性上上落落嚟獲利。而有好多研究者都認為,呢種行為喺概念上理應係有別於投資嘅-於是就將呢啲活動定性為「投機」[註 1][1]

同泡沫嘅啦掕 編輯

投機行為被指同經濟泡沫好有啦掕。

有經濟學家主張利率liquiditylik6 kwik1 dit4 ti4 係泡沫嘅主因[2][3]

  • 利率:利率反映啲人借錢要還嗰陣要畀幾多利息,利率愈高,啲人還錢嗰時就要畀愈多利息;一般嚟講,利率同投資成大致反比-要投資就往往要借錢,如果利率高,就表示做投資嘅成本都高,於是啲人嘅投資意慾就會下降;事實係政府中央銀行想調控經濟嗰陣,好多時都會靠調節利率嚟左右啲人嘅投資行為,(簡單講)調高利率會令啲人投資意慾跌,變到比較想儲起啲錢,而如果政府同央行想鼓勵啲人投資,好多時會靠調低利率。
  • Liquidity:Liquidity 係一件資產可以具有嘅特性;如果話一件資產 liquidity 高,即係話件資產可以快速轉做現錢,而且途中唔會搞到佢價值有咩明顯變化;例如建築物呢種資產嘅 liquidity 好低,成日要傾一大輪搞一大輪手續先至可以成交,所以一棟建築物嘅擁有者冇得快速將棟嘢賣咗佢轉做現錢;相比之下,現錢就係 liquidity 最高嘅資產。

有經濟學家主張,當一個經濟體利率低得滯而且有好多高 liquidity 資產流動嗰時,就容易產生經濟泡沫:利率低表示啲人肯借錢做投資,而啲人手上揸得多高 liquidity 資產就更加表示佢哋多錢可以攞嚟使[註 2];噉就表示個經濟體有一大拃人想攞啲錢去做投資,同時投資嘅機會未必係咁充裕,於是啲人就會出現投機等嘅行為,(需求升)搞到呢啲資產嘅價出現唔合理嘅膨漲-形成泡沫[3]

註釋 編輯

  1. 不過亦有唔少研究者主張,投機可以定義做「投資嘅一種,指比較高風險同冇遠見嘅投資」。
  2. 亦可以睇吓通脹嘅嘢:liquidity 高嘅資產被指係易因為通脹而實際價值跌,所以啲人有誘因攞呢啲資產去做投資。

睇埋 編輯

編輯

  1. 1.0 1.1 Graham, Benjamin (1973). The Intelligent Investor. HarperCollins Books.
  2. Buchanan, M. (2008). Why economic theory is out of whack 互聯網檔案館歸檔,歸檔日期2015年4月30號,.. New Scientist.
  3. 3.0 3.1 Porras, E. (2016). Bubbles and Contagion in Financial Markets, Volume 1: An Integrative View. Springer.