開主選單
一個人喺幾個熒光幕上睇住啲股票嘅價格-買賣股票係一種常見嘅投資。

投資粵拼tau4 zi1英文investment)喺經濟學上係指一個個體或者群體短期噉消耗自己手上嘅資源取得一啲資產,務求長遠噉得到更大量嘅資源(即係「投」入咗「資」源)-當中嘅「資源」好多時(但唔一定)係[1]

投資可以有多種方法嚟做:喺金融上,投資可以涉及投資人(investor)消耗自己現有嘅資源,買一啲資產,例如係股票債券、或者房產噉,通常個投資人預期呢啲資產遲吓價值會提升-所以喺將來可以透過賣咗呢啲資產佢,嚟得到更多嘅錢;另一方面,投資人又可以消耗現有資源,以「提升自己將來得到資源嘅能力」為目的,好似啲人花費時間同錢嚟讀一啲學位噉,多數就係因為個投資人預期讀咗個學位將來會提高自己嘅賺錢能力[1][2][3]

投資工具

常見嘅投資工具有以下呢啲[4]

實質資產:土地、設備、現金、同貴金屬等保值嘅嘢。

金融產品:股票債券基金期貨期權、同埋第啲金融衍生工具

經濟影響

 
法蘭克福證券交易所外面嘅牛熊雕像
睇埋:本地生產總值

投資對於經濟增長嚟講好重要。例:當一間工廠想要提升自己生產效率,務必喺將來賺更多嘅錢嗰陣,佢哋可以做嘅嘢就包括咗買多啲生產用嘅機械,令到成間工廠嘅生產總量提升;喺呢個過程當中,佢哋會消耗錢,由機械供應商嗰度買機械,途中必然會涉及交易,而呢啲交易嘅經濟價值會成為個經濟體本地生產總值(GDP)嘅一部份-當成個經濟體入面嘅人同組織各自為咗令自身利益最大化而做投資嗰陣,就會令到個經濟體入面有好多嘅經濟活動,大幅噉提升個經濟體嘅 GDP 同生產能力,例如啲人買股票噉,就會令到啲上市公司多咗資金使,而呢啲上市公司跟手會為咗賺多啲錢,而請人同佢哋打工以及研究點樣提升生產效率[5]

喺廿一世紀初嘅世界,各經濟體嘅 GDP 有好大部份都係因投資而有嘅,例如喺 2017 年,中國齋係對固定資產(指設備同原材料等用嚟提升將來生產力嘅資產)嘅投資就經已霸咗 GDP 嘅大約 42% [6]

市場情緒

內文: 市場情緒

市場情緒(market sentiment)指一個金融市場入面投資人嘅普遍態度,大致上可以分兩種:牛市(bullish market)指啲投資人普遍預期個金融市場嘅價值會升,而熊市(bearish market)指啲投資人普遍預期啲價值會跌。市場情緒由投資人嘅心理主宰,有陣時可以搞到金融市場有大嘅上落。好似係恐慌性拋售噉,就係金融學上一種相當受關注嘅現象:恐慌性拋售涉及個市場啲投資人突然間冚唪唥變到好想賣走手上嘅股票(例如可能有消息傳出啲上市公司賺嘅錢少咗),噉會引致股價大跌,而呢種大跌會造成市場入面嘅上市公司突然唔見好大量嘅資金-對個經濟體嚟講可以好大鑊[7]

相關經濟活動

投資同投機(speculation)以及賭錢(gambling)唔同:

  • 持有時期:投資人會攞住為投資而買嘅資產一段相對長嘅時間,投機者會攞住所買嘅資產一段短時間,而賭錢嘅人近乎唔會買乜嘢資產;
  • 分析程度:投資人會為咗做投資做好多分析,投機者靠嘅通常衹係小道消息,而賭錢靠嘅係運氣;
  • 獲利成份:投資會有孳息,投機同賭錢淨係會引致一次性嘅得益;
  • 結果出現嘅時間:投資回報需要一段時間先會浮現,而投機同賭錢嘅時期短。

睇埋

  1. 1.0 1.1 Schultz, T. W. (1961). Investment in human capital. The American economic review, 1-17.
  2. Barber, B. M., & Odean, T. (2000). Trading is hazardous to your wealth: The common stock investment performance of individual investors. The journal of Finance, 55(2), 773-806.
  3. Hartzell, D., Hekman, J., & Miles, M. (1986). Diversification categories in investment real estate. Real Estate Economics, 14(2), 230-254.
  4. 劍平, 謝. 投資學:基本原理與實務. 智勝. 2012.
  5. Alexander, L., & Eberly, J. (2018). Investment hollowing out. IMF Economic Review, 66(1), 5-30.
  6. Gross fixed capital formation (% of GDP). The World Bank.
  7. Baker, M., & Wurgler, J. (2007). Investor sentiment in the stock market. Journal of economic perspectives, 21(2), 129-152.