拉特蘭條約

《拉特蘭條約》（拉丁文：LATERANENSIA PACTA；意大利文：Patti Lateranensi）係意大利王國同羅馬教廷喺1929年2月11號簽定嘅一份條約，1929年7月7號獲得意大利國會通過。

背景

談判雙方代表

雙方簽約

1929年嘅梵蒂岡地圖

1870年普法戰爭期間，意大利王國軍隊趁拿破崙三世顧著應戰普魯士軍隊嘅機會，出兵攻打靠法國軍事保護嘅教宗國。意大利王國吞併徂教宗國之後，以教宗國嘅舊首都羅馬為自己嘅新首都。教宗國實際上滅亡之後，時任教宗庇護九世退居梵蒂岡，將自己嘅活動範圍限定喺使徒宮，一方面以「梵蒂岡囚徒」自稱，另一方面又唔承認「囚禁」自己嘅意大利王國存在。從庇護九世開始，一共有五任教宗（庇護九世、 利奧十三世、庇護十世、本篤十五世、庇護十一世）自稱「梵蒂岡囚徒」。

1926年，時任意大利王國總理墨索里尼同教廷代表皮耶特羅·加斯帕里經過一輪談判之後，最終達成徂三項協定：

• 承認教廷喺梵蒂岡城嘅完整主權嘅協定；
• 規範天主教會同天主教信仰喺意大利國家嘅地位嘅協定。
• 賠償教廷領土同財產損失嘅協定。

1929年2月11號，雙方喺羅馬拉特蘭宮正式簽約。條約生效之後，教宗國正式成為歷史，被梵蒂岡城國取代。意大利廢除君主制，改為共和國之後，1948年嘅《意大利共和國憲法》第七條繼續認可拉特蘭條約。

內容

條約嘅主要內容包括：

• 意大利承認梵蒂岡係獨立主權國家，並且承認梵蒂岡對受羅馬教廷管轄嘅部份房地產有治外法權；
• 意大利賠償一筆錢畀梵蒂岡；
• 意大利承認天主教會喺意大利國內嘅地位，但係梵蒂岡境外，意大利境內嘅所有主教嘅任命都要經意大利批准，爾啲主教重要宣誓效忠意大利；
• 梵蒂岡承認意大利存在，並且唔再禁止天主教徒為意大利政府效力；
• 梵蒂岡保證：如果意大利同其他國家開戰嘅話，梵蒂岡會保持中立；
• 梵蒂岡會自動採納意大利國會通過嘅法律（爾一條喺2009年被梵蒂岡宣布失效）。