挨年近晚

挨年近晚，又叫做歲晚或年尾，係皇曆年年尾呢段時間，就迎新年嘅日子。挨年近晚係響十二月，或者係家下極少見嘅閏十二月。因為呢個月係由冬天轉春天，所以亦都叫做迎春。挨年近晚個挨年就係靠近新年，近晚，就係貼近年尾咁解。

因為靠近年尾，舊時好多做生意都會埋晒一年嘅數，清埋啲舊數，會做尾禡(禡音牙)多謝班夥記。年尾個月會出雙糧畀打工仔，等大家過年多啲錢使(使讀洗)。因為舊時挨年近晚有好多嘢要準備，去舊迎新，要使好多錢。例如要剪頭髮，買新衫，要包定利是(利讀厲)，整下年糕、角仔呢啲賀年嘢食，執靚間屋，買下年花，貼下揮春。而且一到新年，好多舖頭都閂晒門，好多嘢要買定。

近年因為經濟發達，有錢好多嘢都唔使等年尾整，好多嘢唔使自己做，買返來就得，所以氣氛都唔似舊時。不過因為新年都仍然係唐人大節，所以氣氛仍然係咁熱鬧。