掩護系統
掩護系統係射擊遊戲同潛行遊戲成日用嘅遊戲機制，指隻遊戲容許一個角色匿埋喺環境嘅某啲物件後，用物件做掩護（英文：cover），避開敵人嘅視線或者槍炮攻擊，就好似現實世界嘅槍戰駁火噉。例如隻遊戲嘅操控系統有個掣，玩家一撳佢個角色就會自動伏低同埋移去最近嗰嚿大型物件後。呢種系統提升遊戲嘅戰術深度，鼓勵玩家計劃行動，而唔係單純噉衝入敵陣。
掩護系統可以按好多特性分類，例如掩護物可以[1]
- 有分高低，低嘅掩護物容許玩家突然企起身射擊敵人。
- 有分「軟硬」，「軟」嘅掩護物只阻擋敵人視線但唔阻擋攻擊。
- 有分短暫同永久，短暫嘅掩護物畀攻擊打中會爛。
- 有啲遊戲容許玩家「自製」掩護物，例子可以睇睇要塞英雄。
射擊遊戲同潛行遊戲嘅掩護系統設計好唔同，例如潛行遊戲通常想鼓勵玩家迴避敵人，所以基本上關關都會有足夠嘅掩護物，而 PvP 射擊遊戲同 PvE 射擊遊戲嘅掩護物設計又可以唔同。