收視率
(由收視跳轉過嚟)
收視率（英文：Audience measurement）係市場學研究嘅一種，通常以巴仙計算，佢主要係用於統計究竟有幾多人收睇電視節目。譬如一個電視台製作嘅節目越多人睇，呢個時段嘅廣告價錢就好高；如果一個節目收視好低，就要考慮停播，又或者轉去其他時段播。
香港嘅收視率
編輯香港嘅收視率係用「收視點」去計，一個「收視點」代表香港1%可以睇到電視嘅人口，每年更新。而收視率嘅統計係由電視台委託市場調查公司去搞，抽樣喺住所度安裝「收視記錄儀」，收集住所入面嘅人睇電視嘅習慣。2018年開始，香港嘅收視調查機構係中國廣視索福瑞媒介研究（CSM），抽樣1,000個住戶去推算收視。
香港嘅收視數字一般只係畀電視台同有訂閱收視調查嘅廣告商參考，未有向公眾公開所有節目嘅收視數字。無綫電視多年以嚟會主動公佈翡翠台喺黃金時段一部份節目嘅收視。由2021年5月31號開始，無綫電視主動公佈自己翡翠台連同主要競爭對手ViuTV、香港開電視喺黃金時段（18:00-23:00）所有節目嘅收視數字（頭一個週期係2021年5月24-30號），坊間習慣叫做「三台收視報告」。但係呢種做法只係維持咗一年多啲，2022年7月25號無綫電視宣佈唔再提供有關報告（最尾一個週期係2022年7月11-17號），只會公佈翡翠台個別節目嘅收視[1]。
參考
編輯- ↑ 黃梓恒 (2022-07-25)。〈無綫決定唔再公布三台收視數字：收視資料已不合宜〉。《香港01》 (香港中文)。喺2022-07-25搵到。
睇埋
編輯 |