教育學院拼音方案

教院拼音方案，又叫《常用字廣州話讀音表》拼音方案，係一種標準粵語嘅羅馬拼寫方案，有啲敎材同敎育硏究項目都用過佢。

特點

「教院拼音」方案嘅特點，係依從國際音標，同時喺有規律嘅情況下，將國際音標羅馬字母化，方便啲人用一般電腦鍵盤輸入，亦可以避免亂碼同埋冇咗啲字符呢類問題。由於佢係以《粵音韻彙》裏面所使用嘅國際音標（寬式）做基礎，佢嘅羅馬字母拼寫，就可以同國際音標好有規律咁樣直接對應，方便咗用者响「教院拼音」同國際音標（寬式）兩個系統之間嘅轉換，唔使額外學習咁多嘢。

另一方面，「教院拼音」完全採用一般電腦鍵盤可以直接輸入嘅英文羅馬字母嚟拼寫，免除輸入、顯示特別符號嘅煩惱。

所以，佢能夠同時滿足「準確標注語音音素」同「方便資料的輸入、儲存和傳送」兩項要求，一直以來受到教育界嘅歡迎。

發展同歷史

呢套「教院拼音」系統，最早係由余秉昭司鐸响佢1971年在所寫嘅《同音字彙》使用，只係當時佢把聲調直接用「上平」、「上上」、「上去」、「下平」、「下上」、「下去」、「上入」、「中入」、「下入」（即今天所稱的「陰平」、「陰上」、「陰去」、「陽平」、「陽上」、「陽去」、「陰入」、「中入」、「陽入」）呢啲文字寫出嚟。

到咗1990年，香港教育署語文教育學院中文系（後來歸併入香港教育學院，成為佢嘅一部份）出版嘅《常用字廣州話讀音表》，就將聲調由「上平」、「上上」、「上去」呢啲文字，改做「1」、「2」、「3」等數字標調。1994年香港教育署語文教育學院中文系出版嘅《常用字廣州話異讀分類整理》，亦沿襲《常用字廣州話讀音表》嘅做法。之後，呢套「教院式」方案就定型，而且獲得教育界垂青。

2000年出版嘅《廣州話正音字典》沿用「教院拼音」方案，亦都將方案嘅「長a音」固定拼寫做「aa」。主編這些字典嘅學者詹伯慧認為，呢套拼音方案多年嚟已經喺香港中、小學廣泛採用，香港教師都熟悉。2002年施仲謀主編嘅《廣州音北京音對應手冊》，2003年浸會大學中文系教授潘慧如等人主編嘅《小學中文科常用字研究報告》、《小學中文科常用字表》同埋佢個網站等等，亦都沿用呢套拼音系統。

不過香港語言學學會喺1993年推出香港語言學學會粵語拼音方案，簡稱粵拼，佢跟「教院式」方案有好多相似之處，但係佢因應過往嘅不足（例如有啲口語音節無法拼寫嘅問題）而改善、補完，喺設計上係完善過「教院式」方案。喺推出十年間，粵拼漸漸取代咗「教院式」方案嘅地位，無論喺學界定日常生活，都獲得更加廣泛嘅應用同支援。香港教育學院（而家已經升格做香港教育大學）語言學及現代語言系嘅粵語語料庫同粵語自學平台，亦都採用粵拼，而非「教院式」方案。當中負責粵語自學平台嘅片岡新教授表示，好多學者都認為粵拼係最好嘅方案，網上資源又比較多，學生學識粵拼後，自己打字都好方便。所以香港教育大學目前已經唔再用「教院式」方案。香港各間大學亦都相繼改用粵拼。

方案內容

「教院拼音」粵語拼音方案的拼音字母，由拉丁字母 a 至 z 組成，聲調就以阿拉伯數字 1 至 9 (或 1 至 6 ) 標示。

聲母

19個，請睇下面個表：

聲母表

	雙脣音、脣齒音				舌尖音				軟顎音、聲門音				脣化軟顎音			噝音、硬顎音
聲母	b	p	m	f	d	t	n	l	g	k	ng	h	gw	kw	w	dz	ts	s	j
國際音標	[p]	[pʰ]	[m]	[f]	[t]	[tʰ]	[n]	[l]	[k]	[kʰ]	[ŋ]	[h]	[kʷ]	[kʷʰ]	[w]	[ts]	[tsʰ]	[s]	[j]
漢字例子	巴 baa	怕 paa	媽 maa	花 faa	打 daa	他 taa	那 naa	啦 laa	家 gaa	卡 kaa	牙 ngaa	蝦 haa	瓜 gwaa	誇 kwaa	蛙 waa	渣 dzaa	叉 tsaa	沙 saa	也 jaa

韻母

韻腹

8個，請睇下面個表：

韻腹表

	不圓唇韻腹				圓唇韻腹
韻腹	aa	a	e	i	o	u	oe	y
國際音標	[aː]	[ɐ]	[ɛː]/[e]	[iː]/[ɪ]	[ɔː]/[o]	[uː]/[ʊ]	[œː]/[ɵ]	[yː]
漢字例子	沙 saa	新 san	些 se 四 sei	詩 si 星 sing 識 sik	疏 so 蘇 sou	夫 fu 風 fung 福 fuk	靴 hoe 詢 soen	書 sy

韻尾

9個，請睇下面個表：

韻尾表

	元音韻尾			鼻音韻尾			塞音韻尾
韻尾	-i	-u	-y	-m	-n	-ng	-p	-t	-k
國際音標	[-i]	[-u]	[-y]	[-m]	[-n]	[-ŋ]	[-p̚]	[-t̚]	[-k̚]
漢字舉例	西 sai	收 sau	需 soey	心 sam	新 san	生 sang	濕 sap	失 sat	塞 sak

韻母表

韻腹加韻尾組成粵拼嘅韻母，共58個：

（方括號內係國際音標，其中[ɵ]亦寫成[œ˔]或[ø]，所有例字淨係攞佢嘅韻母）

韻母表

行列	-	i 列	u 列	y 列	m 列	n 列	ng 列	p 列	t 列	k 列
aa 行	aa 渣 [aː]	aai 齋 [aːi]	aau 嘲 [aːu]	-	aam 站 [aːm]	aan 讚 [aːn]	aang 掙 [aːŋ]	aap 集 [aːp̚]	aat 扎 [aːt̚]	aak 責 [aːk̚]
a 行	-	ai 擠 [ɐi]	au 周 [ɐu]	-	am 斟 [ɐm]	an 珍 [ɐn]	ang 增 [ɐŋ]	ap 汁 [ɐp̚]	at 姪 [ɐt̚]	ak 則 [ɐk̚]
e 行	e 些 [ɛː]	ei 四 [ei]	eu 掉* [ɛːu]	-	em 舔* [ɛːm]	en 𨋍* [ɛːn]	eng 鄭 [ɛːŋ]	ep 夾* [ɛːp̚]	et 坺* [ɛːt̚]	ek 石 [ɛːk̚]
i 行	i 思 [iː]	-	iu 消 [iːu]	-	im 閃 [iːm]	in 先 [iːn]	ing 升 [ɪŋ]	ip 攝 [iːp̚]	it 泄 [iːt̚]	ik 識 [ɪk̚]
o 行	o 可 [ɔː]	oi 開 [ɔːi]	ou 好 [ou]	-	-	on 看 [ɔːn]	ong 康 [ɔːŋ]	-	ot 喝 [ɔːt̚]	ok 學 [ɔːk̚]
oe 行	oe 靴 [œː]	-	-	oey 需 [ɵy]	-	oen 詢 [ɵn]	oeng 雙 [œːŋ]	-	oet摔 [ɵt̚]	oek 腳 [œːk̚]
u 行	u 夫 [uː]	ui 灰 [uːi]	-	-	-	un 歡 [uːn]	ung 風 [ʊŋ]	-	ut 闊 [uːt̚]	uk 福 [ʊk̚]
y 行	y 書 [yː]	-	-	-	-	yn 孫 [yːn]	-	-	yt 雪 [yːt̚]	-
鼻音韻	-	-	-	-	m 唔 [m̩]	-	ng 吳 [ŋ̩]	-	-	-

• 掉、舔、𨋍、夾、坺係口頭語音，唔存在於傳統讀書音中。

鼻音獨立韻

兩個，係：m（唔）、ng（吳、五）

聲調

聲調表

聲調	陰平	陰上	陰去	陽平	陽上	陽去	陰入	中入	陽入
調值	55/53	35	33	11/21	23	22	5	3	2
國際音標	˥/˥˧	˧˥	˧	˩/˨˩	˨˧	˨	˥	˧	˨
漢字例子	分	粉	訓	焚	奮	份	忽	發	佛
代表數字	第1聲	第2聲	第3聲	第4聲	第5聲	第6聲	第7聲	第8聲	第9聲
拼音	fan1	fan2	fan3	fan4	fan5	fan6	fat7	faat8	fat9

實際上高陰入、低陰入、陽入聲調嘅音高，同陰平、陰去、陽去係一樣嘅，呢啲入聲調用韻尾 -p、-t、-k 嚟區分。傳統聲調嘅定義，包括抑揚性（即係實際音高）同頓挫性。而入聲韻尾 -p、-t、-k 正正係影響咗頓挫性。所以粵語有「九聲六調」，標調時就算唔用7至9，淨係依實際音高用1至6，都可以睇韻尾字母嚟區分入聲。

拼寫舉例

春曉　　孟浩然	Tsoen1 Hiu2　　Maang6 Hou6jin4
春眠不覺曉，	Tsoen1 min4 bat7 gok8 hiu2,
處處聞啼鳥。	Tsy3 tsy3 man4 tai4 niu5.
夜來風雨聲，	Je6 loi4 fung1 jy5 sing1,
花落知多少？	faa1 lok9 dzi1 do1 siu2?

同其他粵語拼寫方案比較

同粵拼嘅分別

大多數粵語音素，本方案同粵拼一致。例外嘅有：

• 粵拼分別用 eo 同 oe 表示 /ɵ/ 同 /œː/，而本方案就用 oe 同時表示呢兩個元音。
• 粵拼用 eoi 表示 /ɵy/ ，而本方案就用 oey 。
• 粵拼用 z 表示 /ts/，而本方案就用 dz 。
• 粵拼用 c 表示 /tsʰ/，而本方案就用 ts 。
• 粵拼用 yu 表示 /y/，而本方案就用 y 。
• 粵拼表示聲調嘅數字唔使上標，而本方案表示聲調嘅數字預設係上標。陰入、中入、陽入聲三個聲調，粵拼用 1、3、6，本方案用 7、8、9。

出面網頁

• 中文字元資料頁：粵語拼盤（教院拼音版）
• 小學中文科常用字研究
• 香港教育學院粵語網路課堂
• 粵語拼音輸入法（以「教院拼音」做正音）
• 粵語拼盤 (粵語拼音自學課程)
• 廣東話拼音輸入法(免費)
• 粵音資料集叢