蠱（gu2）係一種蟲。相傳苗族人識得用呢一種蟲製成粉末，用來施巫術，所以呢種蟲又叫巫蠱。而施行呢種巫術，就叫做整蠱或者蠱惑。
呢一種巫術係用來控制他人嘅，被整蠱嘅人會好似中咗降投咁樣，聽晒個施法人嘅說話。整蠱呢個粵語詞相信就係噉來，引申設局撚化人、玩弄人嘅意思，通常都唔會涉及任何邪法、巫術。而蠱惑呢個詞就變咗做形容詞，形容人狡猾、唔老實。
蠱字喺字形嚟睇就好似個象形文字噉，最早出現喺殷墟出土嘅甲骨文。
- 「有疾齒，唯蠱虐。」（《小屯‧殷墟文字乙編》7310片）
- 「（有）疾，不（唯）蠱。」（《戰後京津新獲甲骨集》1675片）
- 「犬蠱祝」（商承祚/著 《福氏所藏甲骨文字考釋》 金陵大學 1953年 第4頁）
- 「貞，不唯蠱？」（《鐵雲藏龜》12.3）
- 「病，其唯蠱？」（胡厚宣/著《殷人疾病考》引盧靜齋藏片。）
- 「貞：王舌病，唯有古？」（楊樹達注：古、蠱音同，古亦當讀為蠱也。睇埋《積微居甲骨說》，中國科學院出版社 1954年，第59頁。）
- 「貞：王病，不為豈。」（豈字係蠱嘅假借字，楊樹達/著 《卜辭求義》群聯書店，第4頁。）
- 許慎《文》曰：“蠱，腹中蟲也。”
