數白欖(北方中文叫數板)係中國流傳已久嘅民間小風俗,係深受當時平民百姓喜愛嘅街頭小娛樂。

簡介 編輯

任何人都可以係數白欖嘅表演者,而玩親數白欖嘅絕大多都係一啲貧苦老百姓,總之邊個有啲主題想講,又有幾分作詞嘅天份,就可以向大家演唱,有一個人唱又或者可以幾個人和住嚟唱;數白欖嗰陣,演唱者會拎住用草繩相連住嘅兩塊細木板做拍板,一路拍出節奏邊就一路唱出想講嘅內容。

數白欖嘅內容大多數都係以諷刺時弊為主,又或者會舒發一吓對某啲嘢嘅感受,有時會講吓當朝嘅政事,有時又會講吓城中大小嘅熱門話題,因此每逢親有人係街頭度數白欖,啲路經嘅途人都會停低落嚟圍觀,重會加入埋一齊吹吓水,冷嘲熱諷一吓。

數白欖嘅格式 編輯

數白欖雖然冇規定話要咩格式,但一般嚟講,最普遍係會用「三三七」嚟進行,即係頭兩句都係三個字,而第三句就係七個字嘅句子。以下用咗【數字歌】嘅歌詞嚟做例子:(上面有黑點即係表示拍一吓,拍嘅時候要有規律;可以試玩吓)

。 。 。 。 。 。 。
一二三,三二一,一二三四五六七,
。 。
二三四,四三二,四五六七八九十。

現況 編輯

而家喺一啲粵劇或者京劇裏面係可以欣賞得到數白欖嘅表演;而學術一啲嚟講,數白欖其實已經歸咗入戲曲中一門「說白」嘅學問之中。

如果有睇過香港電影明星周星馳嘅喜劇作品《唐伯虎點秋香》,劇中有一段戲都有玩形式類似嘅數白欖,不過佢嘅版本係一個誇張版。而另外一個喺香港算係好多人聽過嘅,以中國醫學為基礎嘅中藥補健食品廣告,亦都有用數白欖嚟做宣傳,其中一句「…鋤得多,傷氣力,消耗一定要補充,唔想失威悲到極…」更加係耳熟能詳。

睇埋 編輯