文麗雙築

文麗雙築（英文：Manly Villa），係香港一個私人住宅屋苑，喺香港島黃竹坑海洋公園道38號，由8座三層高嘅獨立平房組成，編號分別由A1到A7再加B1。文麗雙築嘅位置喺香港海洋公園海濱樂園（山下園區）東南面，因而經常畀人誤以為屋苑係海洋公園嘅範圍或者飛地，但事實上屋苑同佢通去外間嘅車路都係公園範圍外面。

史

文麗雙築現址塊地早喺海洋公園起之前已經有起屋。根據香港海洋公園1972年批地契約，地契圖則顯示文麗雙築現址塊地係屬於「RBL 853」地段（鄉郊建屋地段第853號），上面已經起咗建築物。而文麗雙築而家嘅建築係喺1977年獲得政府嘅規劃許可，並喺1983年5月入伙。另外，雖然文麗雙築獲編配門牌「海洋公園道38號」，但根據地政總署嘅街道命名公告，海洋公園道只係去到海洋公園西側近警校道東面入口嘅位置，所以由嗰個位置開始通去文麗雙築嘅車路並無納入海洋公園道嘅一部份。