方潛衞公祠

方潛衞公祠 心和堂
主祀	方潛祖（十五世祖）
家族信息
家族	瀝滘衞氏
起源	河東郡
修建史
始建	1697
方位
地址	廣州市海珠區瀝滘村西街大街
朝向	坐東朝西
現時尚存 經已掛牌
登錄名	心和衞公祠
等級	海珠區登記保護文物單位
籌	1-3
登錄時間	2011年10月

 方潛衞公祠（粵拼：fong1 cim4 wai6 gung1 ci4） ，堂號心和（sam1 wo4），亦叫紅祠堂（hung4 ci4 tong4*2），喺廣州市海珠區瀝滘村西街大街，係番禺瀝滘衞氏御史房十五世嘅祠堂，亦係清朝康熙三十六年（1697年）建築。坐東朝西。一正一偏三沓格局。磚木石結構。總面闊25.6米，總進深30.4米，佔地面積778.24平方米。2011年10月，列為海珠區登記保護文物單位；因爲呢座祠堂亦叫心和祠，掛牌就擺烏龍寫「心和衞公祠」。

建築

中路頭門面闊三間10.6米，進深九架夾埋4.2米。硬山頂，鑊耳封火山牆，灰塑龍船脊，有舉折、升起，素瓦當，滴水剪邊。木雕係如意封簷板。牆體青磚紅砂岩石腳。前、後簷柱都係鹹水石八角柱，有石柱礎，前簷柱出斗栱托簷。三間都有木額枋，放馱峰斗栱。前步樑上高放瓜柱。明間中開大門，石夾門框，兩棟木門，有門簪。頭天井深8.9米，改咗做石屎鋪地。側邊起兩條廊。

中堂面闊三間，進深三間6.8米。前、後簷柱係鹹水石八角柱，有石柱礎。兩金柱係圓木柱，高石柱礎，有柱質。明間前有木額枋，兩次間建磚牆，牆中砌磚雕通花。兩天井都有4.5米咁深，兩便係卷棚頂廊，碌筒瓦面，兩級臺階上後堂。

後堂面闊三間，進深十三架6.2米。前簷柱鹹水石八角柱，有石柱礎。屋頂形式似足頭門。左路面闊三間14.9米，進深四間11.3米。有兩級花崗條石臺階。前便有院仔，同中路建築、青雲巷孖埋一氣。

攷

• 衞宗正、衞鎔。《衞氏族譜六卷》。
• 廣州市文物普查增編編纂委員會 (2014)。〈心和衞公祠〉. 出自 陳建華 等 (編)。《廣州市文物普查增編 中卷》。廣州出版社。頁 364。ISBN 978-7-5462-1837-3。