日本共產黨

日本嘅政黨
Nihon Kyōsantō Logo.svg

日本共產黨日文日本共産党)係日本嘅政黨,簡稱共產黨共產日共,喺1922年第一次成立,係日本現存最耐嘅政黨。

歷史

二戰前

日本共產黨第一次係喺1922年,當時佢哋係非法組織嚟,由堺利彥等人成立。1923年6月,大部分黨員畀由日本政府滲透入去嘅內鬼告發拉咗,1924年2月就解散咗。

後來日共喺1926年重建,兼且透過旗下嘅合法政黨「勞動農民黨」出嚟參選,喺1928年嘅眾議院選舉入面,勞農黨贏咗2席,引起日本好大震動,當時嘅首相田中義一為咗要煮死共產黨,專登修改《治安維持法》,並且喺同年3月15號開始大規模搜捕共產黨員同支持共產主義嘅組織,史稱「三一五事件」,日本嘅共產勢力大幅被削弱,之後日本政府一直全力打擊共產黨,繼續派人滲透,又不斷去拉人封艇,期間更加發生日共高層用私刑打死佢哋懷疑嘅內鬼,到1935年,日共基本上已經冇運作能力。

二戰後

1945年,日本向盟軍投降,盟軍總司令部宣佈釋放政治犯,大概220個共產黨員被放返出嚟,包括德田球一宮本顯治等人,跟住佢哋重建咗共產黨。當時日本嘅經濟好差,左翼思想受歡迎,盟軍方面亦都利用佢哋嚟打擊右翼勢力,所以共產黨發展蓬勃。後來冷戰嘅興起,日本成為對抗共產主義嘅前沿,盟軍司令部轉而打擊共產黨,1950年,盟軍喺日共發起「人民廣場事件」之後開始清算日共,包括將德田球一在內嘅20幾個議員公職追放,又清走喺企業入面嘅共產黨員,兼夾取締共產黨機關報《赤旗》等等。德田球一,野坂參三等人更加走咗佬去中國。

與此同時,日共內部出現咗路線鬥爭,以德田球一為首嘅所感派同宮本顯治嘅國際派開始爭奪日共嘅控制權,初時所感派佔上風,日共當時更加成立中核自衛隊同山村工作隊呢啲主張武裝革命嘅組織,但係佢哋嘅行為反而令日共流失支持度,結果日共喺1952年嘅眾議院選舉大敗,一席不保。到1955年,野坂參三返咗去日本,同國際派和解,放棄武裝革命路線,並且批評武裝革命係「極左冒險主義」,兩派嘅鬥爭告一段落。

1960年代開始,日共開始行「自主獨立路線」,反對中共同蘇共嘅干預,甚至乎會批評佢哋,對此,黨內曾經有過內部嘅鬥爭,最後親蘇派同親中派落敗,「自主獨立路線」亦都得到確立。1970年代,日本社會黨同共產黨開始合作(革新統一),結果1972年眾議院選舉,共產黨成為第三大黨,僅次於自民黨同社會黨,共產黨後來將黨綱由馬列主義改做科學社會主義,走向大眾化。

1970年代後期,社會黨開始放棄同共產黨合作,改為同公明黨、民社黨合作,希望組成一個非自民、非共產嘅政權,共產黨嘅黨勢開始喺高位回落,直至1996年,共產黨因為吸收咗對社會黨失望嘅左翼支持者,議席數目先開始升返。到1998年,當時嘅共產黨委員長不破哲三去咗中國訪問中國國家主席江澤民,化解日共同中共32年嚟嘅對立。

到2000年,做咗共產黨委員長十幾年嘅不破哲三退休,個位交咗畀志位和夫。2004年嘅時候,共產黨將黨綱入面「廢除君主制」嘅條文刪除咗。2012年以後,執政咗三年幾嘅民主黨下野,之後嘅在野勢力變成一盤散沙,後來共產黨同其他在野黨以反安保學運為契機,開始合作,尤其喺選舉上。2019年,日共修改黨綱嗰陣,志位和夫批評中共迫害新疆、西藏、香港等地國民嘅人權,冇辦法承認中共係以社會主義為目標。修改之後嘅黨綱更加指中國對待亞洲各國嘅態度係霸權主義。[1][2]

參考

  1. "眾新聞 | 日本共產黨聲明 籲立即停止在香港鎮壓". 眾新聞 (中文). 喺2020-10-01搵到.
  2. 三立新聞網 (2019-11-08). "看不下去!日本共產黨決議修黨綱 痛批中國背離共產價值 | 國際 | 三立新聞網 SETN.COM". www.setn.com (中文). 喺2020-10-01搵到.