明太子（日文：めんたいこ）係阿拉斯加鱈嘅魚子（包埋卵巢組織）經過加工醃製而整成嘅嘢食，好多時都會落辣椒粉辟腥，所以通常都帶些少辣味。因為朝鮮同中國東北都將阿拉斯加鱈叫「明太」，傳到日本後，呢隻魚嘅魚子就自然叫「明太子」。明太子主要喺日本菜用得多，既可以就咁食，又可以夾落飯糰食，亦可以做調味，味道辛辣。
