司馬衷

晉惠帝司馬衷（259年—307年1月），字正度，係西晉第二個皇帝，晉武帝司馬炎個仔。喺佢統治期間發生咗八王之亂，使到西晉元氣大傷。

司馬衷係喺267年立為太子，290年登基。司馬衷本人無能，喺佢在位期間，發生咗八王之亂，大班皇室成員起兵造反，而司馬衷重好幾次俾班皇叔操控成為傀儡。又喺呢個時候一啲胡族人又一樣開始起兵搞事，係五胡亂華嘅開始。

300年，賈后廢咗太子司馬遹，之後又派人殺咗佢。趙王司馬倫乘機起事，發兵入宮廢咗賈后，之後又賜毒酒殺賈后。

307年1月，司馬衷喺宮入面死咗，有人話喺俾皇叔毒死嘅。之後由皇太弟司馬熾繼位，就係晉懷帝。

評價

多數人都話司馬衷係個白痴皇帝，因為《晉書》上面就咁樣記載：「及天下荒亂，百姓餓死，帝曰：『何不食肉糜？』」

但研究一般認為，司馬衷嚴格上並唔係白痴，因為所謂理據喺醫學上都唔成立。只不過司馬衷個人的確無能力解決政事上嘅困難，造成八王之亂，而司馬衷自己亦成為傀儡。

家庭

后妃

• 皇后賈南風
• 皇后羊獻容
• 姬妾謝玖

仔女

• 愍懷太子司馬遹，謝玖所生。