景福集團

景福集團有限公司係香港一間珠寶行，亦係香港上市公司。佢嘅業務包括經營黃金首飾、珠寶、鐘錶同禮品零售、買賣金條同鑽石批發，因為公司嘅標誌有兩隻馬，又俗稱雙馬珠寶。

歷史

1949年10月6號，創辦人楊志雲喺上環文咸東街5號開咗第一間景福，當時景福嘅業務只係做打金同金條買賣。透過賣足色足量嘅999金條，慢慢打響名堂。

後來喺1959年，景福喺同屬楊志雲旗下嘅尖沙咀美麗華酒店度開咗第一間零售舖面，第年重賣埋鐘錶^[1]。

到1971年，景福響中環自置物業，喺景福大廈嗰度開咗第一間大型金飾珠寶鐘錶舖頭，就叫景福珠寶。

1985年，創辦人兼老闆楊志雲過身，由大仔楊秉正接手家族生意^[2]。

1988年3月28號，景福集團喺港交所上市（港交所：0280）。

1995年楊秉正突然因心臟病發過身，生意就交咗畀楊志雲孻仔楊秉樑打理。

2016年3月，楊秉樑因為個人事務唔再做景福嘅主席，主席一職就交畀大佬楊秉堅，但係楊秉堅接任冇耐，身體就開始轉差，最後重喺9月過身^[3]。主席一職就交咗畀鄧肇堅後人鄧日燊去做，而身為楊家第三代嘅楊嘉成就喺2017年5月開始成為景福嘅執行董事，不過佢到2020年已經冇再做。

直至2023年為止，楊家喺董事局入面得返王渭濱一人，佢係楊志雲嘅女婿。