更生中心
更生中心（英文：Rehabilitation Centres）係香港懲教署管理嘅一種設施，收容14至20歲嘅青少年罪犯，為佢哋提供包括短期住宿訓練嘅更生計劃。
簡介
編輯2002年開始，更生中心成為香港另一個代替監禁嘅新刑罰，適合14至20歲嘅青少年犯人，無論係男定女。如果犯人判處短期羈留式刑罰，但係唔適合判入勞教中心或教導所，就可以判入更生中心。更生中心嘅目的，係防止犯人再有犯罪行為，同埋協助佢哋改過自新，重新融入社會。更生中心令唔適用於曾經判監、或者曾經判入教導所、勞教中心或戒毒所嘅犯人。
喺更生中心，犯人會先羈留兩至五個月，刑期由懲教署署長考慮過犯人紀律同進展之後先會確定。之後，犯人會轉送到另一間更生中心，居住一至四個月（時期由懲教署署長考慮過犯人嘅需要同進展之後確定）。
訓練
編輯第一階段計劃喺更生中心接受兩個月至五個月嘅訓練，集中紀律訓練，希望透過半日嘅基本工作技巧訓練同半日嘅教育／輔導課程，協助青少年犯人識得自我控制同培養有規律嘅生活模式。
第二階段計劃，青少年犯會入住中途宿舍形式嘅院所一至四個月，其間佢哋可以出去返工、返學或者參與其他獲得批准嘅活動。
犯人獲釋之後，可能需要再接受為期一年嘅監管，期間要遵守某啲規限，例如喺夜晚某個時間之後，一定要留喺屋企。犯人若果唔遵從監管條件，就可能會再次送入更生中心。