會長盃七人賽

會長盃七人賽係香港一項已經停辦嘅七人足球淘汰制錦標賽，喺每年球季開始前舉行，參賽嘅球隊由香港甲組足球聯賽（舊制）球隊每隊派出兩隊分成A隊同B隊角逐，如果A隊或B隊其中一隊被淘汰，球員可以調去另一隊繼續之後嘅比賽。

賽制

比賽上下半場各10分鐘，中場休息5分鐘，除咗冇越位，角球改喺大禁區角開，其他規則同一般足球比賽一樣。如果法定時間之內打和，冇加時，以互射十二碼採用即時死亡分勝負，即係第一輪有球隊射入，射失嘅球隊即輸。